Read Northern Rengma Naga LEVIYEN 22 Bible Online

LEVIYEN 22 - Northern Rengma Naga bible

LEVIYEN 22

¹Apvüwa na Mosa kiza nu

²Aaron nu ma tsathu wi khi thsü, “Nthu inyan kemethawa nyankenyen nsale kesalina Israel nyithu na hi wi kemetha kekinyi sa kechi tsü kinyikü tenlo. Hi Apvüwa.

³Nshicüthu kesüle kesü lela ma keccüna wi nmethala keben wi Israel nyithu na kemetha kekinyi sapi hi wi kechi tsü kete wi gho lethu, ma khiela kekinyipen wi kekuli sa neng nbendha. Matsü ghaketen tsüdi wi ha nieben. Hi Apvüwa.

⁴“Aaron shicü kesüla ma gwo wi agükedsakenaa nyelela ma gwotssü keji kebenwa ma keccüna wi npi kemetha chu kemetha kekinyi tsse tsü dsakeya nmi. Keqhaikedi kesüle kesü lela ma nkemetha kamang nyelela anyi kesü ma gwotssü keji keben

⁵nyelela asahang nyelela anyi nkemethawa pa lethu ma nmetha ladha.

⁶Anyi kesüle kesü lela nmethala kesawa ma minulen wi kecu nmethala benben, nu ma atssükizü nkesa chu kemetha kekinyi tssewa tsü dsaya nben.

⁷Aghani na kedu seng wi ma methadha, nu ma ma tsse kemetha kekinyiwa tsü dsaya mehai.

⁸Ma asahang ma ketanla keshü sa nyelela ameseng-maghang mangla dsa nben, tsüna ma sapi nmetha thsüla shaben. Hi Apvüwa.

⁹“Keqhaikedithu tsüdila hi ayen khukechithu ha nieben. Nyelethu mathu na sazzi lethu shüaben, kepaghenanye mathu na ayen kemetha tsü n-niela. Hi Apvüwa hi mathu sapi metha cüden.

¹⁰“Keqhaikedi theghi ketan khe kepa wi thola kemetha kekinyi tssewa tsü dsakeya nmi — keqhaikediwa gweghe benketen kijünyi le, ma denga sen keten nyi sa lela.

¹¹Isala keqhaikediwa maghawa ma jjen wi kepvügha nyile nyelela ma apisa pi shükeya nyi sa lela keqhaikediwa na mukeya tsse tsü dsaya mehai.

¹²Keqhaikedi nga keqhaikedi nkenye wi n-nuwa kesawa na kemetha kekinyi tsse tsü dsakeya nmi.

¹³Isala ma nga nza denyile nyelela nyu ma yisha kesawa atsanga nmila kheneng gho ma ba jjen wi kheni ti hang wa lethu ma ba na keqhaikedi tsse mukeya tsü dsaya mehai. Keqhaikedi theghi ketan tsü dsaya mehai.

¹⁴“Keqhaikedi theghi nkenye anyi kesü aghandu nyela kemetha kekinyi tsse tsü dsaya lethu, ma tsü mithon tsü miwi gishü meza wi ngwe pi keqhaikediwa dhineng nsathu yishü.

¹⁵Keqhaikedi na Israel nyithu na pi Apvüwa kecüthu kemetha kekinyi tsse tsü nakhi thsü yishü,

¹⁶tsüna anyi ghameme yala tsüthu kedsa wina: hana kesazzi nu kemeten sengho anyi tsüwa cüben. Hi Apvüwa nu hi kekinyi tsü sapi metha cüden.”

¹⁷Apvüwa na Mosa kiza nu

¹⁸ayen hathu pi Aaron, ma tsathu, nu Israel nyithu tsüdi cü thsü. Khathansha wi Israel nyithu le asang Israel nyithu jawi hang kebenthu sa lela mecang pi kekinyi sa khe, tsüna ajühkhukechi kesacen sale kenen wina kekinyi sa lela, asahangwa tsüna nyu ghojünkeya mangla nkemi nsathu yishü.

¹⁹Kekinyiwa tsü yaya thsüle kesalina asüpon nyu ghojünkeya mangla nkemi nsathu yishü.

²⁰ Keujüla nthu na asahang nyu ghojünkeya kepvü pi kinyi lethu Apvüwa na tsü ya nben.

²¹Khathansha wi anyi kesü kecca ghena kekinyi sapi Apvüwa cü khe tsüna ajühkhukechi kekinyi sale kenen wina kekinyi sa lela tsü keya sa thsü qo lethu asahang nyu ghojünkeya mangla nkemi pi nsathu yishü.

²²Asahang anyon nkemu, accü nkemehai, nyelela accükiccü, nyelela ma gwo wi ayisü, nyelela kekhuma kaghapvüwa keben pi Apvüwa nkinyila. Asahang hati kesa pi kekinyipen wi atsse pi kekinyi ti nsala,

²³Nthu kenen wina kekinyi kesa wi asahang bvüccenwa nyelela nyu ghojünkeya la pi kinyiya, isala ajühkhukechi kesacen kekinyi witsü tsüthu tsü yaya nben.

²⁴Asahang ma mca sa nyelela pacha kesa pi Apvüwa nkinyila. Nthu yyi wi hati sakeya nmi.

²⁵Atsse pi kekinyi kesa wi asahang asang wi sen kegho pi nkinyila. Asahang tsüti kesa tsüna nyu ghojünkeya le sa nu tsü ya nben.

²⁶Khathansha wi amesü zza nyelela khaghaneni zza nyelela aneni zza ca khe ghanan tagü npi kecen tsü ma bvü wina tsü ssi nbvüla, isala tazen ghanan nten tsüpi atsse pi kekinyi sathu yaya mehai.

²⁸Atsathang kesü wi amesü, khaghaneni, aneni lela bvütsanyi pi ahhansha nsala.

²⁹Nthu na Apvüwa nkesengcha ghena ahhansha kesa wi nthu kekinyi tsü yaya thsüle kesalina mayenthu tsü mehaitsü nielo,

³⁰atsse tsü dsatu pi dhitsüwa wi nthengla nu tsü ghanan dsakhilo.

³¹Apvüwa na khi, “Iyen khukechithu tsü nie yalo; Hi Apvüwa.

³²Inyan kemethawa tsü nyankenyen nsala. Hi methale kesa Israel nyithu tsüdila nchüthu yishü. Hi Apvüwa, hi nthu sapi metha cüden;

³³nu nthu Nyiza sale hi Ejipt wina nthu ssi shhugho le. Hi Apvüwa.”