Read Northern Rengma Naga LEVIYEN 26 Bible Online

LEVIYEN 26 - Northern Rengma Naga bible

LEVIYEN 26

¹Apvüwa na khi, “Nthu atsikezhü nyelela atsiketon, alon kesheng nyelela alon miwi palazhü nu nkinyila. Hi Apvüwa nthu Nyiza.

²Keccüna kho kesathu tsü nie nu hi kinyi keten pen tsü nyuwakü yalo. Hi Apvüwa.

³ “Nthu na ijühya nu iyenkhukechithu tsü nie nu hang lethu,

⁴hi matsü wina atsankegho kesun pi nthu wi chicü nu ayyi wi yangdsa ketenthu nu achanthu ya ma bi bünya thsüden.

⁵Nthu kedsakejjü na meshumena sa nu alli wwitu keben wi kemeshentsse bi tsü la qo wa, nu kemeshentsse bi latu keben wi alli kechi tsü cu wa isaben. Nthu na kedsa mvu tsüdi benya, nu nthu na nthu yyi wi yazishu hangyaben.

⁶“Hi kecca sengho nthu yyi wi chicü, nu nthu na kemessi nmila cca jen yaben. Hi nthu yyi wi aghangsa nkemehaithu jügüshi, nu ciwi aghi nmila shaben.

⁷Nthu na nthu ghinyithu miwi khangyaben;

⁸nthu meshu manga na meza chaya, nu meza na hazar tagha chaya mehai.

⁹Hi kesawegü pi nthu cü nu atsanga kejon pi nthu cüben; hi nthu ssinu cenkethenjüh tsü nieben.

¹⁰Nthu na apvüya ntsa sa nu tsüna amapi chuli kedsa saya, nu asu ketheü kechipen sayale kesalina kaghawenwa lela pi khala shaben.

¹¹Hi nthu jawi kemetha Nithsüjjen wi hang nu hi khie wila nthu teshi nben.

¹² Hi nthu ssibenden; nthu na inyithu sa nu hi nthu Nyiza saden.

¹³Hi Apvüwa nthu Nyiza, nthu na nyu nssümagha sa nben thsü le kesalina hi Ejipt wina nthu ssi shhugho. Hi nthu ghanten keben kekhangwa tsü pakhhi nu nthu ya meshonmeyaqhe alentsen bvü thsüa.”

¹⁴Apvüwa na khi, “Nthu na ijüh khukechithu tsü nkina lethu, nthu na ketizen saben.

¹⁵Nthu na ijüh khukechithu nu iyenthu nkina mvu nu hi nthu ssinu cenkethenjüh tsü pakhhi lethu,

¹⁶hi kemeten pi nthu cüben. Hi ketizenkesa sen nu nthu miwi ghoden — khumakhujü ma nkeya nu kinaa na nthu nyon sapi nmuthsüla nu nthu kahang ma men nkemi saben. Nthu na amacü pi alli wi chi lela tsüna mehai nben, nthu ghinyithu na nthu miwi khangya nu nthu keben tsü dsaaben.

¹⁷Hi nthu shun lethu nthu na nyu nchala nu nthu ghinyithu na nthu miwi kekhang senben; nthu na qhethiketen nu thola nthu njügü lela nthu na nyu tu bvüben.

¹⁸“Keujüla hati kesa seng wi lela nthu na ijüh nkina mvu lethu, hi nthu kemetenwa tsü sapi tagü tughu jikayi thsüaben.

¹⁹Hi nthu lebenkedhu kekapvüwa tsü yasa cüben; ciwi atsan na nghola nu nthu yyi na keqha pi amighe kekhang ti saaben.

²⁰Nthu piketsü tsüna nthu ghena kemehai nmila shaben, kepaghenanye nthu yyiwa wi yangdsa keten nu achanton na ma bi nbün laben.

²¹“Keujüla nthu na tsü miwi la hi kaghanineng nu ijüh nkina mvu lethu, hi kheneng nthu kemetenwa tsü sapi tagü tughu jikayi

²²Hi aghangsa nkemehaithu kesun pi nthu jawi chi nu tsüthu na nthu tsangathu ghan, nthu sahangthu yasa, nu nthu keu ketan sa kesalina nthu alenthu teshishan shaben.

²³“Kemeten hathu tsüdi miwi la nthu na ijüh nkina mvula hi shun lethu,

²⁴tsaseng wi hi nthu miwi gho kheni miwi kemeten kedhuki tagü tughu sa cüben.

²⁵Nthu na ithu cenkethenjüh tsü pakhhi kesalina hi aghi sengho nthu metenmesha, nu nthu na wa yazishu kesa nyunutithu wi saghu wa lethu, hi khumakhujü ma nkeya kesun pi nthu jawi chi nu nthu meten pi nthu ghinyithu kwen wi du thsüaben.

²⁶Hi kedsakejjü pi nthu ncüla, isa nu nza meshu tagha na annibhon kesütan wi mathu keben tsüdi pi amesa gü waaben. Mathu na tsü whu pi nthu cüben, nthu na tsüthu tsüdi dsaya lela ghama benden.

²⁷“Keujüla nthu na tsü miwi la hi shun nu ijüh nkina mvu lethu,

²⁸tsaseng wi hi ileben minu nu nthu wi gho kheni miwi kemeten kedhuki tagü tughu sa cüben.

²⁹Nthu na khwenthi keten sa nu nthu ketanla nthu tsangathu ghan dsaaben.

³⁰Hi ayikha wi nthu na kinyi keten penthu tsü yasa, hankedemvu pi kekinyipenthu tsü pakhhi, nu nthu kamang pi nthu tsikezhüthu na khuli keben kete wi khalachiaben. Hi inonkehi wina

³¹nthu nyunutithu yasa, nthu kinyi keten pen yasa, nu nthu na ahhansha sa kechiwa tsü meya laaben.

³²Hi nthu yyiwa tsü yasatha sa nu nthu ghinyithu ciwi kebenthu ya tsüghena qhethiketen sa thsüden.

³³Hi aghi sengho nthu jügü zighe pi asang yyi wi bvü thsü; nthu nyunutithu yasa nu nthu yyiwa tsü yisha thsüaben.

³⁴Isathu nthu na teshi nkesa yyiwa tsüna mehaitsü kemnan mapi saya ben; nthu kushi pi nthu ghinyithu yyi wi keben jü tsü teshi pi mnanya thsüden.

³⁶“Nthu thothu na kushiyyi wi ben khe hi nthu sapi qhethiketen sa thsü nu ameghü na aghangwa kemosha hhai lela messi nu bvü thsüden. Nthu na aghi tukebvü ti bvü, nu aghinyithu na nthu kete wi nmi lela nthu na khuli thsüaden.

³⁷Anyi thola nthu njügü lela nthu na khokho ccü kemeshüli nu khuli, nu nthu ghinyithu ssikaghashenya nben.

³⁸Nthu na kushiyyi wi shü nu nthu ghinyithu yyi na nthu mejiaben.

³⁹Nthu anyi kezeng-u ketan ghinyithu yyi wi hang keben tsüna nthu ketanla nthu nu nthu bamyithu kesami ghena dediaben.

⁴⁰“Isala nthu shicüthu na mathu kesami nu mathu bamyithu na hi kaghanineng nu matang kesa ghena

⁴¹hi mathu shun nu kushi pi mathu ghinyithu yyi wi kesunchi kesa kesami tsü khishiben. Asakhen wi nthu shicüthu na mathu kesami nu kematang kutimen mukeya seng wi mathu satemeni chi lethu,

⁴² hi Jakob, Isak, nu Abraham ssinu cenkethenjüh tsü meshenchi nu ayyi pi inyithu cüle ijüh khuchi kethengwa tsü sa nengben.

⁴³Isani, atuwa sa ayyiwa wi anyithu nben thsü la nu tsü ya mehaitsü mnanya thsüten, nu mathu na iyenthu nu ijüh khukechithu hhaghe kesa kutimen nmu thsüthu yishü.

⁴⁴Isala mathu na ghinyithu yyi wi keben wi lela hi mathu teshi nu yasatha sa nben, isalethu hi Apvüwa mathu Nyiza na mathu ssinu cenkethenjüh tsüpi asakhen sa keben ghena.

⁴⁵Hi Apvüwa, mathu Nyiza sale kesalina hi kekhang pi mizzatenti tsüdi ccüca nu Ejipt wina inyithu ssi keshhugho wi mathu bamyithu ssinu cenkethenjüh tsü saneng den.”

⁴⁶Ayenthu nu ajühkhukechithu ha tsüdila Apvüwa na Israel nyithu ghena Sinai Yikha wi pi Mosa kecü.