Read Northern Rengma Naga JEREMIYA 21 Bible Online

JEREMIYA 21 - Northern Rengma Naga bible

JEREMIYA 21

¹Judah Kadimiwa Zadekiya na Malkhiya tsa Pashhur nu keqhaikediwa Maaseiya tsa Zefaniya manyi kesun pi hi wi chi nu ha khi thsü:

² “No nchala ithu ghena Apvüwa ccüneng chilo, kepaghenanye Babylonia kadimiwa Nebukhadnezzar nu ma süpahizi na anyunutiwa nka ghoden. Apvüwa na ithu ghena amankesa kesü kulichi nu Nebukhadnezzar ya aseng kheneng thsülaya mehai le.”

³Tsaseng wi Apvüwa na hi kiza, nu hi pi hi wi kesun kechi meshu keni wi kiza

⁴nu wala Zedekiya wi Apvüwa, Israel Nyizawa na hati khiben le kizalo khi, “Zedekiya, hi no süpahizi na Babylonia kadimiwa nu ma süpahizi ssikaghashen kebenthu tsü pashaden. Hi no süpahizi ghitsanqai pi anyunutiwa non wi saghuaben.

⁵Hi hi kezü, aghekepvü, ilebenketsu, nu ileben keminu tsüdi pi no ssikaghashen den.

⁶Hi anyunuti ha wa wi hang kebenthu tsüdila pathiaben; anyi nu aghangsa la kinaa ghei nkemehai pvü nu shü thsüaden .

⁷Isala no, nkekhu wi kedithu, nu anyi aghi wi hang keyathu, azeng wi nu kinaa ghei nkemehai wi nkeshüthu tsü hi Kadimiwa Nebukhadnezzar nu nghinyithu ya nthu ghanya thsüaden, tsüthu tsüna nthu pathi mvu kebenthu. Nebukhadnezzar na nthu pi shü thsüaben. Ma nthu thola heisha nben, nyelela nantizen nu kaghali pi nthu thola ccüca nben. Hi Apvüwa, hi khidha.”

⁸Tsaseng wi Apvüwa na hi anyithu wi kizalo hi kiza, “Kinalo! Hi Apvüwa, hi kahang wi kewa len nu keshü wi kewa len kessi kepapa sayalo pi nthu cüben.

⁹Anyi thowa na anyunutiwa wi ben khe aghi wi ma pathi nyelela khhwenthi nyelela kinaa ghei nkemehai pvü nu shüaben. Isala thowa na shhula anyunuti vüsen kebenthu, Babilon nyi kwen wi duya khe tsüwa pathi nben; ma ma kahangli ketanla hangsha yaben.

¹⁰Hi anyunuti ha meheishala yasale südheyadha. Tsüpi Babilon Kadimiwa cüaden nu ma tsü mecang pi ayyi wi chiaben. Hi Apvüwa, hi khidha.”

¹¹Apvüwa na hi ketsijüh hapi Judah Kadijjen wi David shicüthu cülo kiza, “Hi Apvüwa, hi khi keben jüh ha kinalo. Keshüthangla kemeshonwa tsü saben le kesa ghang yalo. Nyu mechu ketenwa kwen wina nyu ma mechu kebenwa khweyalo. No tsüti nsa lethu no kemehai kuli kebenwa tsüna ileben ketsu cüssi pi patenenya nketen nni ti saaben.

¹³Jerusalem, no alon kesü na deshentijü miwi shhugho keben ti no ayyiketijü miwi donkiben. Isala hi no ssinu kaghashen den. No anyi kesüla no ssikaghashenya nben nyelela nkhweti pvüqhe dughoya nbenle khiden.

¹⁴Isala hi no kuli kethengwa ghena no meten cüaden . Hi anni pi no kadipen wi chi nu anni na tsü kevü pala tsüdi la mecang shaben. Hi Apvüwa, hi khidha.”