Read Northern Rengma Naga ISAYA 28 Bible Online

ISAYA 28 - Northern Rengma Naga bible

ISAYA 28

¹Israel kadiyyi na dedi tendha! Ma nyankethang na ma ccülikesa adikinathu li wi athighi kepvü ti pvüjü wa tendha. Mathu kekapvü li na ghang mehai, isala mathu na adinathila khuliben.

²Apvüwa na anyi kezü nu kekhang pahan kiden sen nu mathu ssikaghashen le saben, tsüthu na aghayikeca, atsan keshathi, nu atssüketi kekhang ti ayyi danbhon ghoden.

³Ccülikesa dikina kekapvüthu tsüpi accü mpha kekhu wi cüten shaben.

⁴Kekapvü ccülikesathu nyankethang na pvüjü kewa tsüna khhaghabvü bi atuwa na nyünthu wan ladsa nu nmila keten tsüti saaben.

⁵Apvüwa Kekhang ntsawa na ma nyi hang kebenthu tsü ghena kadiliwen anyankethang tsikemehai ti sa keten tsathang kesü na ghoden.

⁶Ma jühtsentsa kuliya kemehai kechü pi pendhethu cü, nu kempvüza pi nyu na anyunuti ssikaghashen kegho wi akhweti hie ketenthu cüden.

⁷Atusenjüh-kechü nu keqhaikedithu lela adina pi kulukhukhu wadha. Mathu na kisengtssü nu adikinatssü ji mtsü jjü kesalina accümeshü nu kivvü wadha. atusenjüh-kechüthu na adina ntsa sa nu Anyiza na kemanthi khukechithu chüshiya le kesa na dhudha, nu keqhaikedithu na adina ntsa sa nu kekaghatenjüh sen nu mathu wi kegho tsü südhe le kesa dhudha.

⁸Mathu pen wi mizthu tsüdila keduwe ketan sadha, kemetha pen mangla nmidha.

⁹Mathu na ighena leben maghala ben. Mathu na khi, “Anyi katsü na ma thowa sansi ben le saten nu? Thowa na ma pi sansi keben jüh tsü nsenthu yishü le saben nu? Tsüna memethu na mechan shagha n-niela kesathu ghena kemehai ketan le!

¹⁰Ma lesüyen kesüsü, alen kesüsü, nu chüthsü kesüsü sala pi ithu sansi le kidenben.”

¹¹Nthu na ijüh nkina lethu, tsaseng wi Anyiza na asangthu, ajüh hhai makepa khi keten nyi ssinu chüthsü kesü pi nthu sansi den.

¹²Ma kecca nu nonkekwen pi nthu tsüdi cü, isala nthu na ma jüh nkina.

¹³Tsalina Anyiza na lesüyen kesüsü, alen kesüsü, nu chüthsü kesüsü na pi nthu sansi le bendha. Isanu nthu na acükha kekhha tsüdila accümeshü ben. Nthu na mesa- mena, acadu, nu nthu ghang sen nu atssüzü sa bvüaden .

¹⁴Khili ammi sala Jerusalem wi anyi hathu miwi kekhang sen kebenthu, Apvüwa na khi keben jüh ha kina yalo.

¹⁵Nthu na keshü ssinu keponghu saya nu keshü yyiwa ssinu ajüh cenya le nu kapvü den. Nthu na zulila agükeccü gho lela nthu ghü cüben kesa chütiben, nthu na yazishu saya le kesalina milikemesa nu kemechu miwi maghaki ben den.

¹⁶Kemisintsawa Apvüwa na ha khiben, “Hi Zion wi adonbvü kezü nu kekhang kesü pi shengden. Hi alontsen donbvü lon tsüpi sheng nu tsü miwi ajüh hathu pi zhütheng, ‘Kenondi kezüwa tsüna leben tisie den’.

¹⁷Ajühtsentsa pi ma gi kemthsü ketegüji, nu ketsatan pi kemtong ketegüji saaden.” Aghayi-caghamo sa sengho no maghaki keten milikemesa tsüdila mo pi bvüaden, nu atssüdan na gho nthu na yazishu keben tsü yasa den.

¹⁸Nthu na keshü ssinu ponghu ketheng tsü pasa, nu keshü yyiwa ssinu ajüh cenketheng tsü bhegheaden. Zulila agükeccü na dughothu, nthu miwi khang yaden.

¹⁹Tsüna ghanen kaghapen nthu kihhe neng neng saaben. Nthu na ghaja ghanan wila tsü pvüben. Anyiza wi ketsijüh ketheü kegho tsüdila kemessi ketheü sengho ben!

²⁰Nthu na ajühkaghape wi khiketen, anyi kesü na athsü zza mtsü mphi nu ma wheng meyala awe ghaman mtsü kesa miwi jen le kechu taghala keben ti saaben.

²¹ Apvüwa na Perazim Yikha nu Gibeon Yyiketijü wi aghikesa tsüti ma sale keben kekuli kepawa tsü saaden. Ma ma kekuli chükedhuwa tsü sacen yaden.

²²Hi kekitsan pi nthu cü ketenwa ha nankeqhe nsala! Nthu na isalethu, tsüna nthu ghena dhu pfü pi ghü nkeya kesü saaden. Hi Apvüwa Kekhang ntsawa na diyyiwa maben yasa le südhe keya tsü zayadha.

²³Hi mangwa khiben khe ha kina chilo, “Hi no kiza kebenwa ha kina kaketsü sa chilo.

²⁴Allikeca nyi thola keshüthangla alli chhü nu amacü kechi ghena ketan sa nten .

²⁵Ma ma lli jjü cenya lethu awwenja cü, chhülakhhwe nu ccügüshi cü ti kesa pi chiden. Ma awhengsu nu achentha npi chi, nu alli katen- khuna witsü pala cü kepa pi chiden.

²⁶Ma khatinu ma kekuli nsathu yishü khe tsü chüben, kepaghenanye Anyiza na pi ma sansi cüdha.

²⁷Ma kekihhechan kekiyan pi chhülakhhwe nu ccügüshithu kihhe nten; tsüti kesawa nyela ma achan mbhisi senti kesa sen nu kihheden.

²⁸Ma awhengsu kaghaceng witsü asakhen nsala ghaceng pi yasa thsü nten, ma amesügari ku sen nu mabi npasala ma miwi na cüten nu saya kemehai cho chüben.

²⁹Kemetsa hathu ha tsüdila Apvüwa Kekhang ntsawa na pi kecü. Anyiza na sa keten cho tsüna metsa nu keshüthangla mehai cenyaden.”