Read Northern Rengma Naga ISAYA 61 Bible Online

ISAYA 61 - Northern Rengma Naga bible

ISAYA 61

¹ Kemisintsawa Apvüwa na ma ghamu pi hi pong cüdha. Ma hi kessiya nu hi kesun pi ajühkemehaiwa sengho ketha-uthu cü thsü, leben gükeccüthu sapi mehai cü, nyu kekhu wi kebenthu kekhen nkemi, nu atssüzüthu lishü kecü jüh pi thangchilo kesalina.

²Ma hi kesun pi Apvüwa na ma nyithu hangshaya keten, nu mathu ghinyithu chaya keten matsüwa tsüna gho tendha le kesa pi thangchi thsüle kesalina. Ma hi kesun pi ahathana kebenthu tsüdi leben satecca cü.

³Accükwenkeshü mithon wi anonkeghe, nu kenong pi Zion wi anongü kebenthu cü thsü, ahathakina mithon wi keseng khwi kesü pi cülo kesalina. Mathu na Apvüwa ma ketanla achanthu pi sheng ketheng tsüti saaben. Mathu tsüdila kemeshonwa saaben, nu Anyiza na sakechithu ghena nyu na ma sengben.

⁴Mathu na anyunutithu matsü kesie keyasa wi kebenthu tsü sapfü ben.

⁵Inyithu, asangthu na nthu kekuli saaben. Mathu na nthu sahangthu noncca, nu nthu lli ca nu nthu kemeshentsse llithu nonccaben.

⁶Nu nthu pi Apvüwa wi keqhaikedithu, nu ithu Nyiza maghathu le kesa chüben. Nthu na mizzatentithu keben-keyeng tsü sen nu anonghe nu tsüthu pi nthu ji sakeya ghena ashhü saaben.

⁷Nthu kejüghekeya nu kimennikeya tsüna asakhen saaben. Nthu ketanla nthu yyi wi hangden, nu nthu keben-keyeng na kishen keni saaben; Nthu nonkeghe na anuphanla benden.

⁸Apvüwa na khiben, “Hi ajühtsentsa kesa tsü nen, nu nyu kepasha nu kesazzi tsü nanmeghü den. Hi lebentsentsa sa nu akutimen pi inyithu cü nu mathu ssinu anuphanla cenkethenjüh kesü saaden.

⁹Mathu na mizzatentithu jawi nyankemechan saaben. Tsüdila mathu mukeya wi mathu na hi kesawegü kepvü nyithu le chüyaben.”

¹⁰ Apvüwa na mangwa sachidha khe Jerusalem na tsüghena anongheben. Ma shanyili kesü na keshanyi ghe kiden pvü keben ti kesa. Anyiza na hangshakeya nu khangkeya pi ma mphi thsüdha.

¹¹Amacü na shhugho nu shigüya metsi keten ti Kemisintsawa Apvüwa na ma nyithu hangsha yaben, nu mizzatentithu tsüdila ma sengben.