Read Northern Rengma Naga JEREMIYA 17 Bible Online

JEREMIYA 17 - Northern Rengma Naga bible

JEREMIYA 17

¹Apvüwa na khiben, “Judah nyithu, kesami tsüna amighe kezhüji pi zhüdha. tsüna diamond ketsu pi nthu leben wi jengki nu kekinyipenthu ccügwen wi hokidha.

²N-nyithu na yyishiphon shoni wi achanton kemejjü ccü tsüdi wi Asherah cenpvü nzawa kekinyipen nu zensu pieki pi ketheng wi tsü

³nu agheja wi ayikha shoni tsüdi wila kinyiden. Nthu na nthu yyi tsüdi wi kesami sa kethengwa tsü ghena hi nthu ghinyithu ya nthu keben-keyeng nu nthu tsanqai menkebenthu tsü senbvü thsüaden .

⁴Nthu na hi pi nthu kecü yyiwa tsü teshi thsüaben, nu nthu na nthu nchütha kesa yyi wi nthu ghinyithu kekuli sa thsüaden, kepaghenanye ileben ketsu na anni ti anuphanla mecang ben den.”

⁵Apvüwa na khiben, “Hi anyi hi wina bvü keawa, ma kenondi pi anyi shü keten kezü miwi chi ketenwa tsü meshensa den.

⁶Ma ayyikeshü wi aghangbhon kesü wi ayyi keqha mangla shigü nketen, amcü yyi wi keben ti. Kemehai mangla ma miwi ben nten.

⁷‘Isala kenondi pi imiwi chi ketenwa sawegü pi cüden.

⁸ Ma achanton na akuza kete wi shigü, nu ma ghazan na atssü wi chachi keben ti kesa. Keyeng tsü na gho lela tsüna messi nten, kepaghenanye mawa na keshüthangla mejjüdhi ben den; tsüna atsan ngho lela leben gükeccü nmi; tsüna mabi bün ben den.

⁹“Thowa na anyi leben chüshiya mehai nu? kepa wi mangla tsüti nyu kemechu nmi; tsüna naa mtsü pi mehaiya nten.

¹⁰ Hi Apvüwa, hi anyi leben ketsü nu kesinan den. Hi anyi kesüsü ma hang keten len kenie, nu ma kekuli qe wina pi ma ghan-nan den.”

¹¹Anyi atsentsa nkenye wina apisa muya ketenwa tsüna awa kesü na ma ghatsü nketheng tsü ghong keten ti kesa. Ma acalihi sa keben wina ma keben nmilaben, nu asakhen wi mangla nkenye kejüphon sa waben.

¹²Ithu Kekinyijjen na anyankethang kadipen ti adechhü wina ayikha kemisi miwi ben.

¹³Apvüwa na Israel kahangwa; no teshi keathu tsüdila kejügheya thsüaben. mathu tsüdila anyan pi ayyinikhu wi zhü ketheng ti nmilaben, kepaghenanye mathu na no Apvüwa, atssü kebvüpenwa tsü mali kesalina.’

¹⁴Apvüwa, hi sapi mehai cülo, isathu, hi mehaitha yaben; hi kekasha cülo, isathu hi yazi yaben. Hi seng ketenwa tsüna no le!

¹⁵Anyithu na hi wi khi, “Apvüwa na ithu kitsan keten jühthu tsüna khiewi ben nu? Ma ya khili tsüthu kulishi thsülo.”

¹⁶Isala Apvüwa, hi no ya wan keyasa sengho mathu miwi chilo no kesun khvu nsa; hi mathu miwi ketizenkesa kegho nmvu nben. Apvüwa, no ha chüben; no hi mangwa khidha khe chüben.

¹⁷Ighena kemessi kesü nsa lalo; ketizenkesa tsü kegho wi no hi ken-nie benwa.

¹⁸Kejüghekeya sengho hi kimenni ketenthu miwi chi cülo, isala hi tsü hei cülo, Apvüwa. Kemessi pi mathu pong cü, isala hi pa nteqhela. Wan ketizenkesa sengho mathu miwi chi nu mathu pakhhizighe cülo.

¹⁹Apvüwa na hi wi khi, “Jeremiya, wa hi ketsijüh pi anyithu khweti-jenka, Judah kadimithu na dushhu keten pen witsü thangchilo; nu tsaseng wi Jerusalem khweti-jenka tsüdi wi walo.

²⁰Kadimithu nu Judah nyithu tsüdi nu Jerusalem wi hang nu akhweti hathu wi du ketenthu na hi kekhi jüh kinalo kizalo.

²¹ Mathu na mathu kahang ghali ten lethu, Sabbath ghanan wi akhhi mangla npvü lalo kizalo; mathu na Sabbath ghanan wi mangla pvü nu Jerusalem khweti-jenka wi ndula,

²²nyelela mangla pvü nu mathu jjen thenkeghe nbvüla. Mathu na Sabbath ghanan wi kekuli nsala; hi mathu bamyithu wi ijüh khukechi ti mathu na tsüpi atsathang kemetha kesü sala nie ntenthu yishü.

²³Mathu bamyithu na ijüh nkina nyelela mathu leben nchi. Tsüti kesawa nyela mathu na leben-dhu wa; mathu na ijüh nkina mvu nyelela hi wi pala chüya mvuthi nsa.

²⁴“Anyi hathu wi mathu na ijüh khukechi tsüdi nkinathu yishüle kizalo. Mathu na Sabbath ghanan wi akhhi mangla pvü nu anyunuti hawa khweti-jenkathu na ameiwa shhu yishü. Mathu na Sabbath tsüpi kemetha tsathang sala n-niethu yishü nu kekuli mangla nsala.

²⁵Isalethu mathu kadimi nu kaditsathu na Jerusalem khweti- jenkathu wi du nu David na senkegho kadimi kekhang tsüti sen yaben. Judah nu Jerusalem nyithu gweghe gorugari nu goru miwi benya nu Jerusalem wi keshüthangla anyi na pong ben den.

²⁶Judah nyutithu nu Jerusalem kevü wi anyuthu wi anyithu na ghoben; mathu na Benjamin yyi, yyishiphon ccü wi, ayikhathu wi nu Judah cülawa wina ghoben. Mathu na mecang pi kekinyi, ahhansha kesa, asu pi kekinyi, nu hankedemvu nu keseng ghena kekinyithu la sen nu hi Kekinyijjen wi ghoben.

²⁷Isala mathu na ijüh kina nu Sabbath pi atsathang kemetha sala n-niethu yishü. Mathu na tsü ghanan wi akhhi mangla pvü nu Jerusalem khweti-jenka wi shhu yishü, kepaghenanye mathu na tsüti sa lethu hi anni pi Jerusalem khweti-jenka tsü mecang cüben. Anni na Jerusalem kadijjenthu mecang shaben, nu thola tsü patenenya nben.”