Read Northern Rengma Naga LEVIYEN 10 Bible Online

LEVIYEN 10 - Northern Rengma Naga bible

LEVIYEN 10

¹Aaron tsa keni Nadab nu Abihu manyi na annikhu khuya nu amihi, nu hankedemvu pi chiya, nu tsüpi Apvüwa kinyi. Isala anni tsüna nmetha, kepaghenanye Apvüwa na manyi tsüpi kinyilo nkhi.

²Zuli Apvüwa na anni kesun shachi nu tsüna ciwi Apvüwa tuwi na manyi mecangthia.

³Tsaseng wi Mosa na Aaron wi khi, “Apvüwa na hati kekhi ha ma jjügi na hale, ‘Hi kekuli kesathu tsüdila hi kemethawa nkinyiküthu yishü; hi inyankethang pi inyithu ccücaben.’ ” Isala Aaron na ceen ben wa.

⁴Mosa na Aaron bizawa Uzziel tsa keni Mishael nu Elzafan cichi nu manyi wi khi, “Hewi ghola Nithsüjjen kemethawa wi nshinyi cünyu kamangthu pieshhu kemnanpen na ameiwa chilo.”

⁵Tsalina manyi na Mosa kekhi ti athsü sengho akamang keni tsü meju pie shhula kemnanpen na ameiwa chia.

⁶Tsaseng wi Mosa na Aaron nu ma tsa keni Eleazar nu Ithamar wi khi, “Nthu li nhhe nyelela athsümeni mezüqhe pvü nu nthu na anongü benle kesa pi nyu nccücala. Keujüla nthu na tsüti sa lethu, nthu na shüaben, nu Apvüwa na azitenti maben miwi ma leben minu ben. Isala nthu Israel nyithu tsüdila Apvüwa na anni kesun chi pi mecangthi thsü kesa keshü ha ghena anongüya mehai.

⁷Nithsüjjen wi kedulen tsü nteshila nyelethu nthu na shüaben, kepaghenanye Apvüwa wi kenyenji deli tsüpi nthu satemetha theng.” Tsalina mathu na Mosa kekhi tsüti sa.

⁸Apvüwa na Aaron wi khi,

⁹“No nu ntsathu na kisengtssü nyelela azü kekhang kejjü seng wi hi ketenpen Nithsüjjen witsü ndula; keujüla nthu na tsüti sa lethu, nthu na shüaben. Ayen hawa ha nthu shicübvüghathu tsüdila nieben.

¹⁰Nthu na mangwa na Anyiza ji nu mangwa na anyi ghuzzaghuti kesen ji, khawa na keccüna wi metha nu khawa na nmetha khe chü kepapa nsathu yishü.

¹¹Hi Mosa wina ayenthu pi nthu kecü tsü nthu na pi Israel nyithu tsüdi sansi ncüthu yishü.”

¹² Mosa na Aaron nu ma tsa keni Eleazar nu Ithamar wi khi, “Atsse pi Apvüwa kekinyi wi kesentu asu pi kekinyiwa tsü khuya, tsüpi azimi pi nkechi mesa güya nu kekinyipen kete wi tsü dsalo, kepaghenanye kekinyi hana metha ntsawa.

¹³Kemetha pen kesü wi tsü dsalo; ha atsse pi Apvüwa kekinyi wi pahan pi no nu ntsathu shei kesa tsüle. Apvüwa na tsüti hi kizale.

¹⁴Isala no nu ntheghithu na aju kemehai sapi Apvüwa wi keqhaikedithu ghena khukechi nnukhu-kisü nu ma ccü tsü dsaya mehai. Nthu na keccüna wi kemetha pen kahe wila tsüthu dsaya mehai. Israel nyithu na kecca ghena kekinyi kesa wi nthu shei khukechi hathu hana no nu ntsathu jile.

¹⁵Mathu na asakethu pi atsse pi kekinyi sala Apvüwa cü keben wi ma ccü nu nnukhu-kisü tsü sengho ben. Apvüwa na kekhi ti hathu hana anuphanla no nu ntsathu shei saben.”

¹⁶Mosa na kesami ghena kekinyi aneni tsü cüki keüchi nu tsüpi mecangdha le kesa chüya. Ha ghena ma Eleazar nu Ithamar miwi aghepvü nu khi,

¹⁷ “Mangkesa na nshinyi kemetha pen wi kesami ghena kekinyiwa tsü ndsa nu? Tsüna metha ntsawa, nu azitentiwa kesami sen nu bvü thsüale kesalina Apvüwa na tsüpi nthu cüdha.

¹⁸Ma jjü tsü sen nu Nithsüjjen kemethawa non wi nghole kesa ghena, hi kekhi ti, nthu na ciwi ahhansha tsü dsa kesaule.”

¹⁹Aaron na luneng, “Keujüla hi nansü tsü dsale keathu, Apvüwa na tsü ya kesala nu? Anyithu na nansü mathu kesami ghena kekinyi sa, nu mecang pi kekinyi sengho Apvüwa cüdha, isala khilila imiwi qhethiketen hathu ha sabenle!”

²⁰Mosa na ha zakeya seng wi ma leben ghashu sa.