Read Northern Rengma Naga ISAYA 26 Bible Online

ISAYA 26 - Northern Rengma Naga bible

ISAYA 26

¹Matsü kesü na kegho wi anyithu na Judah yyi wi akhwi ha saaden: Ithu nyunutiwa na zü le! Anyiza na ma ketanla ma khwetiwa tsü hieden!

²Anyunutiwa khweti sha chi, nu mizzatenti jühtsentsa kesenwa ya dugho thsü, ma nyi na kemeshon sa keten mizzatentiwa.

³Apvüwa, no cencu kesa kecca pi kemeshen khvue kebenthu, nu mathu kenondi pi nmiwi chi ketenthu cülo.

⁴Anuphan wila Apvüwa nondi tenlo! Ma keshüthangla ithu khweya ben na.

⁵Ma kapvü ketenthu satemeni chidha; Ma mathu na hang keten nyunuti kezüwa tsü yasadha, nu tsüthu khweti ya bvüca pi ayyinikhu salo kesun chidha.

⁶Nyu na mathu pasha kesathu na khili tsüthu miwi alentsen bendha, nu mathu ccü mpha kekhu wina tsüthu cüten bendha.

⁷Apvüwa, no anyi kemehaithu ghena alen sapi chengche sa; nu mathu na kijünyi wa ketenlen tsüna tijü.

⁸Ithu na no kemeshen nie nu ithu kaghang pi nmiwi chiden; no ithu nmvu keten tsüdiwa le.

⁹Aghaja wi ileben tsüdi pi no nmvu den; no ayyi nu ciwi keben nyithu jühkekaghaten wi, mathu tsüdila ajühtsentsa tsüna mangwa khe chüyaben.

¹⁰Ma anyi gheshighena tuwi ccatssüden lela, tsüthu kemeshenwa sale kesa chü meya. Hewi ketsatan nyi yyi wi lela mathu na khilila sazziben; mathu na no kedi nchü mvulaben.

¹¹Nghinyi na no kemeten pi mathu cüle keben tsü nchü. Apvüwa, mathu ya kejügheya, nu ketizensa thsülo; mathu ya no kemeten kiden ketheng witsü ketizensa thsülo. No khacu n-nyithu ghali khe pi mathu ccücalo.

¹²No mehai kayi keya pi ithu cüden, Apvüwa; ithu na saya keten tsüdila no kekuli biwa le.

¹³Apvüwa ithu Nyiza, nyu kepa na ithu miwi kekhang senghodha, isala no ketan ithu Pvüwa le.

¹⁴Khilitsü mathu na shüdha, nu hangya nbendha; tsüthu cenpvü na shagha nbendha, kepaghenanye no kemeten pi mathu cüdha, nu mathu na dedidha. thola mathu nmeshen neng ladha.

¹⁵Apvüwa, no ithu mizzatentiwa ya shigüya thsü, ma katen kahe wi tsüdi sapi di neng chi, nu ciwi na kenyuwakü sengho no cü thsülo.

¹⁶Apvüwa, no kemeten pi n-nyithu cü, nu mathu na ketizenkesa ghena no wi khie.

¹⁷Apvüwa, no ithu ya qai shagha thsü, nza kesü na kepvügha kinaa pvü nu qai keshagha tsüti.

¹⁸Ithu na ketizensa nu agüccü keten, isala ithu na mangla pvügha meya. Ithu na ithu yyi ghena mangla khangkeya sa meya; ithu na mangla sacen meya.

¹⁹Ithu nyi shü kesathu tsüna hang neng yaden! Mathu gwo na kahang wi gho neng yaben. Ashüjjen wi jen kebenthu tsüdila shagha nu anonghethi sa akhwisaden. Akejan cwencwe kesa tsüna ayyi ten teghü cü keten tsüti, Apvüwa na kheni wi shü kesathu ya hang nengya thsüaden .

²⁰Nthu jjen wi walo, inyithu, nu nthu khenten yalo. Anyiza leben ketsu na npi kewakhi chu nthu na matsü keu kuthiben lalo.

²¹Apvüwa na tang wi ma keben pen wina gho nu ayyi nyithu kesami ghena kemeten pi mathu cüden. Ayyi wi kuthi nu nyu pathi kethengthu khishi chiden, nu ayyiwa na nyu ma pathi kesathu kuthiben nben.