Read Northern Rengma Naga JEREMIYA 2 Bible Online

JEREMIYA 2 - Northern Rengma Naga bible

JEREMIYA 2

¹Apvüwa na hi kizala,

²ketsijüh hapi Jerusalem nyi tsüdi wi thangchilo. “No kepvünyi tsüwi khati leben tsentsa sa, nu ishinyi meshhu wubanyi sa wa tegü wi no khatila hi ghali khe hi tsü meshenben; no ayyikeshü nu amacü pi chi nketen pen wi lela hi nie.

³Israel, no iji ketan sagho; no itsanqai kemetha sagho. Hi agükeccü nu wan kededi kesun pi no patena ketenthu tsüdi miwi chi. Hi Apvüwa, hi khidha.”

⁴Apvüwa jüh kinalo nthu Jakob shicü, nthu Israel mizzathu.

⁵Apvüwa na khiben: “Nthu baqhaithu na kethenjüh khati kesa sengho hi matang nu? Mangwa na mathu sapi hi wina bvü thsü nu? Mathu na ma men nkemi atsikezhüthu kinyi, nu mathu ketanla mangla nkenye nyi sadha.

⁶Mathu na hi nkhichi, hi Ejipt wina mathu kekasha cü lela, nu aghansha wi mathu len tsütson sen nu wa; ayyikeshü nu ayyiku kebi, keqha nu kemessi yyi, thola hang nketen, nu thola wa nketen pen wi tsü.

⁷Hi mathu ssigho ayyi kemehai wi chi, mathu ya asu kemehaithu nu kemehai kepa wila sen nu anongheya thsüle kesalina. Isa nan mathu na iyyi yasadha; hi diyyi pi mathu kecü tsü nakhidha.

⁸Keqhaikedithu na ‘Apvüwa tsüna khiewa ben nu’ isa keü. Hi keqhaikedithu na hi nchüla. Kekhangkesenthu na hhaghe nu hi matang; atusenjüh-kechüthu na Baal nyan wina khi, nu ma men nkemi atsikezhüthu kinyi.”

⁹“Tsalina hi Apvüwa, inyithu ssinu ajühkaghakhi neng le saben. Hi mathu shicübvüghathu keshun senghoden.

¹⁰Niduwa Sipra tssümangkehi wi walo, nu anyi pahan kesun pi nishu wiwa Kedar yyi wi chilo. No hatu wi hati sa nkegho chüyaben.

¹¹Mizzatenti kepathu la mathu cenpvü nkemili, tsüthu na atsentsa nye lela. Isala inyithu tsü hi Anyiza, kenyuwakü sengho mathu kecüwa hapi mathu ghena mangla saya nketen cenpvüthu tsü kemili yadha.

¹²Tsalina hi atssan na kemessi sa kuli thsüle kesa kiza chiben, Amansa nu qhethiketen sa thsüle kesalina,

¹³kepaghenanye inyithu na kesami keni sadha: Mathu na hi atssü kemetha kebvüpenwa wina khapeghe bvü, nu mathu na atssükhang kebi atssü na benya nketen tssükhang tsü chhü.”

¹⁴“Israel na nssümagha kesü, ma nssümagha kesa wi npvügha. Isathu mangkesa na ma ghinyithu na ma jügü nu?

¹⁵Mathu na ssensitemi ti ghamo pi ma satekü; tsüthu na ma yyi sapi ayyikeshü sa thsüdha, nu ma nyutithu na dedi pi yasatha sadha.

¹⁶Anle, Memfi nu Tahpanhe nyithu na ma ligü pakhhidha.

¹⁷Israel, no ketanla ha sengho nmiwi chiyadha! No, Apvüwa n-Nyiza hi teshidha, hi alenca wi nlen tsütsontu keben jüwi na.

¹⁸Ejipt wi kewa ghena no mangwa kekiyi muya benle meshen ben nu, Nil Ghaku wi atssü jjüyale kesa ghena kwe? Assiriya wi kewa ghena no mangwa kekiyi muya benle meshen ben nu, Eufrat wi atssü jjüyale kesa ghena kwe?

¹⁹No nkemehai ketanla kemeten pi no cüben, nu no hi wina kheneng bvü kesa tsüna no meshensa den. No, Apvüwa n-Nyiza hi yisha nu hi wi jühtsentsa nsenla kesa tsüna khatila nmehai, nu sazziben khe chüyaden. Hi Kemisintsa Apvüwa Kekhang ntsawa, hi khidha.”

²⁰Kemisintsa Apvüwa na khiben, “Israel, no matsü kesie wakea wi no hi kekhang meya mvula; no ijüh nkina nu hi nkinyi mvula. Yyishiphon kemisi tsüdi miwi nu achanton kemejjü tsüdi cakhu wi keqheza cenpvüthu kinyi wa.

²¹Macü kemehai ntsawa wi kessishikeya kemeshentsse ton ti hi no pi sheng chi. Isala no mangwa khati sadha nu? No kemeshentsse ton kebighe ma men nkemi ti sadha.

²²No sapuno kekhang ntsa pi kizü lela hi no kesazzi yisü tsü muben.

²³No khatinu no ketanla no n-nakhile, no khiela Baal nkinyile khiya mehai nu? No ayyiketijü wi khati sami, nu no mangwa sadha khe ghangchilo. No sunsiesa ghala na jigü mvu nu bvü kegoe keten ti sa,

²⁴ayyikeshü wi bvü wa. Ma jigü mvu keshagha wi thowa na ma khenya mehai nu? Asüpon ma jigü mvu keben kesüla agükeccü nsala mehai; kejigü tsüwi keshüthangla aghalawa metu yaden.

²⁵Israel, acenpvü kepathu keka nu nccü mnan, nyelela dighe pi n-giyan qhayi nbenla. Isala no khi, ‘Nmale! Hi khenengya nben. Hi asang cenpvü ssinu kenenli yadha, tsalina tsüthu sennie waden.’ ”

²⁶Apvüwa na khiben, “Kaghanfü nyi kesü na nyu ma ghanya lethu kejüghe yaya keten tsüti nthu Israel nyithu tsüdila kejüghe yaden — nthu kadimithu nu kedithu, nthu keqhaikedi nu atusenjüh-kechüthu.

²⁷Nthu na achanton kesü tsüpi nthu ba le, nu alontsen kesü pi nthu jja le khi ketenthu tsüdi kejüghe yaben. Tsüti saaben, kepaghenanye nthu na hi wi kheneng kegho mithon wi hi wina khapeghe bvü kesalina. Isala khathansha wi nthu na agüccüya khe hi gho nthu hangsha cülo khieden.

²⁸“Nthu na nthu ghena sakeya acenpvüthu tsüna khiewa ben nu? Nthu na kusi agüccüya khe tsüthu ya nthu hangshaya thsülo— tsüthu na saya mehai lethu! Judah, no anyunuti kejon keben ti acenpvüthu la kejon na ben.

²⁹No nkenen mangwa ben nu? Mangkesa na hhaghe nu hi matang ten nu?

³⁰Hi kemeten pi no cü, isala tsüna mangla kemehai sa meya. No hi ya no satemeshon nsa thsü mvula. No ssensitemi kedaggü kesü ti atusenjüh-kechüthu pathi.

³¹Israel nyithu, hi mangwa khiben khe kinayalo. Nthu tuwi hi ayyikeshü kesü nu kemessi keben yyi ti sa kwe? Isalethu Mangkesa na nthu kesa mvuwa sa nu hi wi kheneng gho ntenle khiten nu?

³²Nza kepvünyi kesü na ma ghe mali nyelela shanyili na ma keshanyi thsümeni mali ten kwe? Isala inyithu tsü ghanan si nkeyakhi hi malidha.

³³Nthu na khatinu nthu kenenthu sennie ten khe nza nkemehai ntsawa lela nthu wina tsü chüya mehai.

³⁴Nthu thsümeni wi ketha-u nu kesami nkemithu jjü pi nyenkidha, tsüna nyu jjen paqhe ketenthu jjü nye. “Isala tsüti saben meshü,

³⁵no khiden, ‘Hi nsamile, ntsakhiwa Anyiza na hi ssinu leben ntsula dhale.’ Isala nthu na nsamile khi keten ghena hi Apvüwa, hi kemeten pi nthu cü.

³⁶Nthu na mizzatenti cenpvüthu wi kewa ghena nthu ketanla nthu sapi mangla nkenye sadha. Assiriya ghena nthu ccükwenshü kesa tsüti Ejipt ghena la tsüti saaben.

³⁷Nthu na jüghela nkhwenca sen nu Ejipt wina kheneng bvüaden . Hi Apvüwa, hi nthu na nondi ketenthu tsü teshidha; nthu na tsüthu wi mangla kekiyi muya nben.”