Read Northern Rengma Naga JEREMIYA 16 Bible Online

JEREMIYA 16 - Northern Rengma Naga bible

JEREMIYA 16

¹Kheneng Apvüwa na hi ccüneng,

²“Apen hati kesa wi ha awubvü ya nyelela atsangathu nbenla.

³Tsüti kesa pen wi atsanga pvügha ketenthu nu tsüthu bajjathu na khati saaten khe hi pi no kizaden.

⁴Mathu na kesakinaa ghei nkemehai ntsa pvü nu shüben, isanu thola mathu ghena leben güccü, nyelela mathu kamang pi vhüle sa nben. Mathu kamang na acenya pi nbonki ketheng ti saaden. Aghi wi shü nyelela khwenthi shü, mathu kamang na awathu nu aghangsathu tsse saaben.

⁵‘Nthu na keshü qaiki keben jjen wi tsü ndula. Tho ghena la leben güccü nsala. Hi kecca sawegü pi inyithu cü, nyelela kaghali nu nanketizen pi mathu ccüca ntendha.

⁶Keban nu ketha-u lela ayyi hawa wi shüaben, isala thola mathu pi vhü nyelela mathu ghena leben gükeccü sa nben. Thola ma leben gükeccü zensu wina ayisü sa nyelela ali whia nben.

⁷Atheghithu shü lela thola ma leben satecca cüle kesa ghena ma ssinu dsajjü nben. Thola nantizenthi kesa pi ccüca nben, ma bajja nmila kesathu wi lela.

⁸“Anyithu na mishu keben jjen wi tsü ndula. Mathu gweghe dsajjü le ndonkila.

⁹ Hi Apvüwa Kekhang ntsawa, Israel Nyiza na mangwa khile ben khe kinalo. Hi anonkeghe nu kenen, nu shanyi kewa kemishu nonkeghe hhai tsüdila nmila thsüaden . Hewi keben anyithu na hangben nu ha kesa muyaden.

¹⁰“No hathu pi mathu kekiza wi mathu na no wi hi mangkesa na daggü ntsa nu kemeten pi mathu cüle südhedha nu kesa keüben. Mathu na mangwa sazzi nu sami nyelela mangwa kesami sapi Apvüwa mathu Nyiza shun theng nu kesa keüben.

¹¹Isalethu Apvüwa na hati khi benle kesa mathu wi kizalo, ‘Nthu bamyithu na hi teshi theng nu wa acenpvü kepathu kinyi nu kekuli sa. Mathu na hi yisha nu hi pi sansi keten jühthu nkinala.

¹²Isala nthu na nthu bamyithu miwi la nmehaiki kulidha. Nthu tsüdila leben-dhu nu nmehai, nu nthu na ijüh nkina.

¹³Tsalina ayyi hawa wina nthu jügüshi pi nthu nu nthu bamyithu la nkechü yyi kesü wi chiaben . Nu ciwi nthu na ghaja ghanan acenpvü kepathu kekuli saaden, nu hi nanketizen mangla pi nthu ccüca nten.’ ”

¹⁴Apvüwa na khi, “Anyithu na hi Ejipt yyi wina Israel nyithu ssi keshhughowa, hangben keten Nyiza, tsüle kesa kekishen nsala keten matsü na ghoden.

¹⁵Tsüti kesawa nyela mathu na hi hangben keten Nyiza, mathu jügü pi ayyi aghawa nu diyyi tsüdi wi vvüzighe chikea penthu wina Israel nyithu ssi keghowa le khi nu kishen waben. Hi mathu ssigho mathu diyyiwa, hi pi mathu bamyithu kecü wi tsü chineng cüaden. Hi Apvüwa, hi khidha.”

¹⁶Apvüwa na khi, “Hi anga kecü nyi kejon na ghola anyi hathu ghanya thsüale kesa ghena kesun chiben. Tsaseng wi asakejügü nyi kejon na gho ayikha nu yyishiphon tsüdi wi mathu jügüa nu alonku tsüdi wi mathu jügülo kesun chiaben .

¹⁷Hi mathu kekuli tsüdi muben. Mangla ituwi kuthiya nben; mathu kesami tsüna hi ghü bvü meya.

¹⁸Hi mathu ya mathu kesami nu gheshighena ghena kishen keni dhi thsüden, kepaghenanye mathu na kahangli nkemi akamang ti kesa tsikezhü pi iyyiwa nakhidha, nu mathu na milikemesa cenpvüthu pi tsü pongdha.”

¹⁹Apvüwa, no kekhwe nu kezü pi hi cü ketenwa tsü le; no agükeccü wi hi kiqa ketenwa le. Mizzatentithu na ayyi kenten wina no wi gho khiben, “Ithu bamyithu na milikemesa cenpvüthu tsü khe kepa wi mangla nmi, ma men nkemi tsikezhüthu tsü khe kepa wi mangla nmi.

²⁰Anyi kesü na ma ketanla ma cenpvüthu tsü zhüya mehai kwe? Nyele, keujüla tsüti sa lethu tsüthu tsüna acenpvü ntsawa nye.”

²¹“Tsalina Apvüwa na khi, ‘Kutitan nu anuphan ghena hi mizzatentithu ya hi kekhang nu hi kezü chüya thsüaden; mathu na hi Apvüwa le kesa chüyaben.’ ”