Read Northern Rengma Naga ISAYA 60 Bible Online

ISAYA 60 - Northern Rengma Naga bible

ISAYA 60

¹Shaghalo, Jerusalem, nu aghani ti wegülo; Apvüwa nyankethang na nmiwi wegüben!

²Kejang na mizzatenti kepathu pabhonya ben, Isala nmiwi tsü Apvüwa kewegü na wegüben; Ma ketenpen kewegü na no ssi benden.

³No kewegü na mizzatentithu zanyaben, nu kadimithu pi ntsathang ketheüwa thangtheghi wi chiyaben.

⁴No kechhenkevü wi mangwa saben khe ghangchilo: N-nyithu na ajjen wi ghole bendha! Ntsathu na kelensie wina ghoben; N-nga ghalathu pi ghanyithu ti pvü ghoaben .

⁵No ha mu pi anonghe ntsa saaben; Anonghe ntsa pi kephenkiben. Mizzatentithu keben-keyeng sen nu no wi ghoaben; Atssükedone khhaka wina mathu keben na ghoaben .

⁶Sunsiesa thou keti kejon na Midia nyi, nu Efa wina ghoben. Mathu na suna nu hankedemvu sen nu Sheba wina ghoben. Anyithu na Apvüwa kuli kechi jühtheü tsüpi nyu kizaben!

⁷Kedar nu Nabaioth wi khaghanenithu tsüdila pi ahhanshathu sa sengho no cüben, nu pi kekinyipen miwi Apvüwa kenen sa khuchiben. Apvüwa na ma Kekinyijjen sapi hatu miwi nyankethang sa chiben.

⁸Akulukeshü ti pighe keten ahunjjenthu, nkhetsüthu ti ajjen wi ghoneng keten ha mangwa nu?

⁹Tsüthu tsüna alen kesie wina ghoketen ahunjjenthu, Anyiza nyithu pvü nu ajjen wi ghoden. Mathu na rükatssü nu suna sen nu Apvüwa Israel Nyiza kemethawa nyan tsü kinyiküle ghoden. Ma mizzatentithu sapi ma nyithu nyuwakü thsü kesawa tsüle.

¹⁰Apvüwa na Jerusalem wi khiben, “Asangthu na nkhwetithu zhüpfü yaben, nu mathu kadimithu na no kekuli saaben. Ileben ketsu wi hi no meten cü, isala hi khili tsü hi kenen, nu nanketizen pi no ccücaden.

¹¹ Aghaja nu aghanan tsüdila nkhweti jenka na sha ben den. Isanu mizzatentithu kadimithu na mathu keben-keyeng sen nu no wi gho thsüle kesalina.

¹²Isala no kekuli nkesa mizzatentithu tsü yasatha saaben.

¹³‘Asahong, juniper, sipress chanthu, Lebanon yinong wi achan kemehai ntsathu, sengho no, Jerusalem saneng ben. Hi Kekinyijjen tsü sapi atsimehai ntsa, inyunutiwa sapi anyanthang ntsa sale kesalina.

¹⁴ No pashakesa tsathu na ghoben, nu mathu na kenyuwakü pi keccüca wi akhhutsüdu ben. Kuti tsüwi no nkhichi kesathu tsüdila gho nccü wi no kinyiben. Mathu na no pi “Apvüwa Nyunutiwa” “Zion, Israel Nyiza Kemethawa Nyunutiwa” isa ciben.

¹⁵“No teshi nu nanmeghü pi kiyisha nu nkaghangchi nyunuti saneng thsü nbendha. Hi no sapi di nu atsimehai ntsa pi anuphan nu anuphanla anonkeghe pen kesü sa thsüaden.

¹⁶Mizzatentithu nu kadimithu na no noncca pi ajja kesü na anga noncca keten ti saaben. No hi, Apvüwa no hangshaya kesawa, Israel Nyiza kekhangwa no lisha kecüwa le kesa chüyaben.

¹⁷‘Hi lezza mithon wi suna, amighe nu achan mithon wi rükatssü nu lezza, nu alon mithon wi amighe sengho no cüden. Nmiwi kekhang kesenthu na no pasha nbendha; hi mathu sapi ajühtsentsa nu kecca sen nu kekhang sen thsüden.

¹⁸Yasayala hhai nza nengdha; Keyasa na no diyyi pachazighe neng nbendha. Hi akhweti kesü ti no khwe nu nsheipi yaden; Hi no hangshaya kesalina no hi sengben.

¹⁹ “Aghanan wi aghani na no kewegüwa sa nbendha. nyelela asha na aghaja wi no kewegüwa sa nbendha; Hi Apvüwa, anuphanla no kewegüwa saaben. Inyankethang kewegü na nmiwi wegüben.

²⁰N-gükeccü tsathangthu na asakhen saaben. Hi Apvüwa, anuphanla no kewegüwa saaben, asha nu aghani miwi la sieki ben den.

²¹N-nyithu tsüdila kemeshonwa sa waben, nu anuphan ghena ayyiwa tsü yayaben. Hi mathu pi shengchi, hi mathu sachi, hi kedi tsüpi tsüdi ccücale kesalina.

²²Ntheghi kizza ntsa nu kemeni ntsawa lela, mizzatenti keti kekhang ntsa kesü sayaben. Khathansha wi matsü sati kesa na gho khe, Hi wan ha sagho thsüaben. Hi Apvüwa le!”