Read Northern Rengma Naga ISAYA 63 Bible Online

ISAYA 63 - Northern Rengma Naga bible

ISAYA 63

¹ “Edom yyi Bozra nyunutiwa wina gho ketenwa ha thowa nu? Athsümeni kenmie pvü nu anyankethang sala kekhang nu kezü sen nu gho ketenwa ha thowa nu?” Tsüwa tsüna Apvüwa, khang ntsa nu hangshaya ketenwa na ma khangkeya pi thangchile ghoden.

²“Mangkesa na ma thsümeni na nmieni anyi kesü na kemeshentsse bi nyeggü pi kisengtssü sale keben thsümeni ti ben nu?”

³ Apvüwa na khineng, “Hi mizzatentithu pi kemeshentsse bi ti nyeggü nu thola hi kiqale ngho. Hi ileben ketsu pvü nu mathu ghaceng nu mathu jjü na ithsümeni tsüdi wi kaki tendha.

⁴Hi inyithu hangshakeya tsüna ghodha; nu kemeten pi mathu ghinyithu kecü matsü dhale kesa hi südheya.

⁵ Hi ghangchi nan thola hi kiqaya kemehai nmula kesalina imansa. Isala ileben ketsu na hi sapi zü cü, nu hi ketanla khangkeya muya.

⁶Ileben ketsu wi hi mizzatentithu mabenla ghaceng nu pachazighea. Hi mathu kahang jjü pi ayyi miwi llechi.”

⁷Hi Apvüwa, nyu ghaliki keten cüki tsüpi kizaden; ma ithu tsüdi ghena sakechi tsüghena hi ma sengden. Ma nanketizen nu ghaliki ben keten ghena ma sawegü ntsa pi Israel nyithu cüdha.

⁸Apvüwa na khi, “Mathu na inyi; mathu na hi mechu nben.” Tsalina ma mathu

⁹gükeccü tsüdi wi mathu hangshaya. Tsüna tangnyilo kesü na nye, isala Apvüwa ma ketanla mathu hangshaya. Ma ma kaghali nu nanketizen wina mathu kekashaya. Ma wakea wila keshüthangla mathu noncca gho,

¹⁰isala mathu na ma matangla shun nu ma kemetha ghamu sapi ahathana ntsa sa thsüa. Tsalina Apvüwa na mathu ghinyi sa nu mathu ssikaghashen.

¹¹Isala mathu na wakea wi Apvüwa maghawa Mosa tsüwi cüki meshenya nu keü, “Apvüwa atssükedone wi ma nyi ccülikesathu hangsha kecüwa tsüna khili khiewa ben nu? Apvüwa ma ghamu pi Mosa kecüwa tsüna khiewa ben nu?

¹² Apvüwa ma kekhang wina Mosa miwi pala ketiti kuli, atssükedone gishüzighe nu atssü kedhu wina ma nyithu ssishhu ma ghena anuphan nyankethang sa keyawa tsüna khiewa ben nu?” Apvüwa na mathu lentsütson keten wi mathu na aghang goru ccü kekhang ti nu khiela accü nmeshü.

¹⁴Amesüsi ssinu ayyiketijü kemehai wi kewa tsüti Apvüwa na kecca pi ma nyithu cü. Ma ma nyithu lentsütson nu ma nyan kenyuwakü sengho.

¹⁵Apvüwa, no kemetha nu nyankethang wi hang keten pen tang wina ithu ghangchilo. No ithu cüki meshen ntsa keten tsüna khie nu? No kekhang na khie nu? No kaghali nu nanketizen na khie nu? Ithu n- ghangchila nsa lalo.

¹⁶No ithu ba. Ithu baqhai Abraham nu Jakob manyi na ithu nchü ladha, isala Apvüwa, no ithu ba, keshüthangla ithu kikashaya ketenwa.

¹⁷No mangkesa na ithu ya nlen cüzzi bvü thsüten nu? No mangkesa na ithu sapi leben-dhu nu no wina kheneng bvü thsüten nu? No kekuli sa ketenthu ghena nu keshüthangla n-nyi sa ketenthu ghena kheneng gholo.

¹⁸Ithu n-nyi kemethathu ha matsü keujü ghena ithu ghinyithu na ithu jügüshia; mathu na no kemetha pen cüten[16]

¹⁹No ithu miwi ithu kekhang kesenwa sa nkegho ti nu ithu na n- nyithu sa nkegho ti saben.