Read Northern Rengma Naga ISAYA 39 Bible Online

ISAYA 39 - Northern Rengma Naga bible

ISAYA 39

¹Tsü tsüwi Babilon Kadimiwa, Baladan tsawa Meroda na Kadimiwa Hezekiya na naa benle kesa zaya, tsalina ma lesükezhü nu aju pi kesunchi.

²Hezekiya na nyilothu ssiya nu ma keben-keyeng rükatssü, suna, cüdemvu nu hankedemvu, nu ma süpahi tsanqai tsüdila pi mathu ccüca. Ma ma kebenjjen nu ma kadiyyi wi mangla pi mathu nkeccüca nmila.

³Tsaseng wi atusenjüh-kechüwa Isa na Kadimi Hezekiya wi wa nu ma keü, “Anyi hathu ha na khiewa na gho nu mangwa le no kiza nu?” Hezekiya na khineng, “Mathu na diyyi lenkesie wi Babylonia wina ghole.”

⁴Ma khi, “Mathu na kadijjen wi mangwa mudha nu?” “Mathu na pala tsüdila mudha. Keben-keyeng wi hi mangla pi mathu nkeccüca nmidha.”

⁵Tsaseng wi Isa na Kadimiwa kiza, “Apvüwa Kekhang ntsawa na kekhi na

⁶matsü kesü na ghoden, nbaqhaithu wina keben saghu sengho nansü kecu nu no kadijjen keben tsüdila pvü nu Babilon wi wa den. Mangla teshi nben.

⁷ Ngwo wina keshhugho nshicübvügha pahan ssi wa Babilon kadimiwa kadijjen wi kedithu sa nu kekuli sa thsüaben.”

⁸Kadimi Hezekiya na chükeya na tsü ma jjügi na ma hang keben tsüwi yazishu kesa nu kecca benten le kesa khiben le sa, tsalina ma hati lunengchi, “No na Apvüwa wi ketsijüh pi hi kecü tsüna mehai le.”