Read Northern Rengma Naga LEVIYEN 3 Bible Online

LEVIYEN 3 - Northern Rengma Naga bible

LEVIYEN 3

¹Anyi kesüle kesü lela ma mesüsi pi kecca ghena kekinyi sa lethu tsüna amesü ghala nyelela asüpon nyu ghojünkeya mangla nkemi saben.

²Anyi tsüwa na ma kwen chang pi asahang miwi chi nu tsüpi Apvüwa ketenpen Nithsüjjen kedulen wi pathi ben. Aaron nyi keqhaikedithu na ajjü tsüpi kekinyipen ccügwen mejü wi keghü chi,

³nu asahang sa hathu pila atsse pi Apvüwa kekinyi sala khuchi: ma pvüsheng kethu tsüdi,

⁴ma megen ma miwi kethu kebenthu, nu ma mechen kemehai ntsa.

⁵Keqhaikedithu na ha tsüdi pi mecang pi kekinyi gweghe kekinyipen miwi mecang ben. Apvüwa na atsse pi kekinyi hawa han nenden.

⁶Keujüla khaghaneni nyelela aneni pi kecca ghena kekinyi sa lethu asüpon nyelela aghala lela saya mehai, isala nyu ghojünkeya mangla nkemi nsathu yishü.

⁷Keujüla anyi kesü khaghaneni khuchithu,

⁸ma kwen chang pi asahang li miwi chi nu Nithsüjjen tuwi na tsü pathi ben. Keqhaikedithu na ma jjü tsüpi kekinyipen ccügwen mejü tsüdi wi keghü chiben,

⁹nu asahang sa hathu pila atsse pi Apvüwa kekinyi sala khuchi: ma kethu, ma ghanu-kisü, ma kanku ghatsan kethu tsüdi, ma pvüsheng wi kethu tsüdi,

¹⁰ma megen nu ma miwi kethu kebenthu, nu ma mechen kemehai ntsa.

¹¹Keqhaikedi kekuli sa kebenwa na ha tsüdi pila atsse pi Apvüwa kekinyi sala pi kekinyipen miwi mecang ben.

¹²Keujüla anyi kesü aneni khuchithu,

¹³ma kwen chang pi asahang li miwi chi nu Nithsüjjen tuwi na tsü pathi ben. Keqhaikedithu na ma jjü pi kekinyipen ccügwen mejü tsüdi wi keghü chiben,

¹⁴nu ma sa hathu pila atsse pi kekinyi sala pi Apvüwa cüben; ma pvüsheng wi ma kethu tsüdi,

¹⁵ma megen nu ma miwi kethu kebenthu, nu ma mechen kemehai ntsa.

¹⁶Keqhaikediwa na ha maben pi kekinyipen miwi mecang nu atsse pi kekinyi sala Apvüwa kenen saben. Ma pvüsheng kethu tsüdila Apvüwa ji.

¹⁷Israel nyithu na ma pvüsheng kethu nyelela ajjü dsakeya nmi; hawa ha ayen, Israel nyithu tsüdi kahe wi hang lela anuphanla ha nieben.