Read Northern Rengma Naga LEVIYEN 18 Bible Online

LEVIYEN 18 - Northern Rengma Naga bible

LEVIYEN 18

¹Apvüwa na Mosa kiza nu

²Israel nyithu wi khi thsü, “Hi nthu Pvüwa Anyiza.

³Nthu na kheni kahang pen wi Ejipt nyithu nyelela hi khili nthu ssinu wa keten Kanaan yyi wi anyithu kahang kekuliyen tsü n-niela.

⁴Iyenthu nie nu hi kekhi salo. Hi nthu Pvüwa Anyiza.

⁵ Hi pi nthu kecü kahangyen nu ayenthu tsüdila nielo; tsüti kesa wina nthu kahang hangsha yaben. Hi Apvüwa.”

⁶Apvüwa na ayen hathu khuchi. Nshilithu tsü kesüla ssimehai nsala.

⁷Njja ssikemehai ghena nba nyankenyen nsala. No njja nyankenyen yishü.

⁸ Nba wubvü kesüle kesü lela ssikemehai ghena ma nyankenyen nsala.

⁹ Ntsüggüwa sale nba nga nyelela njja nga ajjen makesü nyelela kepapa wi hang keshaghawa sa lela no ma ssimehai nsala.

¹⁰Ntsangathu nga ssimehai nsala; tsüna n-nyankenyen ben.

¹¹No nba wubvü ngawa ssimehai nsala; ma la ntsüggü kesü.

¹² Anyie, nba tssüggü sale njja pvünon sa lela ssimehai nsala.

¹⁴Nbiza wubvü ssimehai nsala; ma la njja kesü.

¹⁵ Ncünyie ssimehai nsala.

¹⁶ Ncüh ssimehai nsala.

¹⁷ No nza kesü pi ma ngawa manyi qho ssimehai nsala; mathu na nshilithu saben laya mehai, nu tsüna nankiqanan kekuli saben.

¹⁸Nwubvü na hang keben chu ma pvünonwa yapi nwubvü kesü nsala.

¹⁹ Nza kesü asha kaghapeng nzayen sa keben wi ma ssimehai nsala, kepaghenanye ma keccüna wi nmetha laben.

²⁰ Nyu kepa wi wubvü ssimehai nsala, tsüna no sapi keccüna wi nmetha thsü laben.

²¹ Ntsangathu kesütanla pi Molek tsaghang kekinyi nsen thsüla; kepaghenanye tsüna Apvüwa Anyiza nyankenyen sengho ben.

²²Npvüza kesü na npvüza kepawa ssimehai nsala; Anyiza na tsü nanmeghüden.

²³Nzale npvüza lela asahang ssimehai nsala; kesazzi tsü no sapi keccüna wi nmetha thsü laben.

²⁴Kekuli hathu ha kesa wina nthu ketanla nthu sapi nmethala nsala, kepaghenanye Anyiza nkechüthu na hati nu mathu ketanla mathu sapi nmethala; Anyiza nkechüthu tsüna nthu tuwi na ayyi ciwi hang wadha nu nthu yala ciwi duya thsüle kesalina Apvüwa na mathu jügüshiaben.

²⁵Mathu kahangyen na ayyiwa tsü sapi nmetha thsüla, tsalina Apvüwa na kemeten pi cü nu ayyiwa tsü ya anyi ciwi kahangthu meshusha thsüa.

²⁶Mathu na nankiqanan kekuli ha tsüdi sapi ayyiwa nmetha thsüla, isala nthu tsü tsüthu tsü nsala. Nthu tsüdi, Israel nyithu sale asang nthu gweghe hang kebenthu sa lela Apvüwa yenthu nu ma khi kechithu tsü n-niethu yishü,

²⁸nu ayyiwa na nthu tuwi kahang Anyiza nkechüthu meshusha kesa ti nthu la meshusha nsa thsüla.

²⁹Anyi thowa na nankiqanan kekuli hathu ha sa khe ma pi Anyiza nyi kesüle nsa laden.

³⁰Apvüwa na khi, “Hi ayen khukechithu tsü nielo nu anyi nthu tuwi na ayyi ciwi hang ketenthu kekuli yen tsü n-niela, nu hathu ha kekuli ghena nthu sapi nmethala nsala. Hi Apvüwa nthu Nyiza.”