Read Northern Rengma Naga LEVIYEN 9 Bible Online

LEVIYEN 9 - Northern Rengma Naga bible

LEVIYEN 9

¹Tazen ghanan wi Mosa na Aaron nu ma tsathu, nu Israel nyi ccülikesathu cichi.

²Ma Aaron kiza, “Amesü zza süpon kesü nu aneni süpon kesü nyu ghojünkeya mangla nkemi khuya nu tsü keni pi Apvüwa cülo, amesü süpon tsüna kesami ghena kekinyi nu aneni süpon na mecang pi kekinyi ghena.

³Israel nyithu wi kesami ghena kekinyi aneni süpon kesü, mecang pi kekinyi ghena amesü zza amapi kesü ji kesü, nu khaghaneni zza amapi kesü ji kesü manyi qho nyu ghojünkeya mangla nkemi khuyalo kizalo,

⁴nu kecca ghena kekinyi ji amesü süpon kesü nu aneni süpon kesü. Mathu na tsü keni pi ahhansha sa nu asu pi kekinyi adeli saghu ketheng tsü gweghe pi Apvüwa cü. Mathu hati nsathu yishü, kepaghenanye Apvüwa na nansü mathu tuwi ghoden.”

⁵Mosa na kekhi ti mathu na tsüdi sen nu Nithsüjjen tuwi gho, nu anyi mabenla gho ciwi saghu nu Apvüwa kinyi.

⁶Mosa khi, “Apvüwa na nthu ha tsüdi salo khi, isa lethu ma keten kewegü yala nthu tuwi gho thsüle kesalina.”

⁷ Tsaseng wi ma Aaron kiza, “Wala kekinyipen wi no nu n-nyithu kesami sen bvü thsüale kesalina kesami ghena kekinyi nu mecang pi kekinyi sa chilo. Apvüwa na kekhi ti anyithu kesami sen bvü thsüale kesalina kekinyi ha sa chilo.”

⁸Aaron na kekinyipen wi wa ma ketanla ma kesami ghena kekinyi ji amesü zza süponwa tsü pathi.

⁹Ma tsathu na ajjü sengho ma cü, nu ma kwenzza pi tsü non wi ten chiya nu pahan pi kekinyipen ccügwen ghacüthu miwi chi, nu ma gilli tsüpi kekinyipen donbvü ccü wi keshu chia.

¹⁰Apvüwa na Mosa kekiza ti ma asa kethu, ma megen, nu ma mechen kemehai ntsa tsüpi kekinyipen miwi mecang.

¹¹Isala ma asa nu ma hyu tsü sen wa kemnanpen na ameiwa mecang.

¹²Ma ma ghena mecang pi kekinyi sahangwa tsü pathi. Ma tsathu na ajjü sengho ma cü, nu ma tsüpi kekinyipen ccügwen mejü tsüdi wi keghü chia.

¹³Mathu na asahang tsü li nu ma sa kepathu la pi ma cü, nu ma tsüthu pi kekinyipen miwi mecang.

¹⁴Ma ma pvüsheng nu ma ccüthu bhuya, nu pi mecang pi kekinyi kepathu miwi chi nu pi kekinyipen miwi mecang.

¹⁵Tsaseng wi ma anyithu ghena kekinyi sachi. Ma pi anyithu kesami ghena kekinyi sa ketenwa aneni tsü khuya, nu tsü pathi pi ma ketanla ma kesami ghena kekinyi kesa tsü makesü sachi.

¹⁶Ma mecang pi kekinyi ghena la asahang sengho nu tsüpi ayenthu kenie wina sachi.

¹⁷Ma asu pi kekinyi sachi nu awheng awha kesü khuya nu tsüpi kekinyipen miwi mecang chi. (Hana atsathangla mecang pi kekinyi tsümi gilli.)

¹⁸ Ma anyithu ghena kecca ghena kekinyi ji amesü süpon nu aneni süpon tsü pathi. Ma tsathu na ajjü sen gho ma cü, nu ma tsüpi kekinyipen ccügwen mejü tsüdi wi keghü chi.

¹⁹Aaron na amesü süpon nu aneni süpon gwo wi ma kethu tsüdi pi

²⁰ma nnukhu-kisü tsü wwaya nu tsüdi sen nu kekinyipen wi wa. Ma ma kethu pi kekinyipen miwi mecang

²¹nu ma nnukhu-kisü nu ma ccüthu tsüpi aju kemehai ntsa sala keqhaikedithu ghena pi Apvüwa cü, tsüna Mosa na kekhi ti sa.

²² Aaron na ahhansha tsüdi kesacen seng wi ma kwen zanki pi anyithu miwi chi nu sawegü pi mathu cü, nu ma dugho.

²³Mosa nu Aaron manyi na Apvüwa ketenpen Nithsüjjen non wi du nu shhugho sawegü pi anyithu cü, nu Apvüwa keten kewegü na anyi tsüdi tuwi gho.

²⁴Apvüwa na zuli anni kesun chi pi mecang pi kekinyi nu kekinyipen miwi asa kethu tsü mecang. Anyithu na tsü kemu wi mathu tsüdi magha nu ayyi wi nkhwendu shan.