Read Northern Rengma Naga ISAYA 37 Bible Online

ISAYA 37 - Northern Rengma Naga bible

ISAYA 37

¹Kadimiwa Hezekiya na mathu jüh zaya meyi, ma thsümeni mezüqhe nu aleshithsü mphiya, nu Apvüwa Kekinyijjen wi dua.

²Ma kadijjen kehie jawi kediwa Ekiakim; ajüh kekaghatenpen wi kezhüwa Shebna; nu keqhaikedithu keqhaiwa kesun pi atusenjüh-kechüwa Amoz tsa Isa wi chi. Mathu la aleshithsü mphi den.

³Ajüh hawa ha na mathu na pi Isa cülo khuchi: “Nansü ha agükeccü tsathang; ithu na kemeden muya, nu kejüghe yaben. Ithu na nza kesü na pvüghale ben-ni ma kekhang nmila keben ti le.

⁴Assiriya kadimiwa na ma benchü kediwa kesun pi hang kebenwa Anyiza kimenni thsüben. Apvüwa n-Nyiza ya kekimenni jüh ha kina chi nu kemeten pi ajüh ha kekhithu kecüwa salo. Tsalina Anyiza wi ithu hang kebenthu ghena khie chilo.”

⁵Isa na Kadimiwa Hezekiya ketsijüh mukeya wi,

⁶ma khineng kechi jüh ha kesunchi, “Assiriya nyithu ya Apvüwa na no hangshaya nbenle kekhi tsüpi no npateqhe thsü lalo kesa no kizaben.

⁷Apvüwa na Assiriya kadimiwa ya ajühjüwa kesü zaya nu ma diyyiwa wi wa neng thsüaden, nu Apvüwa na ciwi nyu ya ma pathi thsüaden .”

⁸Assiriya nyi kediwa na mathu kadimiwa na Lakhish teshi nu wan tsü kete wi Libnah nyunutiwa ssikaghashen bendha le kesa chüya; tsalina ma ciwi ma ssinu keccünengli le wa.

⁹Sudan wi kadimi Tirhaka na Ejipt süpahizi ssinu mathu ssikaghashen gho tenle kesa ketsijüh na Assiriya nyithu cua. Kadimiwa na ajüh ha zakeya wi lesü kesü zhü pi Hezekiya,

¹⁰Judah Kadimiwa kiza thsü, “No nondi keten cenpvüwa na no ikwen wi duya nbenle no kizadha, isala tsü ya no mechu nsa thsüla.

¹¹Assiriya kadimi kesü na diyyi kesü le kesü lela yasale meshenyathu khati saaden khe no zayadha. No bvüya benle meshen ben nu kwe?

¹²Ibamyithu na Gozan, Haran, nu Rezef nyunutithu yasa nu Telassar wi hang keghowa Betheden nyi pathia, nu mathu cenpvü kesüla mathu hangsha meya.

¹³Hamath, Arpad, Sefarvaim, Hena, nu Iva nyunuti kadimithu na khiewi ben nu?”

¹⁴Kadimiwa Hezekiya na nyilothu wi lesükezhü tsü khupi si. Tsaseng wi ma Kekinyijjen wi wa lesükezhü tsüpi Apvüwa tuwi chi

¹⁶“Apvüwa Kekhang ntsawa, Israel Nyiza, no kadipen wi Cherubim miwi donki ketenwa, no ketan Anyiza le, ayyi tsüdi wi kadiyyi tsüdila sen ketenwa le. No atssan nu ayyi sachi.

¹⁷Tsalina Apvüwa, ikhang kekhie kina cü nu mangwa na ikhang miwi kuliben khe ghangchilo. Sennakherib na khipi n-nyan kimenni keben tsüdila kinachilo, hang kebenwa Nyiza.

¹⁸Apvüwa, Assiriya kadimithu na mizzatenti kejon yasa, nu mathu yyi pi mangla nkenye ceng thsüle kesa ithu na chüben,

¹⁹nu mathu cenpvü atsentsa nkenyethu tsüpi mecang, isala tsüthu tsüna anyi na achan nu alon pi atsikezhü sakeya ketan.

²⁰Tsalina Apvüwa ithu Nyiza, Assiriya nyithu kwen wina ithu kikasha cülo, isanu ayyi wi mizzatenti tsüdila no ketan Anyiza le kesa chüya thsülo.”

²¹Tsaseng wi Isa na ketsijüh kesun pi Kadimiwa Hezekiya wi chi nu ma kizala kadimiwa kekhie kina cünu

²²Apvüwa na hati khi benle kiza, “Jerusalem nyunutiwa na no nkhichila no nankeqhe benle, Sennakherib.

²³No thowa kimenni nu nkhichila ten nu? No Israel Nyiza Kemethawa, hi ha nkinyiküla ghodha.

²⁴No nmaghathu kesun pi hi wi chi nu ituwi kapvüla no gorugari tsüdi ssinu Lebanon Yinong kemisi ntsa tsüdila nkayale khi. No sedar chan kesie ntsa nu sipress chan kemehai ntsa shüchi, nu ayinong non ntsa wi lela cuyale khi nu kapvü.

²⁵No asang yyi wi atssükhang chhü nu atssü jjü, nu no süpahithu ccü pi Nil Ghaku cüteqhale kesa kapvüden.

²⁶“Hi kheni wina hathu ha kiden ghole kesa no nza kwe? Nu hi khili tsü sa ghoben. No ya khwetivü ketheng nyunutithu yasa nu dedi thsüale kesa ghena hi kekhang pi no cüle.

²⁷Ciwi kahang nyi na kekhang nmi; mathu na messi pi amansa wadha. Mathu na alli wi aghang nyelela ajjen mili wi kepagha shigü keben nishu wiwa ameghü kisa na gho tsü mo kechi ti sadha.

²⁸“Isala hi no mangwa sa nu khiewa ten khe ncüki tsüdila chüben. No khatila nlebentsu nu hi matang khe hi chüben.

²⁹Hi nlebenketsu nu kekapvü tsü zayadha, tsalina hi khili adhasü pi nmitsan vüya nu apang kebhenji pi npang bhenya nu no zansen nu no kaghalen wi wha neng tendha.”

³⁰Tsaseng wi Isa na Kadimiwa Hezekiya wi khi, “Hawa hana kulile keben zensu. Kisü nu vvüthi wi no aghang bi dsaben, isala vvüthi kawa wi yangdsaketen macü pi chi nu wwiya, nu kemeshentsse ton sheng nu ma bi ladsa yaben.

³¹Judah yyi wi anyi hang keyathu na achanton ma ghazan na ayyi kedhu wi chandu ma bi bün keya ti hang pi mehai yaden.

³²Anyi Jerusalem wi nu Zion Yikha wi kebenthu hang keya nyi na ben ben, kepaghenanye Apvüwa Kekhang ntsawa na hati sa thsüale kiden pi theng.

³³“Hawa ha Apvüwa na Assiriya kadimiwa ghena khikechi: ‘Ma anyunuti hawa wi duya nben, nyelela alakusü kesüla pi gaya nben. Süpahi atsonhi kepvü kesüla anyunutiwa tsü tetsaki ghoya nben, nu aghikehiepen mangla zhü pi tsü vü nben.

³⁴Ma anyunuti wi ndughola ma kegholen wi wha neng shaben. Hi Apvüwa, hi khidha.

³⁵Hi anyunuti hawa sheipi nu khweyaden, hi ketanla hi kekinyikü ghena, nu hi imaghawa David wi khishi ketheng tsü ghena.’ ”

³⁶Tang nyilo kesü na Assiriya nyithu kemnanpen wi wa nu süpahi 185,000 pathia. Ghanenwa wi mathu tsüdila shü keben mu!

³⁷Isanan Assiriya kadimiwa Sennakherib na kheneng sen nu Nineve wi wha.

³⁸Ghanan kesü wi ma ma cenpvü Nisrok kekinyijjen wi kinyi keben ma tsa keni, Adrammelek nu Sharezer manyi na njünnu pi ma süthi thengnu Ararat yyi wi kuthi bvüa. Ma tsa kepawa Esarhaddon na ma shiwa sa kadimi saya.