Read Northern Rengma Naga LEVIYEN 1 Bible Online

LEVIYEN 1 - Northern Rengma Naga bible

LEVIYEN 1

¹Apvüwa na ma ketenpen Nithsüjjen wina Mosa cichi nu ayen hathu ha pi ma cü,

²Israel nyithu na ahhansha sapi kekinyi wi nie thsüle kesalina. Anyi kesüle kesü lela asahang pi ahhansha sa kekinyi wi tsü ma mesüsi nyelela ma khaghaneni nyelela ma neni kesü saya mehai.

³Keujüla ma mesüsi pi mecang pi kekinyi sa lethu ma amesü süpon nyu ghojünkeya mangla nkemi nsenghothu yishü. Ma tsüpi Apvüwa ketenpen Nithsüjjen kedulen wi kinyi chithu Apvüwa na ma kinyi kechi tsü yaben.

⁴Anyiwa na ma kwen chang pi asahang li miwi chi nu tsüna ma kesamithu sen nu bvüa kesa hhansha saben.

⁵Ma ciwi amesü süpon tsü pathi, nu Aaron nyi keqhaikedithu ya ajjü tsüpi Apvüwa cü thsü, nu tsaseng wi tsüpi Nithsüjjen kedulen wi chi ketheng kekinyipen ccügwen mejü qho keghülo.

⁶Tsaseng wi ma asahang tsü hyu shhi pi nu ma sa tsü hah,

⁷nu keqhaikedithu na achan pi kekinyipen miwi chi nu anni sachi.

⁸Mathu na asa tsü ma li nu ma kethu saghu pi anni miwi chi.

⁹Anyi tsüwa na asa ma pvüsheng nu ma ccüthu tsü bhu, nu keqhaikedi kekuli sa kebenwa na ahhansha maben pi kekinyipen miwi tsü mecang. Apvüwa na atsse pi kekinyi hawa han nenden.

¹⁰Keujüla anyi tsüwa na ma khaghaneni nyelela aneni pi kinyi lethu tsüna asüpon nyu ghojünkeya mangla nkemi nsathu yishü.

¹¹Ma tsüpi kekinyipen na aghawa pathi, nu keqhaikedithu na ajjü tsüpi kekinyipen ccügwen mejü wi keghü chiben.

¹²Anyi tsüwa na asa tsü kaha seng wi keqhaikedi kekuli sa kebenwa na asa tsüdila ma li nu ma kethu saghu pi anni miwi chiben.

¹³Anyi tsüwa na asa tsü ma pvüsheng nu ma ccüthu tsü bhu, nu keqhaikediwa na ahhansha tsüpi Apvüwa cüben, nu tsü maben pi kekinyipen miwi tsü mecang. Apvüwa na atsse pi kekinyi hawa han nenden.

¹⁴Keujüla anyi tsüwa na awa kesü sengho mecang pi kekinyi sa lethu tsüna nkhetsü nyelela tuktur kesü nsathu yishü.

¹⁵Keqhaikediwa na tsüpi kekinyipen wi chi, ma sun taghandhi nu ma li pi kekinyipen miwi mecang ben. Ma jjü tsüpi kekinyipen katen wi keghü chiben.

¹⁶Ma ma tezi nu ma kenyethu tsü pfü pi kekinyipen na nishuwa ajuwen kechipen wi tsü khala.

¹⁷Ma ma gisha keni ghanten nu tsü nzandhila ma pvüwa tsü mezüqhe, tsaseng wi tsü maben pi kekinyipen miwi mecang ben. Apvüwa na atsse pi kekinyi hawa han nenden.