Read Northern Rengma Naga LEVIYEN 12 Bible Online

LEVIYEN 12 - Northern Rengma Naga bible

LEVIYEN 12

¹Apvüwa na ayen hathu pi Mosa cü,

²ha Israel nyithu ghena. Nza kesü na atsanga pvügha keya seng wi ghanan tagü ma asha kaghapeng nzayen sa keten tsü makesü keccüna wi nmethala benben.

³ Tazen ghanan wi atsawa hyuhan ben.

⁴Nzawa gwo wi ajjü shhu kesalina ma ghanan changha nu kecheng cen ccüla methaben; ma satekemetha yen tsü npi kecen chu ma kemetha katsüha lela npala nyelela kemetha Nithsüjjen wi lela ndula.

⁵Nza kesü na anga kesü pvügha keya seng wi ma ghanan taghamejü ma asha kaghapeng wi nzayen sa keten tsü makesü keccüna wi nmethala benben. Tsaseng wi ma gwo wi ajjü shhu kesalina ma ghanan achentugho nu tugho cen ccüla methaben.

⁶Ma satekemetha matsü cen lethu, atsa sale anga sa lela, ma mecang pi kekinyi ghena khaghaneni zza amapi kesü ji nu kesami ghena kekinyi ji tuktur nyelela nkhetsü kesü sen nu Apvüwa ketenpen Nithsüjjen kedulen wi keqhaikediwa wi ghoben.

⁷Keqhaikediwa na ma kekinyi tsüpi Apvüwa cü nu ma nkemetha tsü sen bvü thsüale kesalina keccüna sa chithu ma metha ben. Hawa ha nza kesü atsanga kepvügha seng wi nsathu yishü.

⁸ Keujüla nzawa na khaghaneni zza kesü khuchi meya lethu ma nkhetsü keni nyelela tuktur keni, kesü pi mecang pi kekinyi nu kepawa pi kesami ghena kekinyi ghena sengho ben, nu keqhaikediwa na ma nkemetha sen bvü thsüale kesalina keccüna sa chithu ma metha ben.