Read Northern Rengma Naga JEREMIYA 10 Bible Online

JEREMIYA 10 - Northern Rengma Naga bible

JEREMIYA 10

¹Israel nyithu, Apvüwa na nthu ghena ketsijüh khukechi ha kinalo.

²Ma khiben, “Mizzatenti kepathu len tsü n-nie lalo; atssan wi amankesa tsü ghang pi nkivvüla. mizzatenti kepathu na messi lela.

³Anyi hathu keccüna tsüna ma men nmi. Ayinong wi achanton kesü shüchiya, achan kuhothu na atsanqai pi hoya,

⁴Rükatssü nu suna pi matsi saya. Nqanca thsüle kesalina kejentenji pi jentheng.

⁵Atsikezhü tsüti kesathu tsüna amaji lli wi awakü ti kesa le; tsüthu tsüna ajühkhiya nten; tsüthu tsüna alentsen nketen ghena pieden. Tsüthu tsü nmessi lalo: tsüthu na nthu patenaya nben, nu nthu ghena kemehai mangla saya nben.”

⁶Apvüwa, ciwi thola no ti kesa nmi le; no khang ntsa, nu n-nyan na di nu khang ntsawa le.

⁷ Thowa na no, mizzatenti tsüdi miwi kadimiwa nkinyila saya mehai nu? Nyu no kinyi qo le. Ciwi mizzatenti jawi kemetsa nyi tsüdi nyelela mathu kadimithu jawi lela kesüla no ti kesa nmi.

⁸Mathu tsüdila kejima kejüphon. Mathu na achan pi atsikezhü wi mangwa chüshiya mehai nu?

⁹Mathu tsikezhü tsüna Spain wi rükatssü, nu Ufaz wi suna sengho mejutheng, tsüdila ajikujuthu na kekuli; tsüthu tsüna ada kedechüthu na kede athsü nmiepheü kesa pi mphi thsütheng.

¹⁰Isala Apvüwa, no tsü atsentsa Nyiza le, no hangkeben Nyiza, nu anuphanla kadimiwa le. No nlebentsu shaghathu ayyi na kedheggü den, mizzatentithu na nleben ketsu wi kethanya nben.

¹¹“Nthu anyithu na mathu wi acenpvü atssan nu ayyi nkesachithu tsü yasa benle kesa nkizathu yishü. Mathu na ayyi khiewi la hang waya nben.”

¹²Apvüwa na ma kekhang wina ayyi sachi; ma kemetsa wina ma ayyiwa ha sa nu atssanthu zanshigü chi.

¹³Ma jühkhukechi wina akulu miwi atssü na ghamo; ma ayyi kenten wina akulukeshü sengho. Ma atsankegho wi atsancwe sachi, nu ma tsanqaijjen wina ameghü kesunshi chi.

¹⁴Ha tuwi anyi na jüphon nu meshenshi meya laden; Atsikezhü sa ketenthu na pala chükivvüden, kepaghenanye mathu na sakeya acenpvüthu tsüna atsentsa nye, nu kahangli nmi.

¹⁵Tsüthu tsüna ma men nmi, tsalina pi mangla nkenye sa nsathu yishü; Apvüwa na tsüthu miwi kuli kegho wi tsüthu na dediaben.

¹⁶Jakob Nyizawa tsüna tsüthu ti nye; ma pala tsüdi sakechiwa tsü, nu ma Israel pi ma nyi ntsa sale kesalina kessiyadha. Ma nyan na Apvüwa Kekhang ntsawa tsü.

¹⁷Jerusalem nyithu, nyu na nthu vüyadha! Nthu tsanqai saghuya yilo.

¹⁸Apvüwa na ayyi hawa wina nthu pi khala le bendha, nthu kesüla nmila nkesa chu nthu pachaten. Apvüwa na khidha.

¹⁹Jerusalem nyithu na magha shagha, “Ithu khatila mesa-mena ntsa sadha nu! ithu yisüthu na mehaiya nbendha. Isala ithu na hana kethanya kemehai kesü she meshen!

²⁰Ithu nithsüjjen na yasadha; ali pi tsüthu huketheng tsüna dedha. Ithu tsangathu na bvükhidha; ciwi thola nithsüjjen pieki neng kecü nmidha. ciwi thola keshonthsü pi hagi kecü nmidha.

²¹Hi luneng, ‘Ithu ccülikesathu na jüphon; mathu na Apvüwa wi lenketsütson khie nten. Tsalina mathu na sa meya ladha, nu ithu nyithu na bvüzighedha.

²²Kinayalo! Jühtheü na ghodha! aghawa mizzatenti kesü na kivvü ntsa bendha; tsü süpahizi na Judah nyunutithu pi ayyikeshü kesü, whewhethu kahang pen cengdha.’

²³Apvüwa, anyi thola ma kahangwa tsüna ma ji nye kesa hi chüben; thola ma ketanla ma kahang noncca keya nmi.

²⁴N-nyithu satemeshon chilo, Apvüwa, isala ithu ghena khang ntsa nsala, nyelela no nlebentsu keben wi ithu nmetenla isalethu tsüna ithu ghena asakhen saaben.

²⁵Nleben ketsu pi no kinyi nketen mizzatentithu, nu anyi no meya mvu ketenthu miwi wa thsülo. Mathu na n-nyithu pathidha; mathu na ithu yasatha sa, nu ayyiwa tsü yasa pi thengdha.”