Read Northern Rengma Naga ISAYA 6 Bible Online

ISAYA 6 - Northern Rengma Naga bible

ISAYA 6

¹ Uzziya Kadimiwa na keshü mapi hi Apvüwa mu. Ma ma kadipen kemisi ntsa miwi donki nu anyankethang nu ma gwokemejuwa kaghazu na Kekinyijjen maben pong.

²Ma kevü wi Cherubim na ngan ben, tsüthu kesüsü na agisha tughogho pvüden. Cherubim tsüdila agisha keni pi ammi shang, keni pi agwo meju, nu keni pi pighe den.

³Tsüthu na kesüsü wi kecili: “Kemetha, Kemetha, Kemetha! Kekhang ntsawa Apvüwa na metha! Ma nyankethang na ayyi pong ben!”

⁴ Tsüthu hhai na Kekinyijjen donbvü la pvükuli, nu Kekinyijjen wi annikekhu na pong ben.

⁵Hi khi, “Hi tsü ajüh nmidha! Hi dedi tendha, kepaghenanye ipang wi keshhugho jüh mabenla kesami, nu hi kesami jüh kekhithu jawi hangden. Isala, hi inyon pi Kekhang ntsawa Apvüwa mudha le!”

⁶Tsaseng wi Cherubim kesü na keceji pi kekinyipen wi anni mihi cekeya kesü sen nu hi wi gho.

⁷Ma anni mihi tsüpi ikhemüggü kidhen nu khi, “Hawa ha nkhemüggü kidhen chidha, nu no kesazzithu tsü nmidha, nu kesamithu tsü teshi cüdha le.”

⁸Tsaseng wi hi Apvüwa na kekhi hhai za, “Hi thowa kesunchi nu? Thowa na ithu nyilowa sa nu?” Hi luneng, “Hi waten le, hi kesunchilo!”

⁹Tsalina hi walo nu ma ajüh hapi nyu kizalo pi hi cüa: “Nthu na ghang ntsa lela chüshiya nben! Kina ntsa lela mangwa saben khe chüya nben!”

¹⁰Tsaseng wi ma hi kiza, “Anyi hathu leben papi jeng thsü, mathu khuna tecu thsü, nu mathu nyon nmu thsü lalo, isanu mathu ya nmu, za meya nyelela chüshi meya thsülaben. Mathu na kheneng hi wi gho nu mehaiyathu keyishü ghena.”

¹¹Hi ma wi keü, “Matsü khathu tsüti saben nu?” Ma luneng, “Anyunutithu yasa pi ghacang thsü — ajjenthu wi anyi na nhangla nu ayyi tsüwa teshi pi npi kiyisha chu.

¹²Hi anyithu kesun pi kelensie wi chi nu ayyi maben teshi thsüaben.

¹³Meshu tagha wi kesü na ayyi ciwi benla lethu, tsü la dediaben; ma ayangton shüchi nu ma chonhi ketan keben ti saaben.” (Ma chonhi lethu Anyiza nyi ketheü na shagha keten zensu.)