Read Northern Rengma Naga ISAYA 31 Bible Online

ISAYA 31 - Northern Rengma Naga bible

ISAYA 31

¹Ejipt wi kekiqa bha wa ketenthu na dedi tendha! Mathu na Ejipt süpahi, goru, nu gorugari kezü tsü nondiden. Isala mathu na Israel Nyiza Kemethawa tsü n-nondi nyelela ma wi kekiqa khie nten.

²Ma mangwa kuliben khe tsü chüben! Ma wan nu ketizenkesa kesun chiaben . Ma ma paketeqhewa tsü sengho anyi nkemehaithu nu mathu khwe ketenthu meten cüaden .

³Ejipt nyithu na acenpvüthu nye, mathu na anyi mele. Mathu goruthu na nyu kepa miwi nkhangki. Apvüwa na kuli shaghathu mizzatenti kezüwa na pacha, nu ma kiqa kechi mizzatenti nkekhangwa na qancaden. Manyi qho yasaben.

⁴Apvüwa na hi wi khi, “Aneni kehiethu na magha nu jishaben lela mathu na mangla sa nu ssensitemi na asa ghansen kebenwa tsü pateqhe pi bvü thsüya nben; tsüti Apvüwa Kekhang ntsawa, hi Zion Yikha khwe keben tsü teshi thsüya nben.

⁵Awa kesü na ma zza khwele kesa ghena ma ghacen miwi pighe kevüli keben tsüti Apvüwa Kekhang ntsawa na Jerusalem khwe nu hie benden.”

⁶Apvüwa na khi, “Israel nyithu, nthu na sami pi hi matang nu shun. Isala khilitsü hi wi gho nenglo!

⁷Nthu na sami ntsa nu rükatssü nu suna pi cü keya kesami tsikezhüthu pi khala keten matsü kesü na ghoden.

⁸Aghi wi Assiriya nyithu yasaden, isala anyi kekhang ghena nye. Assiriya nyi na aghi wina bvüaben, nu ma nyi pvünyithu pi nssümaghathu saaben.

⁹Mathu kadimiwa na qhethiketen sa bvü, nu kedithu na keqhethi pi mathu ji aghi khangthsü teshiaben .” Apvüwa, nyu na Jerusalem wi ma kinyi nu ma nni na ciwi ahhansha kesathu tsü mecang kebenwa na khidha.