Read Northern Rengma Naga LEVIYEN 16 Bible Online

LEVIYEN 16 - Northern Rengma Naga bible

LEVIYEN 16

¹Aaron tsa keni na anni nkemetha pi Apvüwa kecü ghena pathi kesa seng wi Apvüwa na Mosa kiza.

²Ma khi “Nbiwa Aaron wi ma matsü sati kesa wi ketan Kemetha ntsawa Pen keshonthsü seng wi tsü walo kizalo, kepaghenanye ciwi Cenkethenjüh Khitson keshan miwi akulukeshü wina nyu ya hi muya thsü. Keujüla ma tsü nkina lethu ma pathiaben.

³ Ma kesami ghena kekinyi ji amesü zza süpon kesü nu mecang pi kekinyi ghena khaghaneni süpon kesü tsüti sengho ccüla Kemetha ntsawa Pen witsü duya mehai.”

⁴Tsaseng wi Apvüwa na kecükegwe hathu khuchi. Aaron na Kemetha ntsawa Pen wi npi kedu wi ma atssükizü nu keqhaikedi thsümeni hathu ha pvüyaben: linen gwomejuwa kaghazu nu patono kenkhangwa, ageshi keqhan, nu alikemejuthsü.

⁵Israel nyithu na kesami ghena kekinyi ji aneni süpon keni nu mecang pi kekinyi ghena khaghaneni süpon kesü tsüti pi Aaron cüben.

⁶Ma amesü süpon kesü pi ma nu ma theghi kesami sen bvü thsüale kesalina ahhansha sa chiben.

⁷Tsaseng wi ma aneni keni tsü sen nu Apvüwa ketenpen Nithsüjjen kedulen wi tsü wa.

⁸Ciwi ma alon keni, kesü “Apvüwa ghena” nu kepawa “Azazel[3] ghena”, pi akezen wwi ben.

⁹Aaron na akezen wwi nu Apvüwa ghena kessikeyawa aneni tsüpi kesami ghena kekinyi hhansha saben.

¹⁰Azazel ghena kessikeyawa aneni tsü ma kahang pi Apvüwa cü nu anyithu kesami sen bvü thsüale kesalina pi yyikeshü wi Azazel wi kesun chilo.

¹¹Aaron na ma nu ma theghi ghena amesü süpon pi kesami ghena kekinyi hhansha sa kechi wi

¹²ma kekinyipen wi anni khu wi annimihi keben nu hankedemvu kemehai awha keni khuya nu sen nu Kemetha ntsawa Pen wi ghoben.

¹³Ciwi Apvüwa tuwi ma hankedemvu pi anni wi chi, nu hankedemvu nikhu ya Cenkethenjüh Khitson keshan tsü shübhon thsü, nu ma tsü mu nu nshüle kesalina.

¹⁴Ma amesü jjü tsü pahan khuya nu ma kwenzza pi tenchi pi ma keshan atuwa mi tsü keghü chi nu tsaseng wi pi Cenkethenjüh Khitson tuwi tagü tughu keghü chiben.

¹⁵Tsaseng wi ma anyithu ghena kesami ghena kekinyi neni tsü pathi, ma jjü sen nu Kemetha ntsawa Pen wi gho, nu ma kishi amesü jjü pi kesa ti tsüpi ma keshan miwi nu tsaseng wi Cenkethenjüh Khitson tuwi keghü chiben.

¹⁶Ma hati nu Israel nyithu na mathu nkemetha nu kesami wina Kemetha ntsawa Pen wi tsü satekemetha keccüna tsü sa chiben. Ma Nithsüjjen wi ha nsathu yishü, kepaghenanye tsüna keccüna wi nmethala kemnanpen non wi tsü ben,

¹⁷Aaron na Kemetha ntsawa Pen wi satekemetha keccüna sale du nu npi keshhugho chu anyi thola Nithsüjjen wi tsü nbenla. Ma khathansha wi ma ketanla ma ghena, ma theghi nu anyithu ghena keccüna tsü saya khe,

¹⁸ma mecang pi kekinyi ghena kekinyipen wi wa tsü sametha nsathu yishü. Ma amesü süpon jjü nu aneni jjü pahan khuya nu sen wa kekinyipen ghacüthu miwi chi.

¹⁹Ma kwenzza pi ajjü tenya nu pi kekinyipen miwi tagü tughu keghü chiben. Hati nu ma Israel nyithu kesami wina tsü sametha pi metha thsüaben.

²⁰Khathansha wi Aaron na keccüna sa nu Kemetha ntsawa Pen, Apvüwa ketenpen Nithsüjjen, nu kekinyipen, sametha khe ma Azazel ghena kessikeya aneni kahangwa tsüpi Apvüwa cüben.

²¹Ma akwen keni qho pi aneni li miwi chi nu Israel nyithu nkemehai, kesami, nyu kematang kekuli tsüdila khishi, nu tsüthu pi aneni li miwi chiben. Tsaseng wi anyi kesü kessi ketheng tsü yala aneni tsü jügü pi ayyikeshü wi bvü thsüa.

²²Aneni tsüna mathu kesami tsüdi pvü nu anyi hang nketen yyi wi bvüaben.

²³Tsaseng wi Aaron na Nithsüjjen wi du nu ma Kemetha ntsawa Pen wi npi kedu wi pvükeya keqhaikedi thsümeniwa tsü khushi pi ciwi chi.

²⁴Ma kemetha pen wi atssükizü nu ma thsümeni pvüya nsathu yishü. Tsaseng wi ccüna ma wala ma ketanla ma ghena nu anyithu kesami khupiale kesalina mecang pi kekinyi sa chiben.

²⁵Ma kesami ghena kekinyi sa kethu tsüpi kekinyipen miwi mecang ben.

²⁶Anyi kesü aneni jügü pi ayyikeshü wi Azazel wi wa thsü kesawa na ma kemnanpen wi npi kedu neng wina ma thsümeni ghasü nu atssükizü nsathu yishü.

²⁷ Kesami ghena kekinyi wi kesen amesü süpon nu aneni manyi jjü pi kesami sen bvü thsüale kesalina sen nu Kemetha ntsawa Pen wi keghowa sa tsü pvü wa kemnanpen na ameiwa mecang ben. Ma hyu, ma sa, ma kughung tsüdi pi mecang shaben.

²⁸Anyi tsüthu pi kemecangwa na ma kemnanpen wi npi kegho neng wina ma thsümeni ghasü nu atssükizü nsathu yishü.

²⁹ Ayen hathu hana matsü ghaketen tsüdi wila nieben. Asha tagüwa ghanan taghawa wi tsü Israel nyithu nu asang mathu gweghe hang ketenthu na zi nu kekuli katsüha lela nsala.

³⁰Tsü ghanan wi mathu kesami tsüdi satekemetha keccüna saben, isa nu mathu na keccüna wi metha shaben.

³¹Tsü tsathang tsüna kemetha tsathang, tsü ghanan wi mathu na zi nu kekuli mangla sa nben. Ayen hathu hana matsü ghaketen tsüdi wila nieben.

³²Ma ba kuti sa thsüle mehaitsü khuthipi satemetha pi keqhaikedi sa thsü kethengwa na satekemetha keccüna tsü saben. Ma keqhaikedi thsümeni pvüya

³³nu Kemetha ntsawa Pen, Apvüwa ketenpen Nithsüjjen, kekinyipen, keqhaikedithu, nu azitenti tsüdi satekemetha keccüna tsü saben.

³⁴Ayen hathu hana matsü ghaketen tsüdi wila nieben. Israel nyithu na mathu kesami tsüdi wi satekemetha keccüna ha amapi kesü wi kuti saben. Tsalina Mosa na Apvüwa kekhi ti sa.