Read Northern Rengma Naga LEVIYEN 13 Bible Online

LEVIYEN 13 - Northern Rengma Naga bible

LEVIYEN 13

¹Apvüwa na ayen hathu pi Mosa nu Aaron manyi cü.

²Keujüla anyi kesü ma gwo wi kekhuma nyelela avünen nyelela cüccen shhugho nu naa sen wa agükedsakenaa sa wa lethu, ma ssinu Aaron nyi keqhaikedi wi ghoben.

³Keqhaikediwa na kekhuma tsü ghang kaketsü sa, nu ciwi assen na mekidhi shagha nu kekhuma tsüna kevü hyu miwi dhuki shagha lethu tsüna agükedsakenaa sadha, nu keqhaikediwa na anyi tsüwa na keccüna wi nmetha ladhale khishiaben.

⁴Isala kekhuma tsüna mekidhi lela tsü kevü hyu miwi ndhuki nu assen na mekidhi nwa lethu, keqhaikediwa na anyi tsüpi ghanan tagü ma kepa satheng shaben.

⁵Keqhaikediwa na tagü ghanan wi wa ma ghang neng ben, nu kekhuma tsüna makesü nu dikayi nwa lethu ma anyi tsüwa pi ghanan tagü ma kepa theng neng shaben.

⁶Keqhaikediwa na kheneng tagha ghanan wi ma ghang ben, nu kekhuma tsüna mawa nu dikayi nwa lethu ma anyi tsüwa na methaben le khishiaben; tsüna kekhuma ketan le. Anyi tsüwa na ma thsümeni ghasüthu ma keccüna wi metha ben.

⁷Isala keqhaikediwa na ma ghang kaketsü sa nu ma metha benle kekhishi seng wi kekhuma tsüna dikayi wa lethu ma keqhaikediwa tuwi ngho nengthu yishü.

⁸Keqhaikediwa na kheneng ma ghang kaketsü saben, nu tsüna dikayi wa benla lethu ma anyi tsüwa na nmethale khishiaben; hana agükedsakenaa le.

⁹Keujüla anyi kesüle kesü lela ma agükedsakenaa ben lethu ma ssinu keqhaikediwa wi ghoben,

¹⁰ma anyi tsüwa ghang kaketsü saben. Ma hyu wi bvüshen shhugho ma ssen na mekidhi sa nu anieten benla lethu,

¹¹tsüna agükedsakenaa ben keten kesüdha. Keqhaikediwa na anyi tsüwa na nmethale khishiaben: anyi tsüpi ma kepa nsala mehai kepaghenanye ma nmetha kesa mutiyadha.

¹²Agükedsakenaa tsüna anyi kesü gwo wi pvükayi nu ma li na ma ccü kecu wa lethu,

¹³keqhaikediwa na ma ghang kaketsü saneng ben. Ma agükedsakenaa tsüna agwo maben pong kesa muya lethu ma anyi tsüwa na keccüna wi methale khishiaben. Ma gwo maben mekidhi sa lethu ma keccüna wi methadha.

¹⁴Isala kekhuma na shhugho meyi tsü ma nmethaladha.

¹⁵Keqhaikediwa na ma ghang kaketsü saneng nu kekhuma ketheü muya lethu ma anyi tsüwa na nmethale khishiaben. Kekhuma ketheü kesü tsüna agükedsakenaa nu anyi tsüna nmetha.

¹⁶Isala kekhuma tsü mehaiya nu mekidhi saneng lethu anyi tsüwa na keqhaikediwa wi wa nengben,

¹⁷ma anyi tsü ghang kaketsü saneng ben. Tsüna mekidhi sa lethu ma keccüna wi methadha, nu keqhaikediwa na ma methadhale khishiaben.

¹⁸Keujüla anyi kesü na avünen pvü nu mawa,

¹⁹nu tsaseng wi ma yisü witsü mekidhi ccüccen nyelela nmiemeki shhugho lethu ma keqhaikediwa wi waben.

²⁰Keqhaikediwa na ma ghang kaketsü sa nu ma yisü tsüna ma kevü miwi dhuki nu assen na mekidhi sa wa benla lethu ma anyi tsüna nmethale khishiaben. Hana agükedsakenaa avünen kepvü ben wina shhugho ben.

²¹Isala keqhaikediwa na ma ghang kaketsü sa kewa wi assen na mekidhi nsa nu ayisü la ma kevü miwi ndhuki, isala mekiza muya lethu keqhaikediwa na anyi tsüpi ghanan tagü ma kepa ben thsüaben.

²²Keujüla kekhuma tsüna pvükayi wa lethu, keqhaikediwa na anyi tsüna nmethale khishiaben; ma kekhuma nkemehai pvüden.

²³Isala tsüna makesü nu npvükayi lethu, tsüna avünen kesa yisü ketan nu keqhaikediwa na anyi tsüwa na keccüna wi metha benle khishiaben.

²⁴Keujüla anyi kesü na anni wi mecangya nu ma sa mekidhi nyelela nmiemeki sa shagha lethu,

²⁵keqhaikediwa na ma ghang kaketsü saben. Ciwi assen na mekidhi nu ayisü na ma kevü miwi dhuki shagha lethu tsüna anni kemecang yisü wi agükedsakenaa shaghadha, nu keqhaikediwa na anyi tsüna nmethale khishiaben.

²⁶Isala assen na mekidhi nsa nu ayisü la ma kevü miwi ndhuki, isala mekiza benla lethu keqhaikediwa na anyi tsüpi ghanan tagü ma kepa ben thsüaben.

²⁷Keqhaikediwa na tagü ghanan wi ma ghang neng ben, nu tsüna pvükayi wa benla lethu tsüna agükedsakenaa, nu keqhaikediwa na anyi tsüna nmethale khishiaben.

²⁸Isala tsüna makesü nu pvükayi nwa nu ma tsi na mekiza lethu tsüna agükedsakenaa nye. Keqhaikediwa na anyi tsüwa na metha benle khishiaben, kepaghenanye tsüna anni kemecang yisü ketan.

²⁹Nza nyelela npvüza kesü ma li nyelela ma khekhen wi kekhuma shhugho lethu,

³⁰keqhaikediwa na ma ghang kaketsü saben. Keujüla tsüna ma kevü miwi dhuki nu assen na hichuli nu ghapasi sa lethu tsüna agükedsakenaa sadha, nu ma anyi tsüna nmethale khishiaben.

³¹Keqhaikediwa na ghang kaketsü sa kewa wi kekhuma tsüna ma kevü miwi ndhuki, isala ciwi assen na nmehai lethu ma anyi tsüpi ghanan tagü ma kepa ben thsüaben.

³²Keqhaikediwa na tagü ghanan wi ma ghang neng ben, nu kekhuma tsüna pvükayi nwa, assen kehichu nmi, nu ma kevü miwi ndhuki lethu,

³³anyi tsüwa na ma kekhuma ben kevü wi assen tsü cah piaben. Tsaseng wi keqhaikediwa na ma pi ghanan tagü ma kepa ben thsü neng shaben.

³⁴Tagü ghanan wi keqhaikediwa na ma kekhuma tsü ghang kaketsü sa neng ben, nu tsüna pvükayi nwa nu ma kevü miwi ndhuki lethu, ma anyi tsüna keccüna wi metha benle khishiaben. Anyiwa tsüna ma thsümeni ghasüthu ma metha aben.

³⁵Isala ma metha benle kekhishi seng wi kekhuma tsüna pvükayi wa lethu,

³⁶keqhaikediwa na ma ghang neng ben. Keujüla kekhuma tsü pvükayi benla lethu ma assen kehichu tsü n-ghanla mehai; anyi tsüna nmethale kesa mutiyadha.

³⁷Isala keqhaikediwa kemeshen wi tsü kekhuma tsü pvükayi nwa nu ciwi assen na mehaitsü shigü ben nu kekhuma na mawa, isalethu keqhaikediwa na anyi tsüna metha benle khishiaben.

³⁸Nza nyelela npvüza kesü na ma gwo wi ayisü mekidhi shhugho lethu,

³⁹keqhaikediwa na anyi tsü ghang kaketsü saben. Keujüla ayisü tsüna nmiemeki lethu tsüna ahyu patena keya yisü ketan; anyi tsüna keccüna wi methaben.

⁴⁰Keujüla anyi kesü na ma tie nyelela ma pfüshan wi alissen nmi lela tsüna ma sapi nmethala saya thsü nben.

⁴¹

⁴²Isala kekhuma nmiemeki kesa na alissen nkemi witsü shhugho lethu tsüna agükedsakenaa kesüdha.

⁴³Keqhaikediwa na ma ghang nu ciwi kekhuma nmiemeki na benla lethu,

⁴⁴keqhaikediwa na anyi tsüna nmethale khishiaben, kepaghenanye agükedsakenaa na ma li wi bendha.

⁴⁵Anyi agükedsakenaa kebenwa na athsüqae mphi, ali mehhela, athsü pi ma mmi ssanwa kejibhon pvü, nu “Nkemetha, nkemetha!” tsüti khiben.

⁴⁶Ma kekhuma tsü keben chu ma nmetha, nu ma nyu nkemi pen wi kemnanpen na ameiwa nhangthu yishü.

⁴⁷Agükedsakenaawa na athsümeni, ssenthsü nyelela linen,

⁴⁸nyelela linen katsüha nyelela ssenthsü nyelela asahyu nyelela asahyu pi kesa katsüha miwi ben lethu,

⁴⁹tsüna mejjüdhi nyelela nmieni sa lethu, hana agükedsakenaa na pvükayi ben nu pi keqhaikediwa nccücathu yishü.

⁵⁰Keqhaikediwa na atsanqai tsü ghang kaketsü sa nu tsüpi ghanan tagü ma kepa ben thsüaben.

⁵¹Ma tagü ghanan wi tsü ghang neng ben, nu agükedsakenaa tsüna pvükayi benla lethu atsanqai tsüna nmetha.

⁵²Keqhaikediwa na tsüpi mecang shaben, kepaghenanye tsüna kekali wa keten agükedsakenaa ghena anni pi tsü mecang nsathu yishü.

⁵³Isala keqhaikediwa na tsü ghang kaketsü sa kewa wi agükedsakenaa tsüna atsanqai miwi pvükayi nwa lethu,

⁵⁴ma tsüpi bhu nu pi ghanan tagü ma kepa ben thsü lo ahza khuchiaben.

⁵⁵Tsaseng wi ma tsü ghang nu agükedsakenaa tsüna pvükayi nwa nu ma tsi la nkemili lela tsüna nmetha; ma kebighe pen tsüna asengwa sale atuwa sa lela nthu na tsüpi anni miwi mecang nsathu yishü.

⁵⁶Isala keqhaikediwa na tsü ghang neng kewa wi agükedsakenaa tsüna keqha benla lethu, ma tsüna athsü le asahyu lela mezüqhe shaben.

⁵⁷Tsaseng wi agükedsakenaa tsüna shhugho neng lethu, tsüna pvükayi waben, atsanqai pvüwa na tsüpi mecang nsathu yishü.

⁵⁸Keujüla ma tsüpi ghasü nu ma yisü nmula lethu, ma kheneng tsüpi ghasü, nu tsüna keccüna wi metha ben.

⁵⁹Tsalina hawa ha agükedsakenaa na athsümeni, ssenthsü nyelela linen nyelela linen nan nyelela ssenthsü nan nyelela asahyu pi kesa katsüha miwi ben lethu tsüghena ayenwa.