Read Northern Rengma Naga JEREMIYA 15 Bible Online

JEREMIYA 15 - Northern Rengma Naga bible

JEREMIYA 15

¹ Tsaseng wi Apvüwa na hi wi khi, “Keujüla Mosa nu Samuel manyi na hawi ngan nu hi wi khiben lela, hi anyi hathu nantizen chicü nkesale. Mathu ya bvü thsüa. Mathu ya ituwi na bvü thsülo.

² Mathu na khiewa bvü nu kesa no wi keü lethu, hi khidha le mathu kizalo: Pahan na kesakinaa wina shüden— tsüna mathu na waketen pen! Kepa wi pahan na aghikesa wi shüden— tsüna mathu na waketen pen! Pahan na kekhhwen wi shüden— tsüna mathu na waketen pen! Kepathu meshensa pi atssüzüthu saaden— tsüna mathu na waketen pen!

³Hi Apvüwa, hi mathu miwi qhethiketen kesa len mejü saale südheyadha: aghikesa wina mathu pathiaben; mathu keshü kamangthu tsü affüthu na zanpi bvüaben; awathu na tsü dsaben; nu aghangsathu na teshikeathu tsü dsaben.

⁴ Hi ayyi wi anyi tsüdila mathu ghang pi qhethi thsüaben, kepaghenanye Hezekiya tsawa Manasseh na Jerusalem wi Judah Kadimiwa sakeben jüwi kulikechi ghena.”

⁵Apvüwa na khiben, “Jerusalem nyithu, thowa na nthu nantizen, nu nthu miwi leben güccü nu? Thowa na kesie ngan nu nthu na khati saben nu keü nu?

⁶Nthu na hi meya mvu ladha; nthu hi wina khapeghe bvüdha. Tsalina hi ikwen chang pi nthu pashadha, kepaghenanye hi ileben ketsu kekheneng meyaladha.

⁷Ayyiwa wi anyuti tsüdi wi la hi nthu pi amatsi ti ameghü wi keghüki. Hi nthu inyithu yasa, kepaghenanye nthu na nthu kekuli nkemehaithu tsü nteshi.

⁸Nthu yyi wi denyilethu na atssükedone ghüsa wi ahachan miwi jikidha. Hi nthu nyithu acali sa keben wi pathi, nu mathu jja ya ketizensa thsü. Hi zulila agükeccü nu qhethiketen kesa pi mathu kihhe cü.

⁹Kenyibvü ma tsanga tagü bhatagha kesawa na shüca wadha. Ma tuwi tsakethang na kejang sadha; ma leben naa nu kejüghe yaben. Hi nthu ghinyithu ya nthu hang kebenthu pathi thsüaden . Hi Apvüwa, hi khidha.”

¹⁰Hi khatila anyi nonghe nkeya kesü sadha nu! Mangkesa na ijja na hi pvügha pi ayyi wi chi nu? Hi ayyi wi anyi tsüdi ssinu kitagha nu keccücanli den. Hi apisa pi thola n-nna thsü nyelela tho ji la nna meya; isala anyi tsüdila hi kishencü ben.

¹¹Apvüwa, keujüla hi mehaitsü no kekuli nsa, nu ighinyithu na agüccü nu ketizensa keben wi hi mathu ghena no wi nkhiela lethu, mathu kishen-keshithu tsüdila sacen thsü kesawa sa.

¹²(Thola amighe pashüya nten, aghawa na kegho amighe pi lezza kesaghu tsü.)

¹³Apvüwa na hi wi khi, “Hi inyithu na ayyiwa tsüdi wi lela kesami kesa ghena mathu meten cüle kesalina aghinyithu kesunchi nu inyithu keben-keyeng nu atsanqaithu shupvü bvü thsüaden .

¹⁴Hi mathu pi ayyi nchütha kesa pen wi mathu ghinyithu magha sa thsüaden, kepaghenanye ileben ketsu na anni ti anuphanla mecang den.”

¹⁵Tsaseng wi hi khi, “Apvüwa, no chüben. Hi meshenchi nu hi kiqa cülo. Hi ya hi meten-mesha ketenthu miwi ijukhiya thsülo. Mathu miwi lebensie mtsü pi mathu ya hi pathi nsa thsüla. Hi kimenni keben ha nghena le kesa meshenchilo.

¹⁶No hi kiza, nu hi njüh tsüdila kina. Hi nji le, Apvüwa Kekhang ntsawa, tsalina njüh na anonkeghe nu nenthi kesa pi ileben pong cüden.

¹⁷Hi nyu kepa wi ssinu matsü dedila keqhe nu anonkeghe nsa. No ahza khukechi kenie wina hi hi ketan ben nu leben ketsu pi pong pvü gho.

¹⁸Mangsale hi ketizensa bendha nu? Mangkesa na iyisüthu tsüna ma nkeya sa nu? Mangkesa na tsüthu tsüna mehai meya nu? No hi pi mazu wi lela akuza keqha wa keten ti ccükwenshü thsüale ben kwe?”

¹⁹Apvüwa na tsü lunengchi, “Keujüla no kheneng gho lethu, hi no ssi nengya ben, nu no imagha sa nengya ben. Keujüla ma men nkemi jüh keccünengli kesa mithon wi ketsijüh ma men kebenwa tsüpi thangchi lethu no ighena atusenjüh-kechüwa sa nengya ben. Anyithu na no wi gho neng ben, nu no mathu wi nwala mehai.

²⁰Hi no sapi mathu tuwi lezza khweti kezü ti sa cüden. Mathu na no ssinu kaghashe ben, isala mathu na no pashaya nben. Hi no khwe nu noncca hieya le kesalina no ssiben den.

²¹Hi gheshighena nu yasayala wina no kekasha yaden. Hi Apvüwa, hi khidha.”