Read Northern Rengma Naga ISAYA 3 Bible Online

ISAYA 3 - Northern Rengma Naga bible

ISAYA 3

¹Kekhang ntsawa Apvüwa na Jerusalem nu Judah wi mathu na nondi nu hang keten tsüdi nu anyi tsüdi ssinu bvüa tendha. Ma mathu kedsakejjü nu atssü,

²aghikekhangthu nu süpahithu, pendhethu, nu atusenjüh-kechüthu, tusen kekhithu nu paghangthu,

³süpahizi nu kepa wi accülikesathu, anyi likesathu nu demachüthu tsüdi ssi bvüaden .

⁴Apvüwa na pvüzanyithu yala anyithu miwi kekhang sen thsüaben.

⁵Anyi tsüdila khokho miwi kekiyi bhaben. Ghanyithu na mathu miwi keqhaithu khichi nben, nu mangla nkenyethu na mathu miwi kebenthu nyuwa nben.

⁶Matsü na ghoden, tsü tsüwi agei kesü na mathu jawi meshu kesü kessiya nu tsüwa wi hati khiiben, “No athsümeni kesüla kebenwa, tsalina sakeyishü tsü hawi ikhang ccüliwa salo.”

⁷Isala ma khineng ben, “Hi nyele! Hi nthu kiqaya nben. Hi kedsakejjü nu athsümeni la nmi le. Hi pi nthu ccüliwa nsala!”

⁸Anle, Jerusalem na dedi tendha! Judah na qanca wa tendha! Mathu kekhi nu kekuli tsüdila Apvüwa matangben; mathu na aghandu Anyiza n-nyuwa saaben.

⁹Mathu na nyu meshensa keten tsüpi mathu matangden. Mathu na Sodom nyi ti aghandu samiden. Mathu na dedi tendha, nu mathu ketanla tsü sengho mathu miwi chiyadha.

¹⁰Ketsatan nyi na anonghe yaben nu katsüha wi lela mathu ghena mehaiwa yaben. Mathu na kuli ketheng biwa tsü dsayaben.

¹¹Isala nkemehai nyi tsü dedi tendha; mathu na nyu miwi kulichi kethengwa tsü khili tsü mathu miwi sale bendha.

¹²Pisa pi nyu nna thsü ketenthu na inyithu pashaben, nyu ma men pvü kebenthu na mathu mechuben. Inyithu, nthu ccülikesathu na nthu len tsütsonsa bendha, tsalina nthu na khiewa waten khe nchüladha.

¹³Apvüwa na ma kaghatenjüh khile bendha; ma nyithu jühkaghaten le bendha.

¹⁴Apvüwa na ma nyi paghangthu nu ccülikesathu ssinu ajühkaghaten le gho bendha. Ma nyu kemetsi-kemeni jüh ha khiben: “Nthu na kemeshentsse lli yasadha, nu nthu jjen wi ketha-u tsanqai khukeya pi pong yadha.

¹⁵Nthu na inyithu pacha nu ketha-uthu miwi kekiyi bha dsaya kemehai kemeshon nmi. Hi Kekhang ntsawa Apvüwa, hi khidha.”

¹⁶Apvüwa na khi, “Jerusalem nzathu khatila kapvü khe ghangchilo! Mathu na tang peghela alentsen den. Mathu na keshüthangla nkenyeghe saden. Mathu na nkhena alentsen, nu mathu ccünan keqhan na ahhai saden.

¹⁷Isala hi kemeten pi mathu cüden — hi mathu li whipi metha thsüaden .”

¹⁸Atsathang kesü na ghoden, tsü ghanan wi Apvüwa na Jerusalem nzathu na sen nu kapvü keten ghe, mathu ccünan keqhan, likece, nu asun keqhan tsüdi sen bvüaden,

¹⁹tsüna mathu deshi keqhan la. Ma mathu mmi keshang thsü khuyaden,

²⁰nu mathu liwen, depfü nu geshi wi ghang kemehai tsanqai;

²¹mathu kwenzza keqhan nu amtsan kuwen,

²²agwo kemejuwa kaghazu, nu kemechan gwomejuwa, gwokemejuwa keti, nu pisa hikhuthu;

²³mathu thsümeni kebiza, linen kwen kenyen thsü, nu mathu likeshang thsü sen bvüaben.

²⁴Hankedemvu mithon wi mathu na hansa; ageshi keqhan mithon wi mathu na ali ghameme pvü; ali ssen kemehai mithon wi mathu li na methasi sa; athsümeni kemehai mithon wi mathu na athsü qae mphi; mathu tsikemehai tsüna kejüghekeya saaben.

²⁵Anyunutiwa nyithu, nu anyi kezü ntsathu lela aghi wi yathiaben.

²⁶Anyunutiwa khweti jenkathu na leben güccü nu qaiben, nu anyunutiwa na nza kesü na ma thsümeni bhon nu ayyi wi donki keben ti saaben.