Read Northern Rengma Naga LEVIYEN 4 Bible Online

LEVIYEN 4 - Northern Rengma Naga bible

LEVIYEN 4

¹Apvüwa na ahza pi Mosa cü,

²nu Israel nyithu wi kiza thsü, anyi kesüle kesü lela aghandu nkenye wi sami nyelela Apvüwa yenkhuchithu pakhhi lethu ayen hathu ha nieben.

³Keujüla keqhaikediwa na sami nu kesazzi sengho anyithu miwi chi lethu ma amesü zza asüpon nyu ghojünkeya mangla nkemi sengho ma kesami ghena ahhansha sapi Apvüwa wi chiben.

⁴Ma amesü süpon tsü ssinu Nithsüjjen kedulen wi gho ma kwen chang pi tsü li miwi chi nu ciwi Apvüwa tuwi na tsü pathi ben.

⁵Tsaseng wi keqhaikediwa na amesü jjü tsü pahan khuya nu sen nu Nithsüjjen non wi du.

⁶Ma kwenzza pi ajjü non wi tsü tenchi nu pi keshonthsü kemetha tuwi tagü tughu keghü chiben.

⁷Tsaseng wi ma ajjü pahan sen wa Nithsüjjen non wi ma ccügwen wi hankedemvu pi kekinyipen ghacüthu miwi chiben. Ma ajjü ma gilli tsüpi Nithsüjjen kedulen wi ahhansha kesa kemecang wi sen keten kekinyipen donbvü ccü wi keshu chiben.

⁸Ma amesü süpon ha gwo wi ma kethu tsüdi, ma pvüsheng wi kethu,

⁹ma megen nu ma miwi kethu kebenthu, nu ma mechen kemehai ntsa khuya ben.

¹⁰Keqhaikediwa na ma kethu ha khusen wa mecang pi kekinyi wi sen keten kekinyipen miwi mecang ben, tsüna ma kecca ghena kekinyi sa pathi nu ma kethu pi kekuli tsü makesü saben.

¹¹Isala ma asa ma hyu, ma sa tsüdi, ma li, ma ccüthu, ma pvüsheng, ma kughungthu saghu,

¹²tsüdi khusen wa kemnanpen na ameiwa ajuwen pi keshusha keten kemetha pen wi achan miwi chi nu anni pi mecang ben.

¹³Keujüla tsüna Israel nyithu mabenla aghandu nkenye wi sami nu Apvüwa yenkhukechithu kesü kepakhhi ghena sazzi lethu,

¹⁴kesami tsü chüya meyi anyi tentiwa na kesami ghena kekinyi amesü süpon kesü sengho ben. Mathu na tsü ssinu Nithsüjjen wi Apvüwa tuwi gho ben;

¹⁵accülikesathu na mathu kwen chang pi asahang tsü li miwi chi nu ciwi tsü pathiben.

¹⁶Keqhaikedi ntsathu na asa jjü pahan khusen Nithsüjjen wi du,

¹⁷ma kwenzza pi ajjü tsü non wi tenchi nu pi keshonthsü tuwi tagü tughu keghü chiben.

¹⁸Ma ajjü pahan sen wa Nithsüjjen non ma ccügwen wi hankedemvu pi kekinyipen ghacüthu miwi chi nu ajjü ma gilli tsüpi Nithsüjjen kedulen wi ahhansha kesa kemecang wi sen keten kekinyipen donbvü ccü wi keshu chiben.

¹⁹Tsaseng wi ma sa kethu tsüdi khusen wa tsüpi kekinyipen miwi mecang ben.

²⁰Ma amesü süpon pi kesami ghena kekinyi kesa tsü makesü amesü süpon ha la pi tsüti saben. Ma hati nu anyithu kesami ghena ahhansha sa chithu mathu kesami teshi pi cüaben.

²¹Tsaseng wi ma amesü süpon tsü ssi shhula kemnanpen na ameiwa ma kesami ghena amesü süpon pi kemecang tsüti tsüpi mecang ben. Hawa ha anyi tenti kesami tsü sen bvüale kesa ghena kekinyi kesü.

²²Keujüla tsüna kekhang kesen nyi kesü aghandu nkenye wi sami nu Apvüwa yenkhukechithu kesü kepakhhi ghena sazzi lethu,

²³ma ma kesami tsü chüya meyi, ma kekinyi ghena aneni süpon nyu ghojünkeya mangla nkemi kesü sengho ben.

²⁴Ma kwen chang pi asahang tsü li miwi chi nu kekinyipen na aghawa mecang pi kekinyi sahang kepathi pen witsü tsü pathiben. Hawa ha kesami sen bvüale kesa ghena kekinyi kesü.

²⁵Keqhaikediwa na ma kwenzza pi asahang jjü witsü tenchi, nu tsüpi accügwen wi kekinyipen ghacüthu miwi chi, nu ajjü ma gilli tsüpi kekinyipen donbvü ccü wi keshu chi ben.

²⁶Tsaseng wi ma asa kethu tsüdi pi kekinyipen miwi mecang ben, tsüna ma kecca ghena kekinyi sa pathi nu ma kethu pi mecang kesa tsü makesü saben. Hati nu keqhaikediwa na kekhang kesen wa kesami ghena ahhansha sa chithu ma kesami teshi pi cüaben.

²⁷Keujüla tsüna anyi jümu kesü aghandu nkenye wi sami nu Apvüwa yenkhukechithu kesü kepakhhi ghena sazzi lethu,

²⁸ma ma kesami tsü chüya meyi, ma kekinyi ghena aneni ghala nyu ghojünkeya mangla nkemi kesü sengho ben.

²⁹Ma kwen chang pi asahang tsü li miwi chi nu kekinyipen na aghawa mecang pi kekinyi sahang kepathi pen witsü tsü pathi ben.

³⁰Keqhaikediwa na ma kwenzza pi asa jjü witsü tenchi, nu tsüpi accügwen wi kekinyipen ghacüthu miwi chi, nu ajjü ma gilli tsüpi kekinyipen donbvü ccü wi keshu chiaben.

³¹Tsaseng wi ma kecca ghena kekinyi sa pathi nu ma kethu khupi kesa tsüti asa tsü kethu tsüdila khupia, nu ma tsü sen wa kekinyipen miwi mecang nu Apvüwa na ma han tsü nenben. Hati nu keqhaikediwa na anyi tsüwa kesami ghena ahhansha sa chithu ma kesami teshi pi cüaben.

³²Keujüla anyi kesü ma kesami ghena kekinyi khaghaneni sengho lethu tsüna aghala nyu ghojünkeya mangla nkemi nsathu yishü.

³³Ma kwen chang pi asahang tsü li miwi chi nu kekinyipen na aghawa mecang pi kekinyi sahang kepathi pen witsü tsü pathi ben.

³⁴Keqhaikediwa na ma kwenzza pi ajjü witsü tenchi, nu tsüpi accügwen wi kekinyipen ghacüthu miwi chi, nu ajjü ma gilli tsüpi kekinyipen donbvü ccü wi keshu chiaben.

³⁵Tsaseng wi ma kecca ghena kekinyi sa pathi nu ma kethu khupi kesa tsüti asa tsü kethu tsüdila khupi, nu ma tsüpi atsse pi kekinyi sapi Apvüwa kecü tsü saghu pi kekinyipen miwi mecang ben. Hati nu keqhai- kediwa na anyi tsüwa kesami ghena ahhansha sa chithu ma kesami teshi pi cüaben.