Read Northern Rengma Naga ISAYA 52 Bible Online

ISAYA 52 - Northern Rengma Naga bible

ISAYA 52

¹ Jerusalem, zü nu di neng shaghalo! Anyiza nyunuti Kemethawa, njenkeben thsü mphi yalo! Anyiza nkechünyi na nkhweti jenka wi gho nengya nbendha.

²Ketheng shaghalo, Jerusalem! Ayyinikhu wina shagha no kadipen wi donki yalo! No bhen ketheng mighe ssüli tsü lisha yalo, Zion nyi atssüzü sa kebenthu!

³Apvüwa na ma nyithu wi khiben, “Nthu na nssümagha kesa wi pisa pi nthu men nsa; tsüti nthu lishüyale kesa ghena la mangla pi dhi nben.

⁴Nthu na Ejipt wi asang sa nu hang le kewa wi nthu ketanla nthu kemeshen sa; isala Assiriya na mataghang nthu ssi bvü nu mangla pi nthu ncü.

⁵ Nu khili Babilon wi la tsüti sadha; nthu na atssüzü sa, isala mangla pi nthu men nsa. Nthu miwi kekhang kesenthu na kapvü nu keshüthangla hi nkhichi saden.

⁶Ghaketen tsüwi nthu na hi Anyiza nu hi nthu ccüneng le kesa chüyaben.”

⁷ Nyilo kesü na jühtheü, kecca nu jühkemehaiwa sen nu ayikhathu pvüdhi gho keten tsüna ghang pi khatila amansa nu! Ma khangkeya pi jisha nu Zion wi khiben, “Nthu Nyiza na kadimiwa le!”

⁸Anyunutiwa ghihie kebenthu na jishaben, anonkeghe ghena gweghe jishaben! Mathu ketanla mathu nyon pi Apvüwa na Zion wi kheneng gho keten muya mehai.

⁹Nonkeghe sa jishalo, nthu Jerusalem wi keyasathu! Apvüwa na ma nyunutiwa kikashaya, nu ma nyithu leben satecca cüden.

¹⁰Apvüwa na ma kekhang kemethawa tsü sen nu ma nyithu hangsha yaden, nu ayyi tsüdila ma muden.

¹¹ Nthu na Babilon teshi metsiben, Kekinyijjen tsanqai pvü ketenthu tsüdila. Keccüna tsanqai mangla nkidhenla nthu samethaya nu bvülo.

¹²Nansüwa tsü nthu kaghajila nbvüla mehai; nthu na ghü bvüale kiden nben. Apvüwa nthu Nyiza na nthu lentsütson, nu kechhenkevü tsüdi wila nthu khweyaden.

¹³Apvüwa na khiben, “Imaghawa na ma kekuli wi mehai kayi yaden; nyu ma nyuwakü ntsa saaben.

¹⁴Anyi kejon na ma kemu wi qhethiketen sadha; ma anyi tsijjü ti la nsala.

¹⁵ Isala nansü tsü mizzatentithu na ma ghang pi amansa ben, nu kadimithu na amansa nu ajühkhi meyala ben. Mathu na khiela nkechü ji pala pahan mu nu chüshi yaben.”