Read Northern Rengma Naga ISAYA 32 Bible Online

ISAYA 32 - Northern Rengma Naga bible

ISAYA 32

¹Matsü pahan wi kadimiwa kesü na mehaicu kesa pi kekhang sen, nu mizzatenti ccülikesathu na ajühtsentsa sen nu anyithu nonccaden.

²Mathu kesüsü tsüdila ameghü wi kuthi keya nu caghamo wi shengten keya ben ti saaben. Tsüthu tsüna ayyikeshü wi atssü na lle keben, nu aghang nkeshigü yyi wi alon keti kekhwen ti saaben.

³Mathu nyon nu akhuna sha pi anyithu na nsenthu keyishü ghena hie benden.

⁴Mathu na nyu mehiecha sa nbendha, isala ma jjügi chüti nu kuliben, nu mangwa meshen ben khe tsü khiben.

⁵Thola kejüphon nyi kesü pi kenyuwakü le nmeshen, nyelela ketesü kesü pi atsentsa nyi le nkhidha.

⁶Kejüphon kesü na kejüphon jüh khi nu nkemehaithu tsü sale meshen shaghaden. Ma mangwa sa nu mangwa khiten khe tsüna Apvüwa kimenniden, nu ma khiela anyi kaghamathu ghanja cü nu pi dighe kebenthu jjü thsü nten.

⁷Anyi kejüphon kesü tsüna nmehai nu nkemehai tsü saaden; ma milikemesa cho sapi ketha-u yasa nu mathu yala mathu kemeshon nmu thsüla khenden.

⁸Isala kenyuwakekü nyi na atsentsawa kuli nu kemeshonwa ghena zükeqhe ngan benden.

⁹No nza milali nu leben güccü nsala hang ketenthu, hi mangwale khiben khe kina chilo.

¹⁰Nthu na khili anonkwen ben, isala vvüthi hathansha wi nthu na kemeshentsse bi lakeya nkemi ghena accükwenshü ben.

¹¹Nthu na milali nu leben güccü nsala hang ghodha; isala khili tsü messi pi kedheggü yalo! Nthu thsümeni khupi nu athsüqae pi ageshi qhan yalo.

¹²Nthu leben güccü nu aleben whenglo, kepaghenanye ayyi kemehai nu kemeshentsse lli na yasadha,

¹³Aghazü nu ataqaethu na inyi yyi wi shigü bendha. Anyithu na hang pi anonghe keten jjenthu nu ma samvuthi kesa nyunutiwa ghena qai yalo.

¹⁴Kadimiwa jjenthu nu ghazen nyunutiwa lela yishatha saaden. Ajjen tsüthu vüketheng khweti la yasa khiaben . Aghang gadathu na ciwi kegoe nu khaghanenithu na mathu tsse yadsa ben.

¹⁵Isala Anyiza na kheneng kuti ma ghamu kesun pi ithu miwi chiden. Ayyi nkemehaithu na mehai nengya nu cencü-macü kejon pi yang dsaya ben.

¹⁶Ayyi tsüwa wi kahe wi lela ketsatan nu kemeshon kuliyaden.

¹⁷Kepaghenanye tsüdila kemeshonwa tsü saaben, anuphan wila kecca nu keyazi na ben yaben.

¹⁸Anyiza nyithu na leben ketizensa nben nu mathu jjenku wi lela cca nu yazishu ben yaden.

¹⁹(Isala ayinong wi aghayica nu anyunutiwa lela kecensa piaben .)

²⁰Kahe wi lela atssü kejon ben nu yang dsaya, gada nu amesüsi ghena amou kemehai ben keya wi anyi tsüdila khatila anonghe ten nu!