Read Northern Rengma Naga ISAYA 46 Bible Online

ISAYA 46 - Northern Rengma Naga bible

ISAYA 46

¹“Ha Babilon cenpvüthu ghena asakhendha! Nyu na Bel nu Nebo manyi kinyi gho, isala khili tsü manyi tsikezhü pi gada khhi sadha; aghangsa nkezüthu ghena akhhi kekiyan sadha.

²Tsikezhüthu na mathu ketanla mathu hangshaya nben; mathu khuya nu pvü bvüdha. Ha Babilon cenpvüthu ghena asakhendha!

³‘Ijühkinalo, Jakob shicübvüghathu, inyi nbvüla kebenthu tsüdila. Hi nthu kepvügha tsü wina nthu noncca ghodha.

⁴Hi nthu Nyiza nu hi nthu nonccayaden, nthu na qhai nu alikepun tsü kecu wila. Hi nthu sahangchi nu nthu noncca ben den.

⁵Apvüwa na khi, “Nthu na hi pi thowa ghape le ben nu? hi ti kesa pahan ben kwe?

⁶Anyithu na mathu jula lishü, nu suna pi meyisha; mathu na kewhuchan pi rükatssü whuden. Mathu na suna kecüthu melli pi acenpvü kesü cü thsü; isanu mathu na kukedu tsü kinyiden!

⁷Mathu na tsü pieki pi adepfü wi keleya nu bvüden; mathu na tsü pi don nu ngan thsüden, nu kuli meyala maben ben den. Anyi kesü le kesü lela tsüwa wi khie lela luneng cü nten, nyelela kededi wi ma hangsha cü nten.

⁸‘Ha meshen chilo, nthu kesamithu; hi mangwa sachi khe meshenchi nanlo.

⁹Matsü kesie wakea wi mangwa sa khe meshen nanlo; hi ketan Anyiza le kesa chüya, hi ti kesa kepa wi nmi le.

¹⁰Adechhü wina mangwa saghoten khe hi npi wina khi pi thengdha; matsü kesie wakea wi mangwa saten khe hi khi pi thengdha. Hi kemeshen tsü khiela ncenla sa nben, nu hi samvu keben tsüdila saaben kesa khidha.

¹¹Hi anyi kesü na nishu wina gholo ci chiden; ma amumu ti mbhi ntsa dugho ben, nu hi mangwa meshen khe tsü sacen shaben. Hi khidha, nu tsü sacen shaben.

¹²“Lebenkedhu nyithu, ijühkinalo, khangkeya tsüna kelensie wi tenle meshen ketenthu.

¹³Hi khangkeya tsathang tsü sen nu tetsaki gho tendha, tsüna kelensie wi nyedha. Hi khangkeya tsüna minu nben. Hi Jerusalem hangshayaden, nu Israel kenyuwakü sen nu ciwi ghoden.”