Read Northern Rengma Naga ISAYA 30 Bible Online

ISAYA 30 - Northern Rengma Naga bible

ISAYA 30

¹Apvüwa na khidha: “Judah miwi kekhang sen ketenthu dedi tendha, kepaghenanye mathu na hi matang den. Mathu na hi sa nketheng acho tsü nieden, kekinyipen nkenye wi keponghu sa nu kesami miwi sami benden.

²Mathu na hi nkeüla Ejipt wi kekiqa bha waden. Mathu na Ejipt ya mathu khweya thsü mvu kesalina Ejipt kadimiwa nondi den.

³Isala kadimiwa na mathu kiqale kesa ma kekhang nmi, nu Ejipt ya mathu khwe sen kebenwa tsüna wan kededi wi ma sakhen saaben.

⁴Mathu mithonthu na Ejipt nyi nyunutithu Zoan nu Han cuya lela,

⁵Judah nyi na mizzatenti tsüwa miwi kekiqa ghangben lela mu meyala kesa wi mizzatenti nkenondi qowa nondi gho kesa ghena mathu na aseng meshen neng waben.”

⁶Hawa ha ayyikeshü acülawa wi aghangsathu ghena Anyiza wi ketsijüh kegho: “Mithonthu na kemessi keben diyyiwa wi ssensitemithu nu amaghang jikepvü nu pighe keten kemanthisathu na hang keten pen wi pvüdhi sen nu waben. Mathu na aju menkedhu pi gada nu sunsiesa khhi sapvü nu kekiqa mangla pi mathu cüya nketen mizzatenti kesü tsü cüle saben.

⁷Ejipt na khuchiketen kekiqa tsüna ma men nmi. Tsalina hi Ejipt nyan kechhenwa cipi ‘Patenaya-nketen Kemanthisa’ isadha.”

⁸Anyiza na hi anyi hathu ha khati kesa khe pi lesüshen kesü wi zhüyalo kiza, isanu hi mathu na khatila nmehai khe pi anuphan ghena zhütheng le kesalina.

⁹Mathu na keshüthangla Anyiza matang shun, milimesa, nu Apvüwa kesansijüh nkina mvula saden.

¹⁰Mathu na atusenjüh-kechüthu na ccen benlo khiden. Mathu na khiden “Kemeshon jüh khipi ikhang nccüneng lalo. Ikhang na kina mvu kebenwa pi ikhang kizalo. Ikhang ya milimesa ben thsülo.

¹¹Ikhang len nkhenla nu tankhulo. Ikhang na nthu Israel Nyiza Kemethawa cüki tsü nkina mvule.”

¹²Isala Israel Nyiza Kemethawa na ha khiben, “Nthu na hi pi nthu kekiza jüh nkhichila yasayala nu kemechu nondi ben.

¹³Nthu na sazziben. Nthu na ajjen-keshon kemisi wina qankhhi cüla cu keben ti; nthu na zulila qanca ben.

¹⁴Nthu na ayyipfü ti pachatha sa nu ma kegi keula pi anni mihi khwikeya qo nmila nyelela atssü degü wi atssü ssu meyala ben.”

¹⁵Kemisintsawa Apvüwa, Israel Nyiza Kemethawa na anyithu wi khi, “Kheneng gho ccen hi nondi benlo. Isalethu nthu na zü nu yazishu ben yaden.” Isala nthu na tsü nsa mvu.

¹⁶Tsüti kesawa nye nthu na goru kembhi ntsa miwi ben nu nthu ghinyi tubvüale saden. Nu nthu na nyu tubvüale kesa tsüna nthu na kesau ntsa! Nthu na nthu goruthu na mbhi ntsale meshenden, isala nthu jügü ketenthu na tsü miwi mbhiki!

¹⁷Nthu nyi hazar kesü na ghinyi süpahi kesü muchithu bvüaben, nu süpahi manga na nthu tsüdi jügü pi bvü thsüya mehai. Nthu süpahizi tsanqai khangthsü chan tsü makevü ketan teshi pi yyishiphon shoni wi chiaben.

¹⁸Isalela Apvüwa na nthu nantizen chicüle hieben. Ma ketizen pi nthu miwi chileben kepaghenanye ma keshüthangla kemeshonwa tsü kuliden. Mathu kenondi pi Apvüwa miwi chi ketenthu na anonkeghe ntsawale.

¹⁹Nthu Jerusalem wi kahangthu na qai neng nbendha. Apvüwa na nyu nantizenten, nu nthu na ma wi kekiqa khiechi lethu, ma nthu luneng chicüaben.

²⁰Apvüwa na nthu ya matsü sa keyishü wi hang thsüben, isala ma ketanla nthu sansiben, nu nthu na ma bha nbenla mehai.

²¹Keujüla nthu na alen deja sen nu ajewa nyelela tevüwa wa lela nthu sengwi ahhai hati khi keben zayaben, “Alen hewi benle. Hawa nielo.”

²²Nthu na rükatssü pi tsikezhüthu tsisa, suna pi tsüthu meju, nu tsüthu pi kenenkagha ti khala nu khiben, “Ituwi na bvülo!”

²³Nthu na khathansha wi amacü pi chi khe, Apvüwa na tsangho pi tsüthu ya shigü nu abila kejon bünya, nu amesüsi la atsse kejon muya thsüben.

²⁴Amesü süpon nu gadathu nthu llica ketenthu tsüna atsse kemehai ntsa dsaya ben.

²⁵Nthu ghinyithu khweti nkaya nu mathu nyithu pathi kesa sengwi atssü na yyishiphon nu ayikha tsüdi miwi lle shhugho ben.

²⁶Asha na aghani ti wegüben, nu aghani na kheni-ghanie miwi tagü tughu wegüki saaben, ghanan tagü kewegü saghu pi kesütan kewegü ti saaben. Apvüwa na ma nyithu mesa- mena ketheng sapi mehai kecü wi hathu ha tsüdila saaben.

²⁷Kelensie wina Apvüwa kekhang nu ma nyankethang tsü muben. anni nu annikekhu na ma lebenketsu pi ccücaben. Ma ajühkhi nu ma jüh na anni ti mecangben.

²⁸Ma atssüketi na pala tsüdi mejjen pi bvü keten ti ma tu wina ameghü kesun chiden. Tsüna mizzatentithu jügü sen wa kededi wi chi nu mathu cho nkemehai tsüdi pi asakhen sa thsüaden .

²⁹Isala nthu Anyiza nyithu tsü kemetha kho kesa ghaja wi saketen ti nthu nonghe nu akhwi saden. Nthu na Israel kekhwewa, Apvüwa Kekinyijjen wi wa ketenlen sala lalali khoula akhwisa ketenthu ti anongheben.

³⁰Apvüwa na anyi tsüdila ma ajenkeben hhaiwa tsü za nu ma leben ketsu tsü chü thsüben. Ciwi annikeqhe, atsankeshigü, aghayi, nu atsan na shathi ntsa ghoben.

³¹Assiriya nyithu na Apvüwa hhai zaya nu ma leben ketsu kemeten chükeya wi qhethiketen saaben.

³²Apvüwa na mathu kihhe neng neng keben wi ma nyithu na akhwisa, apha keccü, nu harp khouben. Anyiza na ma ketanla Assiriya nyithu ssikaghashen ben.

³³Matsü kesie wa kesa wi Assiriya kadimiwa mecang le kesalina apen kiden ketheng kesü wi anni sa ntsa pi theng. Tsüna dhu nu meza ntsa, nu achan pi misikhhali nbonkitheng. Apvüwa na annikeqhe hathakessashi pi tsü mecang thsüaden .