Read Northern Rengma Naga ISAYA 55 Bible Online

ISAYA 55 - Northern Rengma Naga bible

ISAYA 55

¹ Apvüwa na khiben, “Ghalo, anyi dighe kebenthu kesü le kesü lela hewi atssü na ben le! Ghalo, apisa nkemithu, asu shei pi dsalo! Ghalo! kisengtssü nu tsenitssü sheiya, tsüna nthu ghena ma men mangla sa nben!

²Mangkesa na apisa pi anonkwenya nketen ghena dedi ben nu? Mangkesa na njadedi nu ghama benten nu? Ijühkina nu hi mangwa khi khe salo, isathu nthu atsse kemehai ntsa dsa pi anonghe yaden.

³ ‘Inyithu, khili ijühkina nu hi wi ghalo; hi wi ghalo, isathu nthu kahang ben yaben! Hi nthu ssinu anuphanla ben keten cenkethenjüh kesü saaden, nu khishi pi David cü ketheng kemihhi tsüpi nthu cüben na.

⁴Hi ma pi mizzatentithu ccüliwa nu benchüwa kesü sa thsü, nu ma miwi na hi kekhang pi mathu ccüca.

⁵Khili nthu na asang mizzatentithu tsü ci chiden; kuti tsüwi mathu na nthu nchü, isala khili tsü mathu na bvü sen nu nthu wwayale ghoden! Hi Apvüwa nthu Nyiza, Israel Nyiza kemethawa, hi hathu ha tsüdi sagho thsüden. Hi kenyuwakekü nu anyankethang pi nthu cüden.

⁶Apvüwa wi kheneng gho nu ma wi khielo, ma khili nthu tetsaki keben wi ha.

⁷Gheshighenathu ya mathu kahang yen teshi, nu mathu kemeshen kemili thsülo. Mathu ya Apvüwa ithu Nyiza wi kheneng gho thsü; ma nantizen nu wan kesami teshi cüden.

⁸Apvüwa na khiben, “Hi kemeshen na nthu kemeshen ti nye, nu ilen na nthu len ti nye.

⁹Atssan na ayyi miwi misiki kesa tsüti, ilen nu hi kemeshen la nthu miwi misiki.

¹⁰ ‘Ijüh na tang wina aghola nu atsankegho na dugho ayyi tenchi keten tsüti. Tsüna yangdsaketenthu sapi shigü thsüden, nu yang nu dsale kesa ghena la macü khuchiden.

¹¹Tsüti hi khi ketheng jühwa la hi tsüna mangwa salo kesa ghena kesun chi khe tsü saaben; tsüna hi salo kesun kechi tsüdila saaben.

¹²“Nthu na anonghethi nu Babilon teshiaben; kecca wi nthu ssinu anyunutiwa wina shhu shaben. Ayikha nu yyishiphon thu na akhwisa shaghaben, nu achantonthu na anonkeghe ghena jishaben.

¹³Assensü keben pen wi sipress-ton na shigü waben; aghazü keben pen wi martle-ton na shhughoben. Azensu hawa ha anuphanla ben den, Hi Apvüwa, hi mangwa sachidha khe tsü meshen neng keya kesü saaben.”