Read Northern Rengma Naga ISAYA 44 Bible Online

ISAYA 44 - Northern Rengma Naga bible

ISAYA 44

¹Apvüwa na khi, “Khili kinalo, imaghawa Israel, hi kessikeya nyi, Jakob shicübvüghathu.

²Hi Apvüwa no sahangkechiwa tsü; hi no kepvügha tsü wina no kiqa chidha. Nmessila, no imaghawa, ghali keten kessi keyawa.

³‘Hi atssü pi ayyi shangshang kesapen wi chi nu ayyi keqha wi aghakutssü na lle shhugho thsüden. Hi ighamu meyisha pi ntsangathu miwi chicüden, nu hi kemihhi pi nshicüthu miwi chiden.

⁴Mathu na atssüpen wi aghang ti shigü shagha, nu aghakutssü lle keben kete wi willow chanton ti saaben.

⁵“Anyithu kesüsü na khiben, ‘Hi Apvüwa ji.’ Mathu na gho Israel nyithu gweghe yaben. Anyi kesüsü tsüdila Apvüwa nyan pi ma hacü wi zhüki pvü ben, nu ma ketanla ma pi Apvüwa nyile khiben.”

⁶ Apvüwa, Israel miwi kekhang sen, nu khweti ketenwa, Apvüwa Kekhang ntsawa na hati khiben, “Hi atuwa, asakhenwa, nu hi ketan Anyiza; acenpvü kepa wi nmi, isala hi ketan.

⁷Anyi kesüla hi kesa ti saya kwe? Thowa na npi wina hathu ha saaben kesa, nu matsü adechhü na wa asakhen kecu khiya nu?

⁸Inyithu, nmessi lalo! Kheni tsü wina gho khili kecu nthu na chüben, sagho keten tsüdila hi matsü npi wina khitheng, nu nthu na hi chüzathu. Acenpvü kepa wi kesüla ben kwe? Hi khiela za nketen acenpvü kekhang pahan ben kwe?”

⁹Tsikezhü cüh ketenthu tsüdila ma men nmi, nu mathu meshen pi mehai ntsa keten tsüdila kaghacang. Acenpvü hathu kinyi ketenthu na anyon nmu nu mangla nchü, tsalina mathu kejüghe yaben.

¹⁰Amighe pi atsikezhü cüh nu acenpvü kesü ti tsü kekinyi tsüna kekiyi nmi!

¹¹Anyi kesü le kesü lela tsü kinyi ketenwa kimenni yaben. Atsikezhü cü ketenthu tsüna anyi khe mangla nye. Mathu ya gho nu khi thsü nanlo, mathu na qhethi nu kejüghe yaben.

¹²Amighe kecü na amighe kesü khuya nu pi anni wi mecang nu pi kuliden. Ma hacü kezü tsü ya kejenji pi amighe tsü wheng pi matsi shhughoya thsüden. Ma kuli benla nu ghama, dighe, nu ma nchaladen.

¹³Achankecüwa tsüna achan ketegüden. Ma kezhülon pi matsi qheya, kecütsanqai pi tsü hoya, nu pi ma jjen wi chile kesalina tsü cü pi anyi tsi mehaitsü kesü sayaden.

¹⁴Ma pi pala cüle kesalina ayinong wi sedar chan nyelela ayang chan, sipress chan kesü shüchi yaden. nyelela ma sedar chan sheng nu atsangho pi tsü ten pi shigü keya hieden.

¹⁵Anyi na achanton kesü witsü pahan pi mecang nu pahan pi atsikezhü ghena senden. Tsü pahan pi annisa kahan nu amesa gü; ma kephankhhi pahan pi acenpvü tsi cü nu tsü kinyiden.

¹⁶Achan tsü pahan pi annisa nu asa gü pi dsa nu anonkwen den. Ma anni kahan nu khi, “khatila mehai nu yengdha nu! Anni la mangtila mehai nu!”

¹⁷Achan tsü pahan pi atsizhü nu kukedu tsü kinyiden. Ma tsüwa wi khie nu khiden, “No icenpvü, hi hangsha cülo!”

¹⁸Tsüti kesa nyi tsüna mathu na mangwa saben khe chüyale kesa na dhu mtsü. Mathu na atsentsawa wi mathu nyon nu leben pabhon yaden.

¹⁹Atsikezhü cü ketenthu na hati kekhiu la meshenya nten, “Hi achan tsü pahan pi mecangdha. Hi anni mihi miwi amesa gü nu asa gü nu tsü dsadha. Nu kesentu tsüpi atsikezhü cüyale. Nu hi kukedu achan kedhi kesü kinyi ben man!”

²⁰Tsüna ayyiwen dsa keben makesü. Ma kejüphon kemeshen na ma padejaya nu mangla sakeya nmidha. Ma ma kwen wi sen keben tsikezhüwa tsüna acenpvü kesü nyele kesa meshenya nbendha.

²¹Apvüwa na khiben, “Israel, ha meshen yalo; no imaghale kesa meshen yalo. Hi no pi imagha sathsüle sahangchi, nu hi mangla sa nu no maliya nben.

²²Hi no kesamithu teshi pi akulukeshü ti bvü thsüdha. Hi wi kheneng gholo; hi no hangshaya ketenwa tsüle.

²³N-nonkeghe ghena jishalo, no atssanthu! Jishalo, ayyikedhu wi kebenthu! nonkeghe ghena jishalo, ayikhathu, nu ayinong wi achantonthu tsüdila! Apvüwa na ma nyi Israel hangsha, nu ma kedi pi ccüca chidha.

²⁴‘Hi Apvüwa, no hangshawa; hi no sahangkechiwa tsüle. Hi Apvüwa, pala tsüdi sahangkechiwa. Hi ketan atssanthu zankechu chi; Hi ayyi sakechi wi thola hi nkiqa.

²⁵Hi atusenkekhithu sapi kejüphon sa thsü, nu ghotsi kesithu na npi wi khi ketheng tsü sacen meya thsüla. Hi kemetsathu jüh khiteshan, nu mathu kemetsa tsüna kejüphon le kesa pi ccücaden.

²⁶Isala imaghawa na npi wina khi, nu hi kemeshen pi ccücale inyilowa kesun chithu hi kemeshen, nu npi wi khi ketheng tsü ya sacen gho thsüden. Hi Jerusalem wi anyi na gho ciwi hang nengden, nu Judah nyunutithu tsü mathu na sapfü benle kizaden. Nyunuti tsüthu na kededi wina shagha neng ben.

²⁷Hi ajüh kesü khichithu atssükedone keti ya keqha thsüaden.

²⁸ Hi Sira kiza, “Ighena kekhang sen ketenwa tsüna no; hi no mangwa sa thsü mvuben khe no tsü saden: no Jerusalem sa nenglo ahza khuchi, nu Kekinyijjen donbvü sheng thsüben.’ ”