Read Northern Rengma Naga ISAYA 56 Bible Online

ISAYA 56 - Northern Rengma Naga bible

ISAYA 56

¹Apvüwa na ma nyithu wi khiben, “Atsentsa nu kemeshon kulilo, kepaghenanye hi wan nthu hangshaya tendha.

²Hi sawegü pi Sabbath yen nie nu tsü nie zzi nketenthu cüden. Hi sawegü pi nkemehai mangla sa nketenthu cüden.”

³Asang kesü na Apvüwa nyithu saghu keyawa wi hati kekhiu nye, “Apvüwa na hi ya ma nyithu gweghe nu kinyi thsü nben.” Npvüza kesü na amcasa nu atsanga muya nketen ghena ma khiela Anyiza nyi saya nbenle nmeshenla.

⁴Apvüwa na anyi tsüti kesathu wi khiben “Keujüla no Sabbath yen kenie wina hi kinyikü nu hi kenenwa tsü sa nu nleben tsentsa wi hi cenkethenjühwa tsü nieten lethu,

⁵hi Kekinyijjen wi nu inyithu jawi no atsa nu angathu keben miwi sieki n-nyan tsü meshen ben den, khiela no mali nben.”

⁶Apvüwa na asangthu na gho ma nyi saya, ma ghali nu ma kekuli sa, Sabbath yen nie nu leben tsentsa wi ma cenkethenjühwa tsü nie ketenthu wi khiben:

⁷ “Hi nthu ssigho iyyishiphon kemethawa Zion wi chi, hi kekhie jjen wi anonkeghe pi nthu cü, nu nthu kekinyi pen wi ahhanshathu kesa tsü ya cüden. Hi Kekinyijjen tsüpi mizzatenti nyithu tsüdi ghena kekhie jjen kesü le ciden.”

⁸Kemisintsawa Apvüwa na kushiyyi wina ma nyi Israel ssinu ajjen wi keghowa na ma hewila anyi kepathu ssigho mathu wwacü benle khishitheng.

⁹Apvüwa na asang mizzatentithu na aghangsathu ti ghola ma nyithu ghangdsalo kizadha.

¹⁰Ma khiben, “Accülikesathu, inyithu kitsan kechithu tsüdila anyon nmuladha! Mathu na mangla nchü. Mathu na ajjen kehie ffü khou nketenthu ti, jen nu aman man keten ketan sadha. Mathu na khatila jenben mvu ten nu!

¹¹Mathu na khiela lebenghaya nketen apvükemene ffü tsüti kesa. Accülikesa hathu hana mangla chüshi keya nmi. Mathu tsüdila ma kenen ketan sa nu ma kekiyi bhaden.

¹²Adikinathu na khiben, ‘Ithu kisengtssü pahan bhaya nu jjüya kemehai chu jjü na! Dhitsü wi tsü nansü miwi mehaikiaben!’ ”