Read Northern Rengma Naga LEVIYEN 21 Bible Online

LEVIYEN 21 - Northern Rengma Naga bible

LEVIYEN 21

¹Apvüwa na Mosa kiza nu Aaron nyi keqhaikedithu wi khi thsü, “Keqhaikedi kesüla ma shili keshü wi kevhü keccüna kekuli sa nu ma ketanla ma sapi nmetha thsüla nsala,

²tsüna ma ba, ma jja, ma tsa, ma nga, ma cünyuwa,

³nyelela ma tssüggüwa na ma jjen wi hang nu npi n-nukewa nkenye tsü.

⁴Ma shilithu keshü wi ma ketanla ma sapi nmethala nsala.

⁵ “Keqhaikedi kesüla ma nonke-ü pi nyu ccücale kesalina ma lica, apang kenye ce nyelela ma sa handhi pvü tsüti sa nben.

⁶Ma metha nbenthu yishü, nu inyankenyen nsala. Ma atsse pi kekinyi sapi hi cü keten ghena ma metha nbenthu yishü.

⁷Keqhaikedi kesü na nza keqheza menkedsa nyelela pvünyimetha nkenye nyelela nyu ma yisha kesa nyi yaya nben, ma metha kesalina.

⁸Anyithu na keqhaikediwa tsüna methale nsathu yishü, kepaghenanye ma atsse pi kekinyi sapi hi cüden.

⁹Keqhaikedi kesü nga na keqheza menkedsa sa wa lethu ma ma ba nyankenyün ben; ma pi mecangthiaben.”

¹⁰Keqhaikedi ntsawa tsüna adeli pi ma li wi keshusha chi nu ma satemetha pi keqhaikedi thsümeni pi pvü thsü theng, tsalina ma anonkegü ghena ma li mehhe nyelela ma thsümeni mezüqhe pvü nsala.

¹¹Ma khuthipi satemetha pi hi wi chidha, tsalina ma ketanla keccüna wi ma sapi nmetha nyelela hi kemetha Nithsüjjen teshi nu keshü jjenwi kedu ghena tsü nakhiya nben, tsüna ma ba nu ma jja na shü ben lela.

¹³Ma pvünyimetha kesü yapi ma wubvü saben,

¹⁴denyile nyelela nyu ma yisha kesa nyelela keqheza menkedsa nyi yaya nben. Ma ma mizza wi pvünyimetha ketan yaben.

¹⁵Nyelethu ma tsangathu metha kesathu tsüna keccüna wi nmetha laben. Hi, Apvüwa nu hi ma khuthipi Keqhaikedi ntsawa sa thsüdha.

¹⁶Apvüwa na Mosa kiza nu

¹⁷Aaron wi khi thsü, “Nshicü nyu ghojünkeya nyi kesüla atsse pi hi wi kekinyi sakeya nmi. Matsü ghaketen tsüdi wila ha nieben.

¹⁸Anyi kesüla hathu ha ma miwi ben nu nyu ghojünkeya nyi na kekinyi saya nben: anyon nkemu, accükiccü, atsikemili nyelela atsi yasakesa;

¹⁹akwen nyelela accü nkemehai nyi;

²⁰ageshikiccü nyelela kenonen nyi; anyon nyelela ahyu wi khumakhujü kepvü nyi; amca sa kesa nyi.

²¹Aaron shicü keqhaikedi kesüla nyu ghojünkeya nyi na atsse pi hi wi kekinyi sakeya nmi.

²²Hati kesa nyi na pi hi kekinyi tsse kemethawa nu kemetha ntsawa la dsaya mehai,

²³isala ma nyu ghojünkeya nyi ghena ma kemetha keshonthsü nyelela kekinyipen tsü tetsaki ghoya nben. Ma kemetha hathu nyankenyen yishü, kepaghenanye hi Apvüwa, hi tsüthu sapi metha thsüle.”

²⁴Mosa na hawa ha khipi Aaron, Aaron tsathu, nu Israel nyithu tsüdila kiza.