Read Northern Rengma Naga ISAYA 27 Bible Online

ISAYA 27 - Northern Rengma Naga bible

ISAYA 27

¹Tsü ghanan wi Apvüwa na nyu süthi keten njünnu kekhangwa tsü sen nu Leviathan, khakhuli, khapheghe-khaja keten kemanthisawa tsü meten cü, nu atssükedone wi ghassübvü tsü süthiaben.

²Tsü ghanan wi Apvüwa na ma nonkeyeng kemeshentsse lli ghena hati khiben,

³“Hi tsü hie nu atssü pi zügükini sa. Hi thola ya tsü meyasa thsüle kesa ghena ghaja ghanan tsü hieden.

⁴Hi kemeshentsse lliwa ghena ileben ntsu ladha. Keujüla aghazü nu ataqaethu npathu yishüben lethu, hi tsü mecangtha saaden.

⁵Isala keujüla inyi ghinyithu na hi mathu khweya thsü mvuben lethu, mathu ya hi ssinu gweghe mehai yalo. Anle, mathu ya hi ssinu gweghe mehai yalo.”

⁶Ghaketen tsathang wi, Jakob shicübvügha Israel nyithu na achan ti ma ghazan cha nu tsüthu na bvüjjen nu pvü yaben. Tsüthu wina bün keya pila ayyi pong yaben.

⁷Israel nyithu na mathu ghinyi na kemeten kedhu mukeya ti, Apvüwa wi tsü npi muya, nyelela mathu na anyi kejon npi bhatagha.

⁸Apvüwa na ma nyi kekushi tsüpi mathu kemeten sa cü. Ma nishuwa wina ameghü kekhang ya mathu mo pi bvü thsüa.

⁹Israel nyithu kesami teshi pi cüle keben tsüna acenpvü kepapa kesa kekinyijjen wi alonthu tsü kihhecha, nu hankedemvu kemecang ben, nyelela acenpvü nzawa Asherah tsikezhüthu tsü nmitha sa ccüla saaden.

¹⁰Akhweti kemehai nyunutiwa tsü yasadha. Tsü teshi pi kiyisha ghansha ti sadha. Tsüna amesüsithu ghena amou kesü sa nu tsüthu na ciwi mnan nu atsse yawadha.

¹¹Achan cünathu na shü nu qanca lethu nzathu na tsü saghu pi anni saden. Anyithu na mangla chüshi nkeya ghena, Anyiza mathu sahangkechiwa na mathu nantizen nben nyelela nanketizen mangla pi mathu ccüca nben.

¹²Tsü tsathang wi Eufrat na wala Ejipt ggü kecu, Apvüwa na awhengsu bhani wina ma tha kepa saya keten ti ma nyithu kesüsü na saghu yaben.

¹³Tsü tsathang na kegho wi tutuwa kesü khou chi nu Assiriya nu Ejipt wi Israel kushinyi na kebenthu tsüdila ci neng yaben. Mathu na gho Jerusalem wi yyishiphon kemetha wi Apvüwa kinyiden.