Read Northern Rengma Naga ISAYA 47 Bible Online

ISAYA 47 - Northern Rengma Naga bible

ISAYA 47

¹ Apvüwa na khiben, “Babilon, no kadipen wina dugholo, nu ayyinikhu wi donkilo. No kuti wi pvünyimetha, nyunuti kesü nyu na ma nka nkeya ti sa, isala no ccatssü nu biye sa nbendha! No khili tsü nyu nssümagha kesü sadha!

²Kenyeggülon pakevüli chilo! awheng nyeggülo! N-mmi keshangthsü khua! Nthsü tsikemehai tsü khushilo! no kekughong zankiya nu aghaku pvüdhilo.

³Anyithu na no kimessü tsü muden; mathu na no kimenni nu kejügheya keben muden. Hi ajukhiyaden, nu thola hi khenya nben.”

⁴Israel Nyiza kemethawa na ithu lisha chi cüdha, ma nyan na Apvüwa Kekhang ntsawa.

⁵Apvüwa na Babilon wi khi, “Kejang wi ccen donki benlo; mathu na no khupi mizzatentithu kadijjawa le ci nbendha!

⁶Hi inyithu miwi aghepvüyadha; hi mathu pi iji nsala kea ti sa: Hi mathu pi no kekhang kekhu wi chi, isanan no nanketizen pi mathu nccücala; keqhaithu tuwi lela jükhajügha sa.

⁷No tsü keshüthangla kadijja saaben she meshen, nu pala hathu pi nleben wi nchi, nyelela tsüna khati nmila ben khe nmeshen.

⁸ ‘Ha kinalo, no kenen sa mvu ketenwa, no yazishu nu qan benle meshenden. No Anyiza kadi cu le khiden, nu thola no ti kesa nmidha le saden. No khiela denyi kesü sa nben le, ntsanga nmila ketizenkesa ntsa sa nben le meshen.

⁹Isala matsü kesü nu ghanan kesü jüwi tsü keni tsü saaden. No kedema tsüdi senten lela, no nwuba nu ntsangathu nmiladen.

¹⁰“No no nkemehai witsü apvü-nsala ben den; Thola no mu nben she meshen. No kemetsa nu no palakechü na no ssideja, nu no ketanla no kiza, ‘Hi Anyiza, thola hi ti kesa nmidha.’

¹¹Kededi na nmiwi ghoaben, nu no kedema kesütanla tsü khenya nben. Keyasa na zuli nmiwi ghoa tendha, no nman wila nkeman keyasawa tsü!

¹²No kedema cho kemehai tsüdila sen benlo; no kepvünyi tsü wina sen keghowa tsü. Tsüthu tsüna pala pahan wi no kiqaya benla nchü; no nghinyithu pateqheya benla nye khe.

¹³Nyu na ajüh kejon pi no sansiben lela no nkhangladha. Nthu jawi ghotsi kesithu na gho nthu hangshaya thsülo, Ghotsi cüki si ketenthu, atssan shha kepapa kesa tsiton, nu asha asha wi nmiwi mangwa saaben khe pi no kiza ketenthu.

¹⁴‘Mathu na amatsi ti sa, nu anni na mathu mecang shaben! Mathu ketanla mathu hangshaya nben, annikeqhe na mathu ghena yeng mtsü shaben, anni mihi kesütanla kahang meyala ben.

¹⁵Mathu na nthu ghena kemehai sa ketenwa tsüna tsü le, nthu kahang chu ssinu kecenkinali keten tsüna ghotsi kesithu tsü le. Mathu tsüdila nthu teshi nu papa kemeshen sa bvüaben, nu nthu hangshaya keten thola nmila ben.’ ”