Read Northern Rengma Naga ISAYA 42 Bible Online

ISAYA 42 - Northern Rengma Naga bible

ISAYA 42

¹Apvüwa na khiben, “Hi ma satezü cü keten imaghawa na hewi ben, hi ma kessi keyawa, nu ma miwi hi kenen ben ketenwa tsüle. Hi ighamu pi ma pong cüdha, nu ma ajühtsentsa sen nu mizzatenti tsüdi miwi ghoaben .

²Ma jisha nyelela ma hhai sa nben, nyelela atonti wi ajüh misikhhali khi nben.

³Ma ahuphon kesü ncü kebenwa tsü lela pashüa nben, nyelela ahula khwenkhwe kebenwa tsü la patenen nben. Ma atsentsawa tsü npi khangkeya chu khiben.

⁴Ma ma kaghang nyelela kempvüza nmila sa nben; ma ayyi wi jühtsentsa kulishi chiden. Ayyi temeja wi kebenthu na ma pi nyu kesansijüh tsü yamvu ntsa hieben.”

⁵ Anyiza na atssanthu sachi, nu tsüthu zankechuchi; ma ayyiwa nu ciwi hang kebenthu tsüdi tsi sachi; ma kahang nu kahang hathakissa pi ayyi wi anyi tsüdila cü. Apvüwa Anyiza na ma maghawa wi khiben,

⁶“Hi Apvüwa, hi no ciya nu kekhang pi cüdha, atsentsa saben kesa ghang thsüle kesalina. Nmiwi na hi anyi tsüdi ssinu cenkethenjüh kesü saaden; nmiwi na hi kewegü sengho mizzatentithu cüden.

⁷No anyon nkemu nyon sha chiben, nu kejang wi atssüzü sa kebenthu lisha chiaben.

⁸‘Hi ketan Apvüwa n-Nyiza. Acenpvü kepathu na inyankethang pi gishüya nben; hi atsikezhüthu ya hi keseng pi gishü yathsü nten.

⁹Hi npi wina khi kethengthu tsü atsentsa sacen ghodha. Khili pala ketheü pi no kizaden, tsüthu npi sa keshagha wina.’ ”

¹⁰Akhwi ketheü sapi Apvüwa wi chilo; ma keseng khwisalo, ayyi tsüdila! ma senglo, nthu atssükedone wi wa ketenthu; ma senglo, atssükedone wi kahangli kebenthu tsüdila! Akhwisalo, ayyi temeja wi kebenthu, nu ciwi kahangthu tsüdila!

¹¹Ayyikeshü nu ciwi anyuti tsüdila Anyiza senglo; Kedar nyi ya ma seng thsülo! Sela nyunuti wi hang kebenthu ayikhathu shoni wi ben, nu anonkeghe ghena jishalo!

¹²Ayyi temeja wi hang keben nyithu ya keseng nu anyankethang pi Apvüwa cü thsülo!

¹³Apvüwa na aghikekhang nyi ti shula kesaliden; ma aghi ghena kidenben nu wa mvuben. Ma aghi thangchi, aghi ghena jishachi; ma ma ghinyi shun nu ma kekhang pi ccüca.

¹⁴Anyiza na khi, “Hi matsü kesie ccen ben wa; hi inyithu nluneng chila. Isala khili tsü kekuli tsüwa na ghodha; hi nza kepvügha wi kinaa ti maghachi.

¹⁵Hi yyishiphon nu ayikhathu yasa, nu aghanglani nu achantonthu shü thsüaden . Hi aghaku yyiketijüthu pi ayyikeshü sa, nu acücengthu tsüdila qha thsüaden .

¹⁶‘Hi inyi anyon nkemuthu ssinu mathu na kijünyi wa keten len wi waden. Hi mathu kejang sapi wegü thsüaden, nu ayyi ghagu-ghana kesa pi mathu ghena chengche sa thsüaden . Hathu hana hi khishikechithu, nu hi tsüthu tsü nteshila saaden.

¹⁷Tsikezhüthu nondi nu tsüthu pi mathu cenpvü le ci ketenthu satemeni, nu kejügheya thsüaden .’

¹⁸Apvüwa na khi, ‘Kinalo, nthu akhuna kedecuthu! Anyon nkemuthu, tetsaki ghang yalo!

¹⁹Anyi pahan na imaghawa miwi anyon nkemuki, hi kesunkechi nyilowa miwi la akhuna kedecuki ben kwe?

²⁰Israel, no ji mtsü mudha, isala no mangwa chüshiya nu? No zaya keten akhuna pvüden, isala no ntsakhiwa khati zaya nu?’

²¹Apvüwa tsüna nyu hangsha cü mvuthi ketenwa Nyiza, tsalina ma khukechi yenwa, nu kesansijüh tsü sapi misi, nu ma nyithu na tsü nyuwakü thsü mvuden.

²²Isala khilitsü nyu na mathu ji shu pvü bvüdha; mathu pi ayyiku non wi khen, nu atssüzüjjen wi kuthidha. Nyu mathu ji teng nu shupvü bvüdha, nu thola mathu kikasha keya nmila.

²³Nthu kesüla ha kinachi tenla nu? Khili nten nthu na kiden-kesha nu kina tenla nu?

²⁴Thowa na Israel pi nyu tsanqai keshuthu cüdha nu? Tsüna Apvüwa, ithu na ma matang, nu ma tuwi sami kesawa tsüle! Ithu na ma ithu ya hang thsü mvu keben ti sa hang meya nu ma pi nyu kesansijüh pi ithu kecüthu tsü la nie meya.

²⁵Tsalina ma ithu ya ma leben ketsu kekhang chüya, nu aghi kedhu wi ketizensa thsüa. Ma leben ketsu na anni ti Israel yyi tsüdi mecang, isala ithu na mangwa saben khe nchü; ithu na ciwi mangla chü meyatha sa.”