Read Northern Rengma Naga ISAYA 5 Bible Online

ISAYA 5 - Northern Rengma Naga bible

ISAYA 5

¹ Hi akhwi ha sa keben jüwi kina chilo, ipvüshangwa na ma kemeshentsse lli kesaki khwi: Ipvüshangwa na kemeshentsse lli kesü ben ayyi kenyan ntsa yikha miwi.

²Ma ayyi chhü nu alonthu ghaka pia; ma kemeshentsse ton kemehai ntsa pi sheng. Tsü hiele kesalina apen kesü zhü, kemeshen bi kenyeggü pen kesü chhüya. Ma kemeshen bi nyün keya hie, isala mabi tsüdila ssimaqhe bün cü.

³Tsalina ipvüshangwa na khiiben, “Nthu anyithu, Jerusalem nu Judah wi hang kebenthu, hi nu hi kemeshentsse lli ishinyi jühwi khati khe ghannan lo.

⁴Hi alli ghena kesau nsala kesa pahan ben kwe? Isathu, tsüwa na mangkesa na hi yamvu keben ti nyela mabi ssimaqhe bün cü nu?

⁵Hi hi kemeshentsse lli ghena hati saaden; hi tsü kaghapeng chan sen nu bvüaden, nu aghapeng tsü phegheaden, nu aghangsathu ya tsü dsa nu tsü cütekeda thsüaden .

⁶Hi kepaghathu ya tsü shigübhon thsüaden . Hi tsü sametha nyelela tsü chhü ntendha, tsüti kesawa nyela ataqae nu aghazüthu ya tsü kejibhon thsüaden . Hi akulu lela atsangho pi tsü miwi nchi thsüla ben.”

⁷Israel na Kekhang ntsawa Apvüwa kemeshentsse lliwa tsü le; Judah nyithu na ma pi sheng kechi kemeshentsse tonwa tsü le. Ma mathu na kemehai kuli benle ghang, isala mathu na nyu pathi. Ma mathu na kemeshonwa saben le ghang, isala mathu nchalakesathu na kemeshonwa tsü nmvula qaiben.

⁸Nthu na dedi tendha! Nthu na ajjen nu alli shü kayi pi nthu keben tsü wwa neng den. Thola apen khiewi la hang nkeya matsü na ghoden, nu nthu ketan ayyi ciwi hang den.

⁹Kekhang ntsawa Apvüwa na khi keben hi za, “Ajjen keti nu kemehai hathu ha yasa pi nu ghacang ben.

¹⁰Alli hekter tagha yyi wi kemeshentsse kebün tsüna kisengtssü liter tazen ketan misügü yaben. Amacü liter meza nu achentazen pi kechi wi ma bi liter tagha nu tazen ketan layaben.”

¹¹Nthu na dedi tendha! Nthu na kisengtssü jjü le kesa ghena mitu na shagha den, nu jjü pi adina pvü nu ghaja thangthang ben waden.

¹²Nthu na kemishu pen wi harp, tamborin nu lalali khou nu kisengtssü la sen den. Isala nthu na Apvüwa na mangsa ben khe chüshiya nten,

¹³tsalina nthu pi atssüzüthu sala ssi bvüaden . Nthu ccülikesathu na khhwenthiaben, nu anyithu na dighethi shüaben.

¹⁴Keshü yyiwa na mathu mehiechala ma pang ka bendha. Jerusalem wi kedithu nu anyi jümu nponmeghe ketenthu na wa ciwi duaden.

¹⁵Tsüdila kejügheya, nu kepvü nyi tsüdila kimenni thsüaden .

¹⁶Isala Kekhang ntsawa Apvüwa na kemeshon kekuli sa nu ma kedi pi ccücaden, nu ma ma nyithu jühkekaghaten wina ma kemetha pi ccücaden.

¹⁷Anyunutithu yasa kesa pen wi khaghaneni zzathu na atsse yaben, nu aneni zzathu na amou muya den.

¹⁸Nthu na dedi tendha! Nthu na nthu kesami wina pvüssi shhu meyaladha.

¹⁹Nthu na khiiben, “Apvüwa yala kaghaji nu ma mangwa sale ben khe sa thsülo, ithu ya tsü muya le kesalina. Israel Kemetha Nyizawa ya ma meshen kebenthu sashhu thsülo; ma leben wi mangwa ben khe ithu na ghangchiden.”

²⁰Nthu na dedi tendha! Nthu na nkemehai pi kemehaiwa le khi, nu kemehai pi nkemehaiwa le khiden. Nthu na kejang pi kethang sa, nu kethang pi kejang saden.

²¹Nthu na dedi tendha! Nthu na metsa nu achopvü ntsawa le meshen den.

²²Nthu na dedi tendha! Kisengtssü kejjü pang kekhangthu! Kisengtssü kekhang kethoughu nu kempvüza sa nmessila jjü ketenthu!

²³Isala alaa kesü ghena sazzi kesathu teshi pi bvü thsüa, nu nthu na nkesazzi nyi tuwi kemeshonwa nsachi laden.

²⁴Tsalina khili tsü amatsi nu achacha na anni wi llughe nu mecang keten ti, nthu ghazan na bighe nu nthu kepvü na qha nu mo pi bvüaden, kepaghenanye nthu na Kekhang ntsawa Apvüwa, Israel Kemetha Nyizawa na ithu sansi kecü tsü meyaladha.

²⁵Apvüwa na ma nyithu miwi alebentsu nu kemeten pi ma nyithu cüle ma kwen zankiyadha. Ayikhathu na kuliden, nu keshü kamangthu pi alentonti wi chiden, isalela Apvüwa leben kekha na ma sakhen sa nben, Tsaseng wi lela kemeten pi cü le ben.

²⁶Apvüwa na azensu kesü sapi temeja wi mizzatenti kesü ciben. Ma sü-u sapi ayyi kenten wina gholo mathu ciden. Tsüti mathu na mbhi nu kaghaji ntsa ghodha!

²⁷Mathu na thola agwo n-naa; thola accü nmeshü. Mathu na thola nkumu nyelela njen, ageshi keqhan kesüla keqo nsa; accüguwenli kesüla pvüdhi nsa.

²⁸Mathu lakusü na dighe zenzen nu mathu lamugho ga le bendha. Mathu goru mezzen na awegüsalon kekhang ti, nu mathu gorugari na khutsuekevü ti kevüliben.

²⁹Süpahithu na ssensitemithu na ghamo nu aghangsathu ghangya nu thola tsü bighi meyala pie bvü keten ti.

³⁰Tsü tsathang kegho wi mathu na atssükedone hhai ti Israel miwi ghamo ben. Diyyiwa ha ghangchilo! Kejang nu accükwenkeshü le! Kejang na kewegüwa tsü kejibhon yadha.