Read Northern Rengma Naga JEREMIYA 19 Bible Online

JEREMIYA 19 - Northern Rengma Naga bible

JEREMIYA 19

¹Apvüwa na hi wala ayyipfü kesü sheiyalo kiza. Ma kheneng hi anyi keqhaithu pahan nu keqhaikedi kemechanthu pahan ssiya,

² nu Hinnom Yyiketijü wi Apfükegi Khweti- jenka kedulen wi walo kiza. Ciwi ma pi hi cü keten ketsijüh tsüpi khilo sa.

³Apvüwa na hi hati khilo kiza, “Judah kadimithu nu Jerusalem nyithu, hi Apvüwa Kekhangwa, Israel Nyiza na mangwa khile ben khe kina chilo. Hi kededi sengho apen hawa wi chile saben nu anyi tsü cüki zakeyathu tsüdila akhuna mthiben.

⁴Hi ha sale ben, kepaghenanye anyithu na hi yisha nu ahhanshathu sapi acenpvü kepathu kinyi nu apen hawa nakhidha— acenpvü tsüthu tsüna mathu nu mathu bamyithu nyelela Judah kadimithu na tsü cüki nchütha kesathu. Mathu na kesami nkemithu jjü pi apen hawa ha pongdha,

⁵ nu mathu na mathu tsangathu mecang pi ahhanshathu sale kesa ghena Baal ghena kekinyipen sa. Hi mathu ya ha salo nkhi, nyelela tsüna hi kemeshen wila ndugho.

⁶Tsalina apen hapi Tofeth nyelela Hinnom Yyiketijü le ncila keten matsü na ghoden. Tsü kuti wi pi Kesüthi Yyiketijü le ciaden.

⁷Hi apen ha wina Judah nyi nu Jerusalem nyithu na achosa kiden tsüdila pi kaghacang ceng thsüaden . Hi mathu ghinyithu ya mathu miwi khangya nu aghi wi mathu yathi thsüaden . Hi mathu keshü kamang pi awathu nu aghangsathu tsse sa thsüaden .

⁸Hi dedi ntsa kesa sengho anyunuti hawa miwi chi nu tsü pvüdhi kewathu tsüdila amansa nu qhethiketen saaben.

⁹Aghinyithu na anyunutiwa vüya nu tsü nyithu pathiale kiden yaben. Tsü vü kegho tsüna kemessi ntsa sa nu anyunutiwa wi kebenthu na khokho sa dsa, nu mathu tsangathu sa la dsaben.”

¹⁰Tsaseng wi Apvüwa na anyi hi gweghe kewawa tuwi na ayyipfü tsü pakhhilo hi kiza,

¹¹nu mathu wi Apvüwa Kekhangwa na hati khiben le kizalo khi, “Hi anyi hathu nu anyunuti hawa yasa den, isathu tsüna ayyipfü pakhhi nu kezhüghuli nkeya tsüti saaben. Anyithu na Tofeth wi lela mathu keshü kamang pi vhüaben, kepaghenanye apen khiewi la tsüthu pi vhükeya nmila keben ghena.

¹²Hi anyunuti hawa nu tsü nyithu pi Tofeth ti saaten kesa khishiben.

¹³Jerusalem jjenthu, Judah kadimithu jjenthu, nu ajjen miwi hankedemvu mecang pi ghotsithu kinyi nu ciwi na kisengtssü meyisha pi acenpvü kepathu kinyi kesa pen tsüdila nmetha pi Tofeth ti saaben.”

¹⁴Tsaseng wi Apvüwa na hi kesun pi ma ketsijüh pi thangchilo kesa pen tsü teshia. Hi ciwi Kekinyijjen ccühha wi du ngan nu anyithu tsüdi kizala,

¹⁵Apvüwa Kekhang ntsawa, Israel Nyizawa na khi, “Hi anyunuti hawa nu tsü kevü wi anyutithu tsüdi miwi kemeten pi cüle khi ketheng tsüdi pi cüaden, kepaghenanye nthu na leben-dhu nu hi kekhi jüh kina nketen ghena.”