Read Northern Rengma Naga JEREMIYA 20 Bible Online

JEREMIYA 20 - Northern Rengma Naga bible

JEREMIYA 20

¹Khathansha wi Immer tsawa Pashhur, keqhaikediwa, Kekinyijjen wi kedi ntsawa na hi hathu pi thangchi keben zaya khe,

²ma hi kiccü nu amighe ssüli pi hi hu pi Kekinyijjen wi Benjamin khweti-jenka kete wi chia.

³Tsü ghanenwa Pashhur na hi kuhu lisha kecü sengwi hi ma wi khi, “Apvüwa na n-nyan pi Pashhur nci. Ma n-nyan ci kecü na ‘Apen tsüdi wi Kemessi’.

⁴Apvüwa na ma ketanla khi, ‘Hi no sapi no ketanla ntuwi nu npvüshangthu tuwi la kemessi kesü sa thsüden, nu mathu ghinyithu na njünnu pi mathu tsüdila süthikea muya thsüaden . Hi Judah nyi tsüdi pi Babylonia kadimiwa kekhang kekhu wi chiaben, nu mathu pahan ssisen ma diyyiwa wi atssüzü sa wa nu pahan pathiaben .

⁵Hi pala mathu ghinyithu ya anyunuti hawa keben-keyeng tsüdi shuya, ma ji nu ma tsanqai tsüdi, nu Judah kadimiwa keben lela nu pala tsüdi pvü nu Babylonia wi waden.

⁶Pashhur, nghenawa lethu, no nu ntheghi la ghanya nu ssisen Babylonia wi bvüaben. No ciwi shü nu pi npvüshangthu, no mathu wi milikemesa kejon khipi kekizathu gweghe vhüaben.’ ”

⁷Apvüwa, no hi mili nu hi mechudha, No imiwi züki nu imiwi khangyadha. Anyi tsüdi hi nankeqhe; mathu na ghanan thangthang hi nankeqhe.

⁸Hi khathansha wi ajühkhi shagha khe, hi magha nu jishaden, “Yasayala! Keyasa!” Apvüwa, hi no ketsijüh pi kekhi ghena matsü tsüdi wi anyithu na hi nankeqhe nu nkhichi saben le.

⁹Isala hi khathansha wi “Hi Apvüwa malia ten le, nu ma nyan wina nkhidha,” isa khi khe njüh na anni ti hi mecang waden. Hi tsü kekheneng le ipiketsü sa, isala tsü pvüben meya laden.

¹⁰Anyi tsüdi cakhusha wina hati khi keben hi zaya, “Kemessi na apen tsüdi wi bendha! Ithu ma cüki pi kekhang kesenthu kiza na!” Ipvüshang ntsathu lela hi keqanca hie. “Ithu na ma mechuyala mechü, isathu ithu na ma ghanya nu ajukhiya na.” mathu na isa keccünengli.

¹¹Isala Apvüwa, no khang nu zü sen nu hi wiwa ben, nu hi meten-mesha ketenthu na mehai meya laben. Mathu na anuphanla kejüghe yaben, mathu na haicen meyala keben ghena. Mathu kejüghe keya tsüna mangla maliya nben.

¹²Isala Apvüwa, no Kekhang ntsawa, no ajühtsentsa sen nu ayyi kesinanden; no mathu leben nu kemeshen wi mangwa ben khe tsü chüben. Tsalina hi ya no ighinyithu miwi ajukhikeya muya thsülo, kepaghenanye hi ighena pi no dhenchidha.

¹³Apvüwa sakilo! Apvüwa senglo! Ma nkemehaithu kekhang wina nyu ma pasha ketenthu kekasha cüden.

¹⁴ Hi kepvügha tsathang tsü kishencülo! Ijja na hi kepvügha tsathang tsü malilo!

¹⁵Anyi jühtheü sengho iba wi “Tsüna npvüza le! No atsa kesü muyadha! isanu ma sapi anonghe thsü kesawa tsü kishencülo.

¹⁶Ma ya anyunutithu, Apvüwa na nanketizen nmila yasa kesathu ti sa thsülo. Ma ya ghanen mitu na kinaa wi kemagha hhai za, nu aghanan wi aghikesa hhai kizawa sa.

¹⁷kepaghenanye ma hi npi kepvügha wina hi npathi. Isalethu ijja pvü na ishüjjen saa kesa.

¹⁸Mangkesa na hi ya pvüghaya thsü nu? Tsüna ahathakina nu agükeccü ketan, kejüghekeya pi hi kahang sakhen sale kesa ghena kwe?”