Read Northern Rengma Naga LEVIYEN 8 Bible Online

LEVIYEN 8 - Northern Rengma Naga bible

LEVIYEN 8

¹Apvüwa na Mosa kiza,

²“Aaron nu ma tsathu ssi sen nu hi ketenpen Nithsüjjen kedulen wi gho nu keqhaikedi thsümeni, kenyenji deli, kesami ghena kekinyi amesü zza süpon, aneni süpon keni, nu azimi nkechi mesa ashijü kesü tsüti sen gholo.

³Tsaseng wi Israel nyithu tsüdi cighu pi ciwi chilo.”

⁴Mosa na Apvüwa ma kekiza ti saya, nu Israel nyithu na gho saghukeya wi

⁵ma mathu wi khi, “Hi khili sawale kebenwa ha Apvüwa na ahza khuchi le!”

⁶Mosa na Aaron nu ma tsathu ssigho mathu pi keccüna tssükizü yathsü.

⁷Ma agwomejuwa nu agwomejuwa kaghazu pi Aaron pvü thsü nu alaweng keqhan pi ma laweng qhan cü. Ma adepfü kewhengthsü[1] pi ma pvü thsü nu ageshi keqhan mehaitsü de ketheng tsüpi ma geshi qhan cü.

⁸Ma adeshi keqhan pi ma pvü thsü nu Urim nu Thummim[2] pi ciwi chicü.

⁹Ma ali kemejuthsü pi ma li wi chi, nu Apvüwa na ma kekiza ti satemetha kesa kemetha zensu suna tsanzü tsüpi atuwa misüki cü.

¹⁰Mosa na kenyenji deli khuya nu pi Apvüwa ketenpen Nithsüjjen nu pala ciwi keben tsüdi miwi chi, ma hati nu tsüdi satemetha pi Apvüwa wi chi.

¹¹Ma adeli pahan khuya nu satemetha pi Apvüwa cüle kesalina tsü tagü tughu keghü pi kekinyipen, ma tsanqai, kwenkemetsikhu nu ma zenza miwi chi.

¹²Ma kenyenji deli pahan pi Aaron li miwi keshu chi nu ma khuthi pi satemetha chi.

¹³Tsaseng wi Mosa na Aaron nu ma tsathu ssigho Apvüwa na kekhi ti agwomejuwa pi mathu pvü thsü, alaweng keqhan pi mathu pvü thsü, nu aliwen pi mathu li wi chi cü.

¹⁴Mosa na kesami ghena kekinyi ji amesü zza süpon sengho nu Aaron nu ma tsathu na akwen chang pi tsü li miwi chi.

¹⁵Mosa na tsü pathi nu ma jjü pahan khuya, nu ma kwenzza pi ajjü wi tenchi pi kekinyipen ccügwen ghacüthu miwi chi, tsü satemetha chile kesalina. Ma tsaseng wi ajjü ma gilli tsüpi kekinyipen donbvü ccü wi keshu chi. Ma hati nu tsü satemetha chi.

¹⁶Mosa na ma pvüsheng kethu, ma mechen kemehai ntsa, ma megen nu ciwi keben kethu tsüdi khuya nu pi kekinyipen miwi mecang.

¹⁷Ma tsaseng wi amesü süpon tsü ma hyu, ma sa, nu ma kughungthu khuya nu sen wa Apvüwa na kekhi ti kemnanpen na ameiwa mecang.

¹⁸Tsaseng wi Mosa na mecang pi kekinyi ghena aneni süpon sengho nu Aaron nu ma tsathu na akwen chang pi tsü li miwi chi.

¹⁹Mosa na tsü pathi nu ma jjü pi kekinyipen ccügwen mejü tsüdi wi keghü chi.

²⁰Ma aneni süpon tsü hazighe, atssü pi ma pvüsheng nu ma ccüthu bhu, nu Apvüwa na kekhi ti ma li, ma kethu, nu ma sa tsüdila pi kekinyipen miwi mecang. Mecang pi kekinyi hawa ha atsse pi kekinyi kesü, nu Apvüwa na ma han tsü nenden.

²²Tsaseng wi Mosa na aneni süpon keniwa tsü sengho, tsüna keqhaikedithu khuthi pi satekemetha ghena, nu Aaron nu ma tsathu na mathu kwen chang pi tsü li miwi chi.

²³Mosa na tsü pathi nu ma jjü pahan khuya nu tsüpi Aaron khuna laca ajewa, ma kwenshenpfü ajewa, nu ma ccüshenpfü ajewa wi nyen.

²⁴Tsaseng wi Aaron tsathu ssigho ajjü pi mathu khuna laca ajewa, mathu kwenshenpfü ajewa, nu mathu ccüshenpfü ajewa nyen cü. Mosa na ajjü ma gilli tsüpi kekinyipen ccügwen mejü tsüdi wi keshu chia.

²⁵Ma ma kethu, ma ghanu kethu, ma pvüsheng kethu tsüdi, ma mechen kemehai ntsa, ma megen nu ciwi keben kethu, nu ma ccü ajewa tsüdi khuya.

²⁶Tsaseng wi azimi nkechi mesa shijü satemetha pi Apvüwa cü kesa witsü amesa kesü, adeli pi kechi mesa kesü, nu amesa ghapasi gü ketheng tsü kesü tsüti khuya nu pi asa kethu nu ma ccü ajewa wi chiya.

²⁷Ma atsse ha tsüdi pi Aaron nu ma tsathu kwen wi chi, nu mathu na ha pi aju kemehai ntsa sapi Apvüwa cü.

²⁸Mosa na mathu kwen wi atsse tsü khuya nu khuthi pi kekinyi sala tsü mecang pi kekinyi gweghe kekinyipen miwi mecang. Hawa ha atsse pi kekinyi, nu Apvüwa na ma han tsü nenden.

²⁹Tsaseng wi Mosa na ma nnukhu-kisü tsü khuya nu pi aju kemehai ntsa sala Apvüwa cü. Hawa ha khuthi pi satekemetha neni süpon sa wi Mosa shei. Mosa na Apvüwa kekhi ti tsüdila sa chia.

³⁰Mosa na kenyenji deli pahan nu ajjü kekinyipen miwi keben tsü khuya nu pi Aaron nu ma tsathu miwi nu mathu thsümeni miwi keghü chi. Ma hati nu mathu nu mathu thsümeni satemetha pi Apvüwa wi chi.

³¹Mosa na Aaron nu ma tsathu kiza, “Apvüwa na kekhi ti asa sen wa Apvüwa ketenpen Nithsüjjen kedulen wi shvu, nu tsüpi ciwi khuthi pi satekemetha kekinyi mesa na ashijü wi keben tsü medsalo.

³²Asa le amesa lela ma gilli tsüpi mecanglo.

³³Nthu khuthi pi satekemetha keccüna kesa ghanan tagü tsü npi kecen chu nthu na Nithsüjjen kedulenwa tsü teshi nu bvü nben.

³⁴Nthu kesami tsü sen bvüale kesalina Apvüwa na mangwa salo khi khe ithu na nansü tsü sachidha.

³⁵Nthu na ghanan tagü chuli ghanan le aghaja lela Nithsüjjen kedulen wi ben nu Apvüwa na mangwa khi khe tsü nsathu yishü. Keujüla nthu na tsüti nsa lethu nthu shüaben. Hawa ha Apvüwa na hi kiza le.”

³⁶Tsalina Aaron nu ma tsathu na Apvüwa na Mosa wina khi kechi tsüdila saya.