Read Northern Rengma Naga LEVIYEN 7 Bible Online

LEVIYEN 7 - Northern Rengma Naga bible

LEVIYEN 7

¹Ha kedhineng ghena kekinyithu yen, tsüthu na metha ntsawa.

²Kekinyi ha ghena asahang tsüpi kekinyipen na aghawa mecang pi kekinyi sahang pathi keten pen wi tsü pathi ben, nu ma jjü tsüpi kekinyipen ccügwen mejü tsüdi wi keghü chi.

³Ma kethu tsüdila khupia, nu pi kekinyipen miwi kinyi: ma ghanu kethu, ma pvüsheng kemeju kethu,

⁴ma megen nu ciwi ma kethu, nu ma mechen kemehai ntsawa.

⁵Keqhaikediwa na ma kethu maben pi kekinyipen miwi atsse pi Apvüwa wi kekinyi ti mecang ben. Hana kedhineng kekinyi kesü.

⁶Keqhaikedi theghi npvüza kesüle kesü lela ha dsaya mehai, isala tsüpi kemetha pen wi dsaben, kepaghenanye tsüna metha ntsawa.

⁷Ciwi ayen kesü tsüna kesami ghena kekinyi nu kedhineng kekinyi ghena la saben: asa tsüna keqhaikedi ahhansha sa kechiwa ji.

⁸Asahang mecang pi kekinyi sa ketenwa hyu tsüna keqhaikedi ahhansha sa kechiwa ji.

⁹Asu pi kekinyi wi pi annibhon wi gü nyelela kennunpfü nyelela kegü khu wi nnun ketheng tsüdi keqhaikedi kuggü pi Anyiza kecüwa ji.

¹⁰Isala npi kegü asu pi kekinyi tsüdi adeli pi saghu le nsaghu lela tsüna Aaron nyi keqhaikedithu ji tsüpi mathu meceqe gishü yaben.

¹¹Ha kecca ghena kekinyi sapi Apvüwa kecü yenthu.

¹²Keujüla anyi kesü na kekinyi hapi nkesengcha kekinyi sapi Anyiza kecü ti sa lethu, ma asahang pi ahhansha sale kesawa tsüpi azimi nkechi mesa pi kekinyi: awheng pi oliv deli saghu pi kegü mesa nyelela amesa ghapasi gü nu oliv deli pi nyen ketheng nyelela awheng kemehai pi oliv deli saghu amesa gü ketheng, tsü gweghe khuchiben.

¹³Tsümila ma azimi kechi mesa gü pi chiben.

¹⁴Ma amesa tsü alen kesüsü khuya nu pi aju kemehai ntsawa sala pi Apvüwa cüben; tsüna keqhaikedi asa jjü pi kekinyipen kete wi keghü kechiwa ji.

¹⁵Asahang pi ahhansha kesa ghanan ma sa tsü dsaben; tsü dsatu pi ghanenwa wi nthengla.

¹⁶Keujüla anyi kesü ma khishichi ketheng kenie wina nyelela ma kekinyi samvu kesa kenenkunong wina kecca ghena kekinyi sale senghothu, pi kekinyi ghanan tsü maben ndsakhila, isala kedsatu tsü dhitsüwa wi dsaya mehai.

¹⁷Kecheng ghanan wi lela asa tsü ben lethu pi mecang nsathu yishü.

¹⁸Keujüla anyi kesü kecheng ghanan wila tsü dsa lethu Anyiza na anyi tsüwa kekinyi tsü ya nben. Kekinyi tsüna ma ghena le sa nben isala pi nkemetha sa ben, nu thowa na tsü dsa khe ma tsü ghena ketizen saben.

¹⁹Keujüla keccüna wi nkemetha katsüha lela asa tsü kidhen lethu, tsü ndsala pi mecang nsathu yishü. Anyi kesüle kesü lela keccüna wi metha kebenwa asa tsü dsaya mehai,

²⁰isala anyi nkemethawa na tsü dsa lethu, ma pi Anyiza nyi kesüle nsadha.

²¹Tsüti anyi kesüle kesü lela keccüna wi nkemetha anyi le asahang lela kidhen nu kekinyi sa ha dsa lethu, ma pi Anyiza nyi kesüle nsadha.

²²Apvüwa na ayen hathu pi Mosa cü,

²³ha Israel nyithu ghena. Amesüsi, khaghaneni, nyelela aneni kethu tsü ndsala.

²⁴Asahang ma ketanla keshü nyelela aghangsa na ghan kesa kethu tsü ndsala, isala alen kepa wi ghena tsü senya mehai.

²⁵Anyi kesüle kesü lela thowa na asahang pi atsse sapi Apvüwa kekinyi wi kethu tsü dsa khe ma pi Anyiza nyi kesüle nsadha.

²⁶ Israel nyithu na apen kahe wi hang lela khiela awa nyelela asa jjü pi atsse ti nsala.

²⁷Anyi kesüle kesü lela thowa na ayen ha pakhhi khe ma pi Anyiza nyi kesüle nsadha.

²⁸Apvüwa na ayen hathu pi Mosa cü,

²⁹ha Israel nyithu ghena. Thowa na kecca ghena kekinyi sa khe ma tsü pahan sengho aju kemehai ntsa sapi Apvüwa cülo,

³⁰ma tsü sengho atsse pi kekinyi sachi. Ma asahang kethu nu ma nnukhu-kisü saghu sengho aju kemehai ntsa sapi Apvüwa cüben.

³¹Keqhaikediwa na ma kethu pi kekinyipen miwi mecang ben, isala ma nnukhu-kisü tsüna keqhaikediwa ji.

³²Ma kanku ajewa tsüpi aju kemehai ntsa sala pi

³³keqhaikediwa ajjü nu ma kethu pi kecca ghena kekinyi sa kebenwa tsü cüben.

³⁴Asahang nnukhu-kisü nu ma kanku ajewa tsüna aju kemehai ntsawa Apvüwa na Israel nyithu wina tsü khuya nu pi keqhaikedithu cüdha. Israel nyithu na matsü ghaketen tsüdi wila hapi keqhaikedithu ncüthu yishü.

³⁵Hawa ha atsse pi Apvüwa wi kekinyi kesa pahan pila Aaron nu ma tsathu khuthi nu satemetha pi keqhaikedithu kesa thsü ghanan wi pi mathu kecü.

³⁶Tsü ghanan kekinyi hapi mathu cülo nu Apvüwa na Israel nyithu kiza. Hawa ha ayen kesü Israel nyithu na matsü ghaketen tsüdi wi n-niethu yishü.

³⁷Tsalina hathu ha mecang pi kekinyi, asu pi kekinyi, kesami ghena kekinyi, kedhineng ghena kekinyi, khuthi pi satekemetha kekinyi, nu kecca ghena kekinyi ghena ayenthu.

³⁸Ayyikeshü Sinai Yikha wi Israel nyithu na kekinyi sa chilo kekiza ghanan Apvüwa na ayen hathu hapi Mosa cü.