Read Northern Rengma Naga JEREMIYA 1 Bible Online

JEREMIYA 1 - Northern Rengma Naga bible

JEREMIYA 1

¹Lesüshen hawa hana Benjamin yyi Anathoth nyuti wi keqhaikedithu jawi meshu kesü ma nyan Hilkiya tsawa Jeremiya na khikechi kezhü.

² Judah kadimiwa Josiya, Amon tsawa na kadimi sakeya mapi tagha kecheng wi Apvüwa na Jeremiya wi khi,

³ nu Josiya tsawa Jehoiakim na kadimi sa keben wi ma wi khineng. Tsaseng wi Josiya tsawa Zedekiya na kadimi sakeya taghakhenwa mapi kecu wi Apvüwa na kejon tughula ma ccüneng. Tsü mapi asha mangawa wi Jerusalem nyithu ssinu kushinyi sa bvüa.

⁴Apvüwa na hi wi khi,

⁵“Hi kahang pi no npi kecü wina no kessiya, nu no npi kepvügha wina no pi mizzatentithu wi atusenjüh-kechüwa kesü sa thsüle sayadha.”

⁶Hi lunengchi, “Kemisintsa Apvüwa, hi ketsijüh kekhi yen nchü, hi ghanyi mtsü keben na.”

⁷Isala Apvüwa na hi wi khi, “No ghanyi mtsü benle nkhila, isala hi no kesun pi chi keben nyithu wi wa nu hi no ya khilo kekiza tsüdila pi mathu wi kizalo.

⁸Mathu nmessila, kepaghenanye hi no khweyale kesa ghena no ssiden. Hi Apvüwa, hi khidha!”

⁹Tsaseng wi Apvüwa na ma kwen chang pi ipang kidhen nu hi wi khi, “Kinalo, no nkhithu keyishü ketsijühthu tsü hi pi no cüben le.

¹⁰Nansü hi mizzatentithu nu kadiyyi miwi kekhang pi no cüben, no ya tsü ghazan pfü, nu zansha, yasa nu pasha, nu pi sheng thsüle kesalina.”

¹¹Apvüwa na hi keü, “Jeremiya, no mangwa muben nu?” Hi luneng, “Mcüshülichan cüna kesü muben le.”

¹²Apvüwa na khi, “No khiti yadha, nu hi ijühthu tsü ntsakhiwa sakeya hieben nu ghangden.”

¹³Tsaseng wi Apvüwa na ajühkhi neng nu hi keü, “No kepa wi mangwa muben nu?” Hi luneng, “Hi aghawa apfü kesü na gilli keben mu, nu tsüna he wiwa ncüchi ben.”

¹⁴Ma hi wi khi, “Keyasa na aghawa na gilli pongca sen nu ayyi hawa wi hang kebenthu tsüdi miwi dugho den,

¹⁵kepaghenanye hi aghawa mizzatenti tsüdila cichiben. Mathu kadimi na Jerusalem jenkathu nu khweti kevü wi kadipen saaben, nu Judah nyunuti kepathu la vüya ben.

¹⁶Inyithu na sami kesa ghena hi kemeten pi mathu cüden, mathu na hi yisha nu ahhanshathu sapi acenpvü kepathu cü, nu atsikezhüthu sa nu tsüthu kinyi.

¹⁷Jeremiya, kidenya nu wa hi no khilo kekizathu tsüdi pi mathu kizalo. No khili mathu nmessila, isalethu no mathu jawi benkeya sengwi hi no sapi messi kayi thsüden.

¹⁸Jeremiya, kinalo! Ayyi hewi keben Judah kadimithu, kedithu, keqhaikedithu, nu anyithu kepapa tsüdila no matang ben. Isala hi nansü no ya mathu kaghaninengya kemehai kezü pi no cüben; nu no khweti vüketheng nyunuti kesü, amighe donbvü kesü, nu lezza jjenkeshon ti saaben. Mathu na no chaya nben, kepaghenanye hi no khweya nu no ssiden. Hi Apvüwa, hi khidha.”