Read Northern Rengma Naga ISAYA 62 Bible Online

ISAYA 62 - Northern Rengma Naga bible

ISAYA 62

¹Hi ajühkhi pi Jerusalem satezü cüden, Hi ma npi hangshakeya chu nu ma khangkeya na aghaja wi ahula kesü ti npi wegükeya chu hi ccen ben nten.

²Jerusalem, mizzatentithu na no khang ntsa kesa muden! Mathu kadimithu tsüdila n-nyankethang tsü muden. N-nyan ketheü kesü ciaben, Apvüwa ma ketanla khukechi nyan kesü.

³No Apvüwa ghena kadiliwen tsikemehai kesü ti saaben.

⁴No pi “kiyisha” isa nci nengdha, nyelela n-yyi pi “Teshikea wubvü” tsüti nsadha. N-nyan ketheü cipi “Anyiza na ma kenenwa” isaden, N-yyi pi “Anonghethi shanyikeya” isa ciden, Kepaghenanye Apvüwa na no nenben. Nu n-yyi ghena awuba kesü ti saaben.

⁵Pvüza kesü na pvünyimetha ghala kesü pi ma shanyili sale ssi keten ti, Ma no zhükechiwa na no yayaben. Shanyiwa na ma shanyili kenen ti, tsüti Anyiza na no wi ma kenen ben.

⁶Jerusalem, hi nkhweti miwi aghikehiethu pi chitheng, mathu na aghaja nu aghanan lela ccen ben wa yishü. Nu ma yala khiela tsüthu nmali thsüla.

⁷Ma Jerusalem sanengya nu tsüpi ayyi mabenla seng keten nyunuti kesü npi sakeya chu mathu na ma pi ccen ben thsü yishü.

⁸Apvüwa na ajüh keti khishitheng, nu ma kekhang wina ma tsü saaden: “Nthu su tsüpi nthu ghinyithu ghena kedsakejjü nsa nengdha. Nu asangthu na nthu kisengtssü tsü njjü nengdha.

⁹Isala nthu amacü pi yang nu wwikeyathu na asu tsü dsa nu Apvüwa sengben. Nthu kemeshentsse bi noncca nu saghukeyathu na hi Kekinyijjen ccühha wi kisengtssü jjüben.”

¹⁰Jerusalem nyithu, anyunuti meiwi shhu nu n-nyithu khenengkegho len kesü chhülo! Alentonti kesü kidenya; alonthu ghaka methalo! Mizzatentithu chüya kemehai sale kesa ghena azensu kesü zankiya

¹¹Apvüwa na pi ayyi tsüdi wi thangchiben: “Jerusalem nyithu wi kizala Apvüwa na mathu hangshaya le ghoden, ma kikashakeya nyithu ssinu ma gwegheden.”

¹²No pi “Anyiza Kemetha nyi, Apvüwa na hangshayakea nyi,” isa ciden. Jerusalem pi “Anyiza na ghali keten nyunutiwa.” “Anyiza na yisha nkesa nyunutiwa” isa ciden.