Read Northern Rengma Naga ISAYA 53 Bible Online

ISAYA 53 - Northern Rengma Naga bible

ISAYA 53

¹ Anyithu na lunengchi, “Thowa na ithu kizajüh nondiya nu? Thowa na hawi Apvüwa kwen tsü mu nu?

²Ma maghawa yala aghang kesü ti ayyi keqha wi ma ghazan cha shagha thsüle kesa tsüna Apvüwa kemeshen sa. Ma ajenkeben nyelela atsikemehai nmi, nu ithu ma nenya kemehai mangla nmi. Ma miwi nyu nenya kemehai mangla nmi, ithu lepi ma wi chiya kemehai mangla nmi.

³Ithu na ma nkhichi nu ma meya mvula; ma ketizenkesa nu kinaa wi kethankehi. thola ma n-ghangchi, ithu na ma pi mangla nkenye ti sa nu ma meya mvula.

⁴ ‘Isala ithu na ketizensa kesa tsü ma saya, nu ithu na naa kesa tsü ma pvüya. Ithu na ma ketizenkesa tsüna Anyiza na kesun kechi kemeten le meshen.

⁵ Isala ithu kesami ghena ma ayisü pvü, ithu kekuli nkemehai ghena nyu ma kiccü. Ma kemeten pvü nu ketizensa kechi ghena ithu sapi mehaiyadha, nyu ma kekihhe ghena ithu sapi mehaiya.

⁶ Ithu tsüdila khaghaneni bhataghakea ti kepapa len ton bvüa. Isala Apvüwa na kemeten khhi tsüpi ma miwi chiya, ithu tsüdila kepvü qo kemetenwa tsü.

⁷ “Nyu ma metsi-meni, isala ma kethankehi nu ma satemeni, ma ajüh kesüla nkhi. Khaghaneni zza kesü pathiale ssibvü keten ti, khaghaneni kesü ssen cele keben ti, ma ajüh kesüla nkhi.

⁸Ma ghan pi ma jühkaghakhi nu ma pathi le ssi wa, isala thola ma cüki nmeshen chila. Ithu nyi kesami ghena ma pi shü thsüa.

⁹ Ma pi nkemehai nyi gweghe ashüjjen wi chi, ma pi keban gweghe vhüa, ma kesütanla nsazzi nu milikemesa kesüla nkhi lela.”

¹⁰Apvüwa na khiben, “Ma ketizen sa thsüle kesa tsüna hi kenen; ma keshü tsüna kesami teshi kecü sen kegho ghena ahhansha kesü sa. Tsalina ma ma shicübvüghathu muyaden; ma kesie hang yaden, nu ma miwi na hi kemeshenwa tsü sacen yaben.

¹¹Ketizenkesa kahang kesü sengwi, ma anonkeghe mu neng yaben; ma kaghacang wi ketizen nsale kesa chü yaben. Hi kenen saki keten, hi ma miwi hi kenen ben keten imaghawa, ma anyi kejon kemetenwa tsü pvü yaben, nu ma ghena hi mathu kesami teshi pi cüden.

¹² Tsalina hi kenyuwakü pen kesü pi ma cüden, kedi nu kekhang ntsathu jawi apen kesü. Ma aghandu ma kahang khuchi nu nkemehai nyithu kuti sa. Ma kesami nyithu kejon kuti sa, nu mathu kesami teshi pi cü thsüle kesalina kekhie sa.”