Read Northern Rengma Naga JEREMIYA 18 Bible Online

JEREMIYA 18 - Northern Rengma Naga bible

JEREMIYA 18

¹Apvüwa na hi wi khi,

²“Apfükezhüwa jjen wi cülo, ciwi hi ijüh pi no cüben na.”

³Tsalina hi ciwi wa nu apfükezhüwa na ma tsanqai sen nu kuli keben mu.

⁴Khathansha wi apfüyyi tsüna mehaitsü zhü shhugho meya lakhe ma anisha tsüpi apfü kepa wi zhüyaden.

⁵Tsaseng wi Apvüwa na hi wi khi,

⁶“Israel nyithu, apfükezhüwa na anisha pi kuli keten tsüti hi nthu ssinu kuliya kemehai nmi kwe? Apfüyyi na apfükezhüwa kwen wi keben ti nthu na ikwen wi benle.

⁷Keujüla hi matsü katsü ha wi lela mizzatenti nyelela kadiyyi kesü pfüshi, pakhhi, nyelela yasa cütenle khi.

⁸isala mizzatenti tsüwa na ma nkemehai wina kheneng gho lethu, hi sale khi kethengwa tsü nsa laben.

⁹Nu keujüla hi mizzatenti kesü nyelela kadiyyi kesü pi ben thsü nyelela pieki cütenle khi,

¹⁰isala mizzatenti tsüwa na ijüh nkina nu nkemehai sa lethu, hi sale khi kethengwa tsü sa nben.

¹¹Tsalina Judah nu Jerusalem nyithu wi hi mathu matangle acho kiden nu mathu meten cüale kidenyadha le kizalo. Mathu ya kesami kahang wi nhangla yilo, mathu kuli keten lenwa tsü kemiliyalo kizalo.

¹²Mathu na hati luneng chiben, ‘Nmale, ithu mangkesa na tsüti sa nu? Ithu na samvu keben ti leben-dhu nu nmehaila ben den.’ ”

¹³Apvüwa na khiben, “Mizzatenti tsüdi wi hatu wi tsüti sala nye khe keü chilo. Israel nyithu na keqhethi kekuli sadha!

¹⁴Lebanon yikha kemisi wi aghola nmila ten kwe? Tsü yikha kekicü wi akuzathu na qha ten kwe?

¹⁵Isala inyithu tsü hi malidha; mathu na hankedemvu mecang pi atsikezhüthu kinyiden. Mathu na mathu nwathu keyishü len wi accümeshü yadha; mathu kheni lenwa tsü n-nie ladha; mathu na alen ntsawa nkenye tonden.

¹⁶Mathu na ayyi ha pi keqhethiketen kesü sa, nu anuphanla nkekhichi sadha. Tsü pvüdhi kewathu tsüdila tsü mu pi qhethiketen sa, nu amansala mathu li pvükejen den.

¹⁷Hi inyithu jügüzighe pi mathu ghinyithu tuwi nishuwa meghü na ayyinikhu mo zighe kechi ti sa thsüaden . Hi mathu wina khapegheden; kededi kegho wi hi mathu kiqa nten.”

¹⁸Tsaseng wi anyithu na khi, “Ithu na Jeremiya ghena pala pahan kuli na! Keshüthangla ithu kecükegwe thsüle kesa ghena keqhaikedithu, ithu lentsütson thsüle kesa ghena kemetsathu, nu Anyiza ketsijüh khi thsüle kesa ghena atusenjüh-kechüthu na ben. Ithu na ma kemeshensa jüh khi nu ma mangwale khiten khe tsü nkinala na.”

¹⁹Tsalina hi kekhie sa, “Apvüwa, hi khi keben nu ighinyithu na ighena mangwa khiben khe kina chilo.

²⁰Nkemehai tsüna kemehai kutimen kwe? Isala mathu na ayyiku chhü nu hi ya khuli thsüale saben. No nlebentsu nu mathu miwi nkuli thsüle kesalina hi no wi ghola mathu ghena kekhi tsü meshenchilo.

²¹Isala Apvüwa, khilitsü mathu tsangathu ya khwenthi thsülo; aghi wi mathu pathi thsülo. Nzathu ya mathu wubathu nu atsangathu nmila thsülo; npvüzathu ya kesakinaa ghei pvü nu shü thsü nu acalithu ya aghi wi yathi thsülo.

²²Kitsan nchila anyitenti kesun pi mathu jjenthu shu, nu mathu ya messi nu qai thsülo. Mathu na hi ya khulidu thsüale ayyiku chhü nu aca pi die theng.

²³Isala Apvüwa, mathu na acho sapi hi pathiale sa keben tsüdila no chüben. Mathu nkemehai nu mathu kesami teshi pi ncü lalo. No nlebentsu keben wina mathu miwi kuli nu pasha pi khalalo.”