Read Northern Rengma Naga ISAYA 65 Bible Online

ISAYA 65 - Northern Rengma Naga bible

ISAYA 65

¹Apvüwa na khi, “Hi inyithu kekhie kina cüle saben, isala mathu na hi wi nkhie. Mathu ya hi muya thsüle saben, isala mathu na hi nbha. ‘Hi hewi ben; hi nthu kekhie kina cü ben le,’

²Hi keshüthangla inyithu aleben-dhula kesazziwa sa nu mathu ketanla mathu kemeshen sa bvü ketenthu tsü ssiyale saben.

³Mathu na njüghela ileben sameshü kayi. Mathu na kemetha sanku wi Anyiza nkechhüthu kekinyipen miwi hankedemvu mecang nu ahhanshathu sa.

⁴Aghaja wi mathu na alonshi ku nu ashüjjenthu wi keshü ghamuthu ccüneng le waden. Mathu na avüsa dsa nu asa pi Anyiza nkechü hhansha kesathu tssü tsü jjüden.

⁵Tsüti sa nu mathu na nyu kepathu wi khiden, ‘Ithu ghü bvülo; ithu na metha mtsü nu nthu na ithu kidhenya nben!’ Hi anyi tsüti kesathu tsü ghangcha nben, mathu miwi ileben ketsu na anni khiela nün nketen ti saben.”

⁶Hi kemeten pi mathu cüle südheya nu tsü cüki zhüyadha. Hi mathu na kuli kethengwa tsüghena makesasalo saya nben, isala mathu kutimen sapi cüden,

⁷tsüna mathu kesami nu mathu baqhaithu kesami ghena la. Mathu na hankedemvu pi Anyiza nkechü yyishiphon kekinyipenthu wi mecang nu hi khimeshü. Tsalina wakea wi mathu kekulithu ghena kemu qo wi hi mathu meten cüden.’

⁸Apvüwa na khiben, “Thola kemeshentsse bi kemehai yasa nten; tsüti kesawa nyela mathu na tsüthu pi kisengtssü saden. Tsüti hi la inyithu tsüdi yasa nten, hi hi kinyi ketenthu hangsha yaden.

⁹Hi sawegü pi Israel nyi Judah mizza sa kebenthu cü, nu mathu shicübvüghathu na iyyi ayikhathu tsü yayaben. Hi kessikeya nyi hi kekuli sa ketenthu na ciwi hangben.

¹⁰ Mathu na hi kinyi nu mathu khaghaneni nu amesüsithu ssinu niduwa Sharon Deshentijü wi nu nishuwa Kekivvü Yyiketijü wi atsse yaben.

¹¹“Isala tsüna nthu hi teshi nu iyyishiphon kemethawa Zion nkechü ghe sa, nu kemehai keteshü mu keten cenpvüthu Gad nu Meni kinyi wakeathu ghena tsü makepa saaben.

¹²Tsüna nthu na atuketeshi sa shü den, kepaghenanye nthu na hi nthu ci kechi wi nluneng nyelela hi nthu ccüneng kechi wi nthu na nkinala. Nthu na ijüh nkinala nkemehaiwa sale kessiya.

¹³Tsalina hi nthu kiza den hi kinyi nu ijühkina ketenthu na kedsakejjü kejon muyaben, isala nthu tsü ghama nu dighethi saaben. Mathu na anonghe, isala nthu na kimenniben.

¹⁴Mathu na anonkeghe ghena akhwisa, isala nthu tsü leben güccü nu qaiben.

¹⁵Hi kessikeya nyithu na nthu nyan khipi kishen-keshi saaben. Hi Kemisintsawa Apvüwa na nthu pi shü thsüaben. Isala hi anyan ketheü kesü pi ijühkina ketenthu cüaben.

¹⁶Anyi kesü le kesü lela ayyi hawa wi kesawegü khie ketenwa na ajühtsentsa sa keten Anyiza na sawegü pi cülo khieben. Thowa na kekishen kesü sa khe ajüh tsentsa sa keten Anyiza nyan wina kishenben. Wakea gükeccüthu tsü mali nu nchüla ben.”

¹⁷ Apvüwa na khiben, “Hi ayyi ketheü kesü nu atssan ketheü saben. Kheni kekulithu tsüdila nmitha saaben.

¹⁸Hi sahangkechi witsü nthu nen nu anonkeghe salo. Hi sa keten Jerusalem ketheüwa witsü anonkeghe na pong, nu ma nyithu na anongheben.

¹⁹ Hi la Jerusalem nu ma nyithu ghena anonkeghe pi hi pong yaben. Ciwi qai nbendha, kekiqa la khie nbendha.

²⁰Memethu na ghanyi keben wi shü nben, nu anyi tsüdila kahang-u hang yaben. Amapi meza kesü hangkeyathu tsüpi kepvünyi le saaben. Tsü tuwi keshü tsüna hi mathu kishencü kesa zensu kesü saaben.

²¹Anyithu na ajjen sa nu mathu na ciwi hangben, nyu kepa na tsüthu sen nben. Mathu na kemeshentsse lli ca nu kisengtssü jjüben, nyu kepa na tsüthu tsü jjü nben. Achantonthu ti inyithu na kesie hangben. Mathu na kuli kethengthu tsü sen pi anonghe cenyaben.

²³Mathu kekuli kesa wi mehaicenya, nu mathu tsangathu na ketizen kesa metuya nben. Hi ghaketen tsü tsüdi wi sawegü pi mathu nu mathu shicübvüghathu cüben.

²⁴Mathu na hi wi npi kekhiesha wina hi mathu kekhie luneng cüaben.

²⁵ Adenni nu khaghaneni zzathu gweghe atsse yaben; ssensitemithu na amesüsithu ti amatsi dsaben, nu amaghangthu la nyu nmecüla ben. Iyyishiphon kemethawa [17] Zion miwi mangla paketenali nyelela nkemehai nmila ben.”