Read Northern Rengma Naga LEVIYEN 15 Bible Online

LEVIYEN 15 - Northern Rengma Naga bible

LEVIYEN 15

¹Apvüwa na ayen hathu pi Mosa nu Aaron manyi cü,

²hawa ha Israel nyithu ghena. Khathansha wi npvüza kesü na ma gwo wi agwotssü na shhu khe tsüna nmetha,

³ma gwo wi agwotssü na shhuben le khen lela.

⁴Ma wa awe kesü miwi donki le khhali lela awe tsüna nmetha ladha.

⁵Anyi kesüle kesü lela wa ma kidhen

⁶nyelela anyi tsüwa na katsüha mi kedonki pen wi donki lethu ma athsümeni ghasü nu atssükizü nsathu yishü, nu ma minulen wi kecu nmethala benben.

⁷Anyi kesüle kesü lela anyi ma gwotssü shhu keben kekidhenwa ma thsümeni ghasü nu atssükizü nsathu yishü, nu ma minulen wi kecu nmethala benben.

⁸Keujüla anyi ma gwotssü shhu kebenwa na anyi kesü keccüna wi metha kebenwa mmi meshuki cü lethu anyi tsüwa na ma thsümeni ghasü nu atssükizü nsathu yishü, nu ma minulen wi kecu nmethala benben.

⁹Anyi ma gwotssü shhu kebenwa na asahyu kedonkipen nyelela apen katsüha miwi donki lethu tsüna nmetha ladha.

¹⁰Anyi kesüle kesü lela anyi tsüwa kedonki pen wi katsüha lela kepawa ma minulen wi kecu nmethala benden. Anyi kesüle kesü lela anyi tsüwa kedonki pen wi katsüha lela kepvüwa ma thsümeni ghasü nsathu yishü, nu ma minulen wi kecu nmethala benben.

¹¹Keujüla anyi ma gwotssü shhu kebenwa na ma kwen nmetsi tegüla nyu pahan paya lethu, anyi tsüwa na ma thsümeni ghasü nu atssükizü nsathu yishü, nu ma minulen wi kecu nmethala benben.

¹²Anyi tsüwa na ayyipfü kidhen lela tsüpi pacha, nu achankhu kidhenya lethu tsü qhu nsathu yishü.

¹³Anyi tsüwa na ma gwotssü nshhula kesa seng wi ghanan tagü hieben lanu ma thsümeni ghasü nu atssümi kemetha wi atssükizü isathu ma keccüna wi metha shaben.

¹⁴Tazen ghanan wi ma nkhetsü nyelela tuktur keni sen wa Apvüwa ketenpen Nithsüjjen kedulen wi keqhaikediwa cüben.

¹⁵Keqhaikediwa na awa tsü kesü pi kesami ghena kekinyi nu kepawa pi mecang pi kekinyi saben. Hati nu ma anyi tsüwa satekemetha keccüna sa chiben.

¹⁶Npvüza kesü ma gwotssü keji lethu ma atssükizü nsathu yishü, nu ma minulen wi kecu nmethala benben.

¹⁷Athsümeni nyelela asahyu pi kesa katsüha miwi lela agwotssü keji chi lethu tsü ghasü nsathu yishü, tsüna minulen wi kecu nmethala benben.

¹⁸Npvüza nu nza manyi kegweghe seng wi manyi qho atssükizü nsathu yishü, nu manyi qho minulen wi kecu nmethala benben.

¹⁹Nza kesü asha kaghapen nzayen kesa wi ma ghanan tagü nmethala benben, anyi thowa na ma kidhen khe ma la minulen wi kecu nmethala benben.

²⁰Ma asha kaghapen nzayen sa keben tsü wi ma mangwa miwi donki nyelela khhali khe tsüna nmetha ladha.

²¹Anyi thowa na ma we nyelela ma kedonki pen kidhen khe ma thsümeni ghasü nu atssükizü nsathu yishü, nu ma minulen wi kecu nmethala benben.

²⁴Keujüla anyi kesü ma asha kaghapen nzayen sa keben jüwi ma gweghe lethu npvüzawa na nzawa nkemetha kaya nu ma la ghanan tagü nmethala benben, nu ma awe miwi khhali kesawa tsü la nmetha ladha.

²⁵Keujüla nza kesü ma asha kaghapen nzayen kesa miwi ghanan kecheng mejü ma gwo wi ajjü keji nyelela khenighani miwi keji wa lethu, ma gwo wi tsü keji keben chu ma asha kaghapeng nzayen kesa tsü wi tsüti nmethala benben.

²⁶Hati kesa tsü wi ma mangwa miwi khhali nyelela donki khe tsüna nmetha ladha.

²⁷Anyi thowa na tsüthu kidhen khe ma nmetha ladha nu ma thsümeni ghasü nu atssükizü nsathu yishü; nu ma minulen wi kecu nmethala benben.

²⁸Ajjü nkejila kesa seng wi ma ghanan tagü benla nu ciwi ccüna ma keccüna wi metha ben.

²⁹Tazen ghanan wi ma nkhetsü nyelela tuktur keni sen nu Apvüwa ketenpen Nithsüjjen kedulen wi waben.

³⁰Keqhaikediwa na awa kesü pi kesami ghena kekinyi nu kepawa pi mecang pi kekinyi saben, hati nu ma nzawa tsü satekemetha keccüna saben.

³¹Apvüwa na Mosa kiza nu Israel nyithu mathu nkemetha ghena kitsan chilo kiza, isa nu mathu kemnanpen non wi kebenwa ma ketenpen Nithsüjjen tsü n-nakhi thsüle kesalina. Keujüla mathu na tsüti sa lethu mathu pathia kesa.

³²Ayen hathu ha npvüza kesü ma gwo wi nkemetha keshhu nyelela agwotssü kekiji,

³³nza kesü asha kaghapeng nzayen kesa, nyelela npvüza kesü na nza kesü keccüna wi nmethala kebenwa gweghe kesa ghena.