Read Northern Rengma Naga LEVIYEN 6 Bible Online

LEVIYEN 6 - Northern Rengma Naga bible

LEVIYEN 6

¹ Apvüwa na ayen hathu pi Mosa cü.

²Keujüla anyi kesü ma pvüshang Israel nyiwa na pi cü ketheng tsüpi nccüneng mvula nyelela ma wi pala pahan ghanfüya nyelela ma mechu nyelela pala pahan bhatagha kesa tsü ghena milimesa nu ma tsü nmule khi nu kekishen wina sami pi Apvüwa shun lethu ma kekinyi kesü saben.

⁴Khathansha wi anyi kesü na ma alen hathu kesü wila sami khe, ma atsentsa nkenye wina mangwa muya khe tsü dhineng ben. Ma sazzidha kesa chükeya ghanan wi ma mithon tsü mi gishü meza wi ngwe pi wwa pi ma pvüwa ndhinengthu yishü.

⁶Ma Apvüwa wi kedhineng kekinyi ghena khaghaneni nyelela aneni süpon kesü nyu ghojünkeya mangla nkemi sen nu keqhaikediwa wi ghoben. Ma men tsüna tsü tsüwi apisa men kenie wina khidhi ben.

⁷Keqhaikediwa na anyi tsüwa kesami ghena ahhansha sa chithu ma kesami teshi pi cüaben.

⁸Apvüwa na Mosa kiza,

⁹mecang pi kekinyi yenthu hapi Aaron nu ma tsathu cü thsü. Mecang pi kekinyi tsüpi aghaja thangthang kekinyipen miwi chi, nu anni ya tsü mecangki ben thsüben.

¹⁰Keqhaikediwa na linen gwomejuwa kaghazu nu patono kenkhangwa pvüya nu kekinyipen miwi mecang pi kekinyi khala tsü khupi nu tsüthu pi kekinyipen kete wi chiaben.

¹¹Tsaseng wi ma thsümeni kemiliya nu kemecang khala tsü khusen shhula kemnanpen na ameiwa kemetha pen wi chi.

¹²Kekinyipen wi anni tsüna n-nün thsüla mecangki ben thsü. Ghanen kaghapenla keqhaikediwa na achan pi anni miwi chi, mecang pi kekinyi ghena kecükepeng pi ma miwi chi, nu kecca ghena kekinyi ma kethu tsü pi mecang.

¹³Kekinyipen wi anni tsüna n-nün thsüla keshüthangla mecangki ben thsü.

¹⁴Hathu ha asu pi kekinyi yen. Aaron nyi keqhaikedi kesü asu pi Apvüwa wi kekinyi tsüna kekinyipen tuwi saben.

¹⁵Tsaseng wi ma awheng awha kesü, adeli, nu ma miwi hankedemvu tsü khuya nu tsü maben pi Apvüwa cüdha le kesa zensu wina tsüpi kekinyipen miwi mecang. Apvüwa na kekinyi ha kemecang han nenden.

¹⁶Keqhaikediwa na ma gilli tsü dsaben. Tsüna azimi pi nchila amesa gü nu Apvüwa ketenpen Nithsüjjen ccühha kemetha pen wi tsü dsaben. Atsse pi kekinyi tsü Apvüwa na keqhaikedithu shei sapi mathu cüdha. Tsüna kesami ghena kekinyi nu kedhineng kekinyi ti metha ntsawa.

¹⁸Abvüye shagha keten tsüdi wi Aaron shicü npvüzathu na atsse pi Apvüwa kekinyi mathu shei tsü dsaben. Anyi kesüle kesü lela atsse pi kekinyi tsü kidhen lethu tsü kemetha kekhangwa tsüna ma patena ben.

¹⁹Apvüwa na ayen hathu pi Mosa cü,

²⁰tsüna Aaron nyi keqhaikedi kesü khuthi pi satekemetha ghena. Ma khuthi pi satekemetha ghanan wi ma awheng kilogram kesü, (ghanan kaghapen asu pi kekinyi tsü meceqe) pahan pi aghanen nu pahan pi shitawa wi tsüti Apvüwa wi kekinyi saben.

²¹Adeli pi tsü saghuya nu kegü khu kesü wi güya nu tsü pakhhi paghe pi asu pi kekinyi kesü ti sa, Apvüwa na ma han tsü nenden.

²²Abvüye shagha keten tsüdi wi Aaron shicü tsüdi Keqhaikedi ntsa sa kebenwa na kekinyi ha saben. Tsüna ahhansha sapi Apvüwa kecü ti mecangtha saben.

²³Keqhaikediwa na asu pi kekinyi kesa tsü keula ndsala maben pi mecang shaben.

²⁴Apvüwa na Mosa kiza,

²⁵kesami ghena kekinyi yenthu hapi Aaron nu ma tsathu cü thsü. Kesami ghena kekinyi sahang tsüpi kekinyipen na aghawa mecang pi kekinyi sahang pathi keten pen witsü pathiben. Hawa ha kekinyi kemetha ntsa kesü.

²⁶Asahang pi ahhansha sa keben keqhaikediwa na Apvüwa ketenpen Nithsüjjen ccühha kemetha pen wi tsü dsaben.

²⁷Anyi le atsanqai lela asahang sa tsü kidhen lethu tsü kemetha kekhangwa tsüna ma patena ben. Keujüla asa jjü na athsümeni miwi kaki lethu tsü sen wa ghasülo.

²⁸Ayyipfü pi asa tsü shvu lethu tsü pacha, nu amighepfü sen lethu tsü mese nu atssü pi qhu pilo.

²⁹Keqhaikedi theghi npvüza kesüle kesü lela kekinyi tsse ha dsaya mehai; ha metha ntsawa.

³⁰Isala keujüla ajjü sengho Nithsüjjen non wi kesami sen bvüale kesa keccüna sathu, asahang tsü ndsala tsüpi mecang nsathu yishü.